9. परमेश्वरे मूसा जो सदया
यूसुफ दे मरणे बाद उदे सारे रिश्तेदार मिस्र च बसी गे। सै कने उदे वंशज केई सालां दीकर मिस्र च ही रे कने उना मतियां ओलादी पैदा कितियां। उना जो इस्राएली बोलया।
केई सौ सालां बाद, इस्राएलियां दी आबादी मती बदी गेई थी। कने मिस्री लोक हुण इसा गल्ला जो भूली गियो थे कि यूसुफे उना दी सहायता करणे तांई बड़ा कुछ कितया था। सै इस्राएलियां ला डरी गे क्योंकि सै आबादी च उना ला बड़े जादा थे। इस तांई उस बकत मिस्र पर शासन करणे वाले फिरौने इस्राएलियां जो मिस्रियां दा गुलाम बणाई दिता।
मिस्री लोकां इस्राएलियां पर बड़ा ह्त्याचार किता कने हर तरा दे कम्म कराए, उना मिस्रियां ला मते घर कने केई शेहर बणवाए। उना ला दिन रात मेहनत कराई जिस ने उना दी जिन्दगी बड़ी दुखी होई गेई, पर परमेश्वरे उना जो आशीष दिती कने उना दे होर जादा बच्चे पैदा होए।
फिरौने दिखया कि इस्राएलियां दे बड़े बच्चे पैदा होआ दे न, इस तांई उनी अपणे लोकां जो इस्राएलियां दे सारे नर बच्चयां जो नील नदी च फेंकी करी मारी देणे दा हुकम दिता।
इक इस्राएली जनानिया इक जागते जो जन्म दिता। उना कने उसा दे घरे बाले जितणा होई सकया मिस्रियां ला उस बच्चे जो लुकाई करी रखया।
जालू उस बच्चे दे माता-पिता उसयो होर जादा नी लुकाई सके, तां उसयो मरणे ला बचाणे तांई इक टोकरिया च पाई करी नील नदिया दे कनारे सरकंडयां बीच रखी दिता। उस जागते दी बड्डी बेहण दूर खड़ोई करी दिखा दी थी कि उस बच्चे सोगी क्या होंगा।
जालू फिरौने दी कुड़ी नील नदिया च नोहणे तांई आई, तां उसा दी नजर उस टोकरिया च पेई कने उसा दे अंदर दिखया। जालू उना इक उसा टोकरिया अंदर बच्चे जो दिखया तां उना उसयो अपणे बच्चे दे रूपे च गोद लेई लिया। उना इक इस्राएली जनानिया जो उसयो दूध पियाणे तांई कम्मे पर रखी लिया, बिना ऐ जाणयो कि सै उस बच्चे दी असली मा थी। जालू सै बच्चा इतणा बडा होई गिया कि हुण उसयो अपणिया माऊ दे दुधे दी जरूरत नी थी, तां उना फिरौने दिया कुड़िया बाल उसयो बापस करी दिता, उदा ना मूसा था।
एक दिन, जालू मूसा जवान होई गिया, तां उनी दिखया कि इक मिस्री इक इस्राएली जो मारा दा है। मूसे अपणे साथी इस्राएली जो बचाणे दी कोशीश किती।
जालू मूसा दिखया कि उसयो कोई नी दिखा दा तां उनी उस मिस्री माणुऐ जो मारी दिता कने उदिया लाशा जो दफन करी दिता। पर मूसा जड़ा कितया था उसयो कुनी दिखी लिया था।
फिरौने जो पता लगी गिया कि मूसा क्या कितया है। उनी उसयो मारी देणे दी कोशिश किती, पर मूसा मिस्र ला जंगले च नठी गिया। फिरौन दे सैनिक उसयो ओथु तोपी नी सके।
मिस्र ला दूर बणे च मूसा इक गवाल बणी गिया था। उनी ओथु इकी कुड़िया ने वियाह करी लिया कने उदे दो पुत्र होए।
मूसा अपणे सोरे दियां भेडां दी रखबाली करदा था। इक दिन, उनी इक झाड़ी दिखी जिसा च अग्ग लगियो थी कने सै बिना भस्म होयो बला दी थी। उसा जो दिखणे तांई सै उसा झाड़िया बाल गिया। जालू सै उसा दे बखे पुज्जा, तां परमेश्वरे उसने गल्ल किती। परमेश्वरे बोलया, "हे मूसा, अपणे जूतयां जो उतारी दे। तू इक पवित्र जगा पर खुड़ोतया है।"
परमेश्वरे बोलया, "मैं अपणे लोकां दे दुखां जो दिखया है। मैं तीजो फिरौन बाल भेजणा ताकि तू इस्राएलियां जो मिस्र दिया गुलामिया ला निकाली लेई ओंऐ। मैं उना जो कनान देश देणा, सै देश जिदा मैं अब्राहम, इसहाक कने याकूब ने बायदा कितया है।"
मूसा पूछया, "अगर लोकां ऐ पुछया कि मिंजो कुनी भेजया है तां मैं क्या बोलणा?" परमेश्वरे बोलया, "जड़ा मैं है सै मैं है। उना जो बोलयां, 'मैं तीजो तुहाड़े बाल भेजया है।' उना ने ऐ भी बोलयां, 'मैं तुहाड़े पूर्वजां अब्राहम, इसहाक कने याकूब दा परमेश्वर है।' मेरा ऐ ना हमेशा दा है।"
मूसा डरदा था कने फिरौने बाल जाणा नी चांदा था क्योंकि सै सोचा दा था कि उनी डंगे ने नी बोली सकणा, इस तांई परमेश्वरे मूसा दे भाई हारून जो उदी सहायता करणे तांई भेजया।
निर्गमन अध्याय 1-4 ला इक बाइबल दी कहाणी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।