8. परमेश्वर यूसुफ कने उदे परिवारे जो बचाया
केई साल कनान देशे च रेणे बाद, जालू याकूब बुडा होई गिया था, तां उनी अपणे प्यारे पुत्र यूसुफे जो उदे भाइयां दा हाल चाल पता करणे तांई भेजया जड़ा जानवरां दे झुंडा दी रखबाली करा दे थे।
यूसुफ दे भाई उसला जलन करदे थे, क्योंकि उना दा पिता उना ला जादा प्यार यूसुफे जो करदा था कने इस तांई भी जलन करदे थे कि यूसुफे सुपना दिखया था कि उनी उना पर शासन करणा। जालू यूसुफ अपणे भाइयां बाल आया तां उना उसयो बंधक बणाई लिया कने उसयो गुलाम बंदयां दा व्यापार करणे वालयां जो बेची दिता।
जालू यूसुफे दे भाई घरे जो बापस मुड़ना लगे तां उना यूसुफे दे कपड़यां जो फाड़ी करी बकरिया दा खून लाई दिता। फिरी उना सै कपड़े अपणे पिता जो दस्से ताकि सै ऐ सोचे कि कुनी जंगली जानवरे यूसुफे जो मारी दितया है। याकूब ऐ दिखी करी बड़ा उदास होया।
गुलाम बंदयां दा व्यापार करणे बाले लोक यूसुफे जो मिस्र च लेई गे। नील नदिया दे किनारे पर बसया होया मिस्र इक बड़ा बडा कने शक्तिशाली देश था। उना गुलाम बंदयां दा व्यापार करणे वालयां यूसुफे जो इक अमीर सरकारी अधिकारी जो बेची दिता। यूसुफे अपणे मालिके दी खरी सेवा किती, कने परमेश्वरे यूसुफे जो आशीष दिती।
उदे मालिके दिया घरे बालिया यूसुफे सोगी सोणे दी कोशिश किती, पर यूसुफे ऐ सब करणे तांई मना करी दिता, क्योंकि ऐ परमेश्वरे दिया नजरा च पाप था। सै गुस्सा होई गेई कने यूसुफे पर झूठा आरोप लाई दिता, इस तांई उसयो गिरफ्तार करीरी जेलखाने च पाई दिता। यूसुफ जेला च भी सच्चा कने परमेश्वरे तांई बफादार रिया, परमेश्वरे उसयो आशीष दिति।
दो सालां बाद, यूसुफ हले भी जेला च था, भले ही सै निर्दोष था। इक राती,मिस्र दे राजे, जिसयो मिस्र दे लोक फिरौन बोलदे न, उनी दो सुपने दिखे जिना उसयो बड़ा हेरान करी दिता। उदा कोई भी सलाहकार उसयो उना सुपनया दा मतलब नी दस्सी सकया।
परमेश्वरे यूसुफे जो सुपनया दा मतलब दसणे दी शक्ति दिती, इस तांई फिरौने यूसुफे जो जेला ला अपणे बाल सदया। यूसुफे उसयो उना सुपनया दा मतलब दसया कने बोलया, "परमेश्वरे अगले सत सालां दीकर भरपूर फसल देणी है फिरी उदे सत साल दीकर अकाल पोणा है।"
फिरौन यूसुफ ला इतना खुश होया कि उनी उसयो मिस्र दा दुज्जा सारयां शक्तिशाली मर्द नियुक्त करी दिता।
यूसुफे लोकां ला खरियां फसला वाले सत सालां च बड़ी जादा अनाज गठेरणे तांई बोलया। जालू सतां सालां दा अकाल आया तालू यूसुफे लोकां जो सै अनाज बेचया ताकि उना बाल खाणे तांई अनाज पूरा हो।
सै अकाल सिर्फ मिस्र च ही नी, पर कनान देशे च भी था, जिथू याकूब कने उदा परिवार रेंदा था।
इस तांई याकूबे अपणे सारयां ला बडे पुत्रां जो अनाज खरीदणे तांई मिस्र जो भेजया। जालू सै अनाज खरीदणे तांई यूसुफे सामणे आये, तां उना भाइयां यूसुफे जो नी पछेणया। पर यूसुफे उना जो पछेणी लिया।
ऐ पता करणे तांई कि क्या सै बदली गियो न, उना दी जाँच करणे बाद, यूसुफे उना ने बोलया, "मैं तुहाड़ा भाई यूसुफ है! डरा मत। जालू तुसां मिंजो गुलाम दे रूपे च बेचया था, तां तुसां बुरा करणे दी सोची थी, पर परमेश्वरे उस बुराई जो भलाई तांई इस्तेमाल किता! ओआ कने मिस्र च रिया ताकि मैं तुहांजो कने तुहाड़े परिवारां तांई अनाज दा प्रबंध करी सकें।"
जालू यूसुफे दे भाई घरे मुड़ी करी आये कने अपणे पिता याकूबे जो दसया कि यूसुफ हले भी जिन्दा है, तां सै बड़ा खुश होया था।
याकूब इक बुडा माणु था तमी सै अपणे पूरे परिवारे सोगी मिस्र जो चली गिया, कने सै ओथु बसी गे। याकूब दे मरणे ला पेहले, उनी अपणे सारे पुत्रां जो आशीषित किता।
बायदे दियां ऐ गल्लां जड़ियां परमेश्वरे अब्राहम सोगी कितियां थियां, सै इसहाक पर कने उदे बाद याकूब, कने उदे बाद उदे बारह पुत्रां कने उना दे परिवारां पर आई गियां थियां। उना बारह पुत्रां दे वंशज इस्राएल दे बारह गोत्र बणी गे।
उत्पत्ति अध्याय 37-50 ला इक बाइबल दी कहाणी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।