5. बायदे दा पुत्र

अब्राम कने सारै दे कनान पुजणे दे दस साल बाद, हल्ले दीकर भी उना दी कोई ओलाद नी थी। इस तांई, अब्राम दी घरे बालिया सारै उसयो बोलया, "क्योंकि परमेश्वरे हले दीकर मिंजो ओलाद जमणे दे जोगा नी कितया है कने हुण मैं संतान जमणे तांई बड़ी बुडी है, दिख, मेरी दासी हाजिरा एथू है। उसा वियाह करी ले ताकि सै मेरे तांई इक ओलाद पैदा करी सके।"

अब्रामे हाजिरा ला वियाह करी लिया। हाजिरा दा इक पुत्र पैदा होया, कने अब्रामे उसदा ना इश्माएल रखया। पर सारै हाजिरा ला जलना लगी पेई। जालू इश्माएल तेरां सालां दा था, तालू परमेश्वरे फिरी अब्रामे ने गल्ल किती।

परमेश्वरे बोलया, "मैं सर्व-शक्तिमान परमेश्वर है। मैं तेरे सोगी इक बायदा करणा।" तालू अब्रामे धरती पर पेई करी दंडवत किता। परमेश्वरे अब्राम ने ऐ भी बोलया, "तू मतियां जातियों दा पिता होणा। मैं तीजो कने तेरे वंशजा जो उना दी अपणी जमीन होणे तांई कनान देश देणा कने मैं हमेशा तांई उना दा परमेश्वर होणा। तीजो अपणे घराने दे हर मरदे दा खतना करणा पोणा है।"

तेरिया घरे बालिया सारै इक पुत्र जमणा – सै बायदे दा पुत्र होणा। उदा ना इसहाक रखयां। मैं उदे सागी भी अपणा ऐ बायदा रखणा कने सै इक बडी जाति बणी जाणी। मैं इश्माएल जो भी इक बडी जाति बणाणा, पर मेरी वाचा इसहाक सोगी रेणी। तालू परमेश्वरे अब्राम दा ना बदलीकरी अब्राहम रखी दिता, जिदा मतलब है "मतयां दा पिता"। परमेश्वरे सारै दा ना भी बदलीकरी सारा करी दिता, जिदा मतलब है "मूलमाता"।

उस दिन अब्राहमे अपणे घराने दे सारे मर्दां दा खतना किता। लगभग इक साल बाद, जालू अब्राहम 100 सालां दा था कने सारा 90 सालां दी थी, तालू सारा अब्राहमे दे पुत्रे जो जन्म दिता। जदिया परमेश्वरे उना जो बोलया था उना उदा ना इसहाक रखया।

जालू इसहाक जवान होया तां परमेश्वरे ऐ बोली करी अब्राहम दे भरोसे दी परख लेई कि, "अपणे इकलौते पुत्रे दी मेरे तांई बलि देई दे।" फिरी अब्राहमे परमेश्वरे दी गल्ल मन्नी कने अपणे पुत्रे जो बलि करणे तांई तैयार किता।

जालू अब्राहम कने इसहाक बलि चढ़ाणे तांई जाणा लग्गे तां इसहाके पूछया, "हे पिता, साड़े बाल बलि तांई लकड़ियां तां हेन, पर बलि करणे तांई मेमना कुथू है?" अब्राहमे जवाब दिता, "हे मेरे पुत्र, परमेश्वरे बलि करणे तांई मेमने दा इंतजाम करणा।"

जालू सै बलि चढ़ाणे दिया जगा पर पुज्जी गे, तां अब्राहमे इसहाक जो बन्नी कर वेदी पर लिटाई दिता। सै अपणे पुत्रे जो मारणे ही बाला था कि परमेश्वरे बोलया, "रुकी जा! बच्चे जो कुछ मत करदा! हुण मिंजो पता लगी गिया है कि तू मेरा डर मनदा है क्योंकि तू अपणे इकलौते पुत्रे जो भी मिंजो ला बचाई करी नी रखया है।"

बखे ही अब्राहमे इक भेडूऐ जो दिखया जड़ा झिलां च फसया था। इसहाक दे बदले च बलि तांई परमेश्वरे भेडूऐ दा इंतजाम कितया था। अब्राहमे खुशिया-खुशिया ने भेडूऐ दी बलि दिती।

तालू परमेश्वरे अब्राहम जो बोलया, "क्योंकि तू मेरे तांई सब कुछ देणे तांई तेयार था, एथू दीकर कि अपणे इकलौते पुत्रे दी बलि देणे जो भी तेयार था, इस तांई मैं तीजो आशीष देणे दा बायदा करदा है। तेरे वंशज अम्बरे दे तारयां ला भी जादा होणे न। क्योंकि तू मेरे हुकमा जो मनया है इस तांई मैं तेरे परिवार दे जरिये संसारे दे सारे कुलां जो आशीष देंणी।"