7. परमेश्वर याकूब जो आशीष दिंदा है

जालू सै बच्चे बडे होए तां याकूब जो घरे रेणा खरा लगदा था, पर एसाव जो जानवरां दा शिकार करणा खरा लगदा। रिबका याकूब सोगी प्यार रखदी थी, पर इसहाक एसाव सोगी प्यार भाब रखदा था।

इक दिन, जालू एसाव शिकार करीरी वापस आया तां सै बड़ा भूखा था। एसावे याकूब ने बोलया, "जड़ा तू बणाया है उदे चे थोड़ा खाणा मिंजो दे।" याकूबे जवाब दिता, "पेहले मिंजो ला ऐ बायदा कर कि जेठा होणे दिया बजा ला हर इक चीज जड़ी तीजो मिलणी चाइदी, सै तू मिंजो दिंगा।" एसावे उना सारियां चीजां जो याकूब जो देणे दा बायदा करी दिता। तालू याकूबे उसयो कुछ खाणा दिता।

इसहाक एसाव जो आशीष देणा चांदा था। पर इसला पेहले कि उनी ऐसा किता, रिबका कने याकूबे एसाव होणे दा ढोंग कररी उदे सोगी धोखा किता। इसहाक बुडा था कने उसयो मिलदा नी था। याकूबे एसावे दे कपड़े पाए कने बकरिया दिया खली जो अपणे गले कने हथां पर लपेटी लिया।

याकूब इसहाके बाल आया कने बोलया, "मैं एसाव है। मैं इस तांई आया है कि तू मिंजो आशीष दे।" जालू इसहाके बकरिया दे बालां जो मेहसूस किता कने कपड़यां जो सूँघया, तां उनी सोचया कि सै एसाव है कने उसयो आशीष दिती।

एसावे याकूब ला जलन किती क्योंकि याकूबे उदा पेहला पुत्र होणे दा अधिकार कने सोगी ही उदियां आशीषां जो भी चोरी लिया था। एसावे अपणे पिता दे मरणे बाद याकूबे जो मारी देणे दी योजना बणाई।

पर रिबका एसाव दी योजना जो सुणी लिया। इस तांई उनी कने इसहाके याकूब जो उदे रिश्तेदारां सोगी रेणे तांई बड़ी दूर भेजी दिता।

याकूब केई सालां दीकर रिबका दे रिश्तेदारां सोगी रिया। ओथु उनी वियाह किता कने उदे बारह पुत्र कने इक पुत्री होई। परमेश्वरे उसयो बड़ा धनी बणाई दिता।

बी सालां दीकर कनान च अपणे घरे ला दूर रेणे बाद, याकूब अपणे परिवारे, अपणे सेवकां, कने अपणे जानवरां दे सारे झुंडा सोगी वापस आया।

याकूब बड़ा डरया था क्योंकि उनी सोचया कि एसाव हुण भी उसयो मारी देणा चांदा था। इस तांई उनी एसाव जो खुश करणे तांई तौफे दे तौर पर जानवरां दे झुंडा जो ऐसाव बाल भेजया। जड़े सेवक उना झुंडा जो लेई करी गे थे उना बोलया, "तेरे दास याकूबे, ऐ जानवर तीजो दिते न। सै जल्दी ही ओआ दा है।"

पर एसाव हुण याकूबे जो नी मारणा चांदा था। बल्कि सै उसयो इक बरी फिरी दिखी करी बड़ा खुश था। उदे बाद याकूब कनान च शान्तिया ने रिया। फिरी इसहाक मरी गिया कने याकूब कने एसावे उसयो दफनाया। बायदे दियां गल्लां जड़ियां परमेश्वरे अब्राहम ने कितियां थियां, सै हुण इसहाक ला याकूब पर आई गियां थियां।