4. अब्राहम सोगी परमेश्वरे दा बायदा

बाढ़ दे केई सालां बाद, संसारे च मते भरी लोक रेंदे थे, कने उना फिरी परमेश्वरे दे कने इक दुज्जे दे खिलाफ च पाप किता। क्योंकि सै सारे इक ही भाषा बोलदे थे, इस तांई सै सारे गिठे होए कने संसारे जो भरी देणे दे परमेश्वरे दे हुकमे दे बजाए इक शेहरे जो बणाणा लग्गी पे।

सै बड़े घमंडी थे, कने जदेई जिन्दगी जिणे दा हुकम परमेश्वरे दितया था, उस तरीके दी जिन्दगी सै जीणा नी चांदे थे। एथू दीकर कि उना इक ऐसी मीनार जो बणाणा शुरू करी दिता जड़ी स्वर्गे दीकर पुजणी। परमेश्वरे दिखया कि अगर सै सोगी मिली करी बुराई करदे रेंगे, तां सै बड़े पापी कमा जो करी सकदे न।

इस तांई परमेश्वरे उना दिया भाषा जो मतियां लग-लग भाषा च बदली दिता कने उना लोकां जो सारे संसारे च फैलाई दिता। जिस नगरे जो उना बणाणा शुरू कितया था सै बाबेल है, जिदा मतलब है "गड़बड़ी"।

केई सौ सालां बाद, परमेश्वरे अब्राम नाऐ दे इक माणुऐ ने गल्ल किती। परमेश्वरे उसयो बोलया, "अपणे देशे कने परिवारे जो छडी करी उस देशे जो चली जा जड़ा मैं तीजो दसगा। मैं तीजो आशीष देणी कने तीजो ला इक बड़ी बडी जाति बणाणी। मैं तेरा ना महान करणा। जड़ा तीजो आशीष दे मैं उसयो आशीष देणी, कने जड़ा तीजो श्राप दे उसयो मैं श्राप देणा। तेरिया बजा ला संसारे दे सारे कुलां जो आशीष मिलणी।"

कने अब्रामे परमेश्वरे दी गल्ल मन्नी। उनी अपणे सारे सेवकां कने अपणी सारिया सम्पत्तिया समेत अपणिया घरे बालिया सारै जो सोगी लिया कने कनान देश जो चली गिया जड़ा परमेश्वरे उसयो दसया था।

जालू अब्राम कनान देशे च पुज्जा तां परमेश्वरे उसयो बोलया, "अपणे चारो पासे दिख। मैं तीजो ऐ सारा देश देणा कने तेरे वंशजा हमेशा तांई इस पर अधिकार रखणा।" तालू अब्राम उस देशे च बसी गिया।

मलिकिसिदक नऐ दा इक आदमी था जड़ा परमेश्वरे दा महायाजक था। इक दिन जालू अब्राम लड़ाई करणे बाद ओआ दा था तां सै कने अब्राम मिले। मलिकिसिके अब्राम जो आशीष दिती कने बोलया, “ परमेश्वर जड़ा स्वर्ग कने धरती दा स्वामी है सै तीजो आशीष दे।" फिरी अब्रामे लड़ाईया च जितियां सारियां चीजां दा दसमा हिस्सा मलिकिसिदके जो दिता।

केई साल बीती गे, पर हल्ले भी अब्राम कने सारा दा कोई पुत्र नी था। परमेश्वरे अब्रामे सोगी गल्ल किती कने फिरी सै बायदा किता कि तीजो इक पुत्र पैदा होणा कने जियां अम्बरे च तारे न, तियां ही उदे बड़े भरी वंशज होणे। अब्रामे परमेश्वरे दे बायदे पर भरोसा किता। परमेश्वरे घोषणा किती कि अब्राम इक धर्मी था क्योंकि उनी परमेश्वरे दे बेड़े पर भरोसा कितया था।

तालू परमेश्वरे अब्राम सोगी इक बादा किता। आम तौर पर, इक बादा दो दलां दे बीच इक दुज्जे तांई कम्मा जो करणे दा इक समझौता होंदा है। परमेश्वरे अब्राम ने सै बायदा तालू किता था जालू अब्राम सो दा था, पर सै तालू भी परमेश्वरे जो सुणी सकदा था। परमेश्वरे बोलया, "मैं तेरे शरीरे ला पैदा करीरी तीजो तेरा इक निज पुत्र देणा। मैं तेरे वंशजा जो ऐ कनान देश दिंदा हूँ।" पर हले भी अब्राम दे कोई पुत्र नी था।