6. परमेश्वर इसहाक तांई इंतजाम करदा है

जालू अब्राहम बड़ा बुडा होई गिया था तालू उदा पुत्र, इसहाक, जवान होई गिया था। इस तांई अब्राहमे अपणे इक सेवके जो अपणे पुत्र इसहाके तांई उस देशे ला इक लाड़ी लाणे तांई भेजया जिथू अब्राहमे दे रिश्तेदार रेंदे थे।

उस देशे च जाणे दी इक बड़ी लंबी यात्रा बाद परमेश्वरे उस सेवके जो रिबका ने मिलबाया। ऐ अब्राहमे दे भाईऐ दी पोतरी थी।

रिबका अपणे परिवारे जो छडी करी उस सेबके सोगी ओणे तांई मन्नी गेई। जियां ही सै पुज्जे इसहाके उसा ने विवाह करी लिया।

इक लंबे बकत दे बाद, अब्राहम मरी गिया। तालू परमेश्वरे अब्राहम दे पुत्र इसहाके जो, अब्राहम सोगी कितियो बायदे दिया वजा ला आशीष दिती। उस बायदे च परमेश्वरे बोलया था कि अब्राहम दे अणगिणत वंशज होंणे। पर इसहाक दिया घरे बालिया रिबका दी कोई ओलाद नी होई।

इसहाके रिबका तांई प्रार्थना किती, कने परमेश्वरे उसयो जुड़वा बच्चयां दा गर्भ धारण करणे दे काबिल किता। जिस बकत सै बच्चे रिबका दे गर्भ च ही थे सै अप्पू चे लड़ना लग्गी पे, इस तांई जड़ा कुछ होआ दा था रिबका सै परमेश्वरे जो दस्सी दिता।

परमेश्वरे रिबका जो बोलया, "तू दो पुत्रां जो जन्म देणा। उना दे वंशजा दो लग-लग जातियां बणना। उना इक दुज्जे ला लड़ना। पर बड़े पुत्रे ला पैदा होणे वालिया जातिया जो छोटे पुत्रे ला होणे बालिया जातिया दी आज्ञा मनणी पोणी।"

जालू रिबका दे बच्चयां दा जन्म होया, तां बडा पुत्र लाल कने रोएँदार था, कने उना उदा ना ऐसाव रखया। तालू छोटा पुत्र एसाव दिया खुरिया जो पकड़ी करी पैदा होया, कने उना उदा ना याकूब रखया।