10. दस मुशकिलां

परमेश्वरे मूसा कने हारून जो चेतावनी दिती कि फिरौने जिदी होई जाणा। जालू सै फिरौन बाल गे तां उना बोलया, "इस्राएल दा परमेश्वर इयां बोलदा है, 'मेरे लोकां जो जाणा दे!'" पर फिरौने उना दी नी सुणी कने इस्राएलियां जो जाणे तांई अजाद करणे दे बजाए उनी उना पर होर जादा ह्त्याचार कने मेहनत कराणा शुरू करी दिता।

फिरौन उना लोकां जो जाणे तांई लगातार मना करदा रिया, इस तांई परमेश्वरे मिस्र पर दस भयंकर मुशकिलां भेजियां। इना मुशकिलां दे जरिये, परमेश्वरे फिरौन जो दसया कि सै फिरौन कने मिस्र दे देवतयां ला जादा शक्तिशाली है।

परमेश्वरे नील नदिया दे पाणिऐ जो खूने च बदली दिता, पर फिरौने हले भी इस्राएलियां जो जाणा नी दिता।

परमेश्वरे सारे मिस्र च मेंढक भेजे। फिरौने मेढकां जो नठाणे तांई मूसा ला बिनती किती। पर सारे मेंढकां दे मरी जाणे बाद, फिरौने अपणे मने जो फिरी बदली लिया कने इस्राएलियां जो मिस्र ला नी जाणा दिता।

इस तांई परमेश्वरे माखियां दी मुशकिल भेजी। उदे बाद उनी डाँसां दी मुशकिल भेजी। फिरौने मूसा कने हारून जो सदया कने उनी बोलया कि अगर सै इना मुशकिलां जो रोकी दिंगे, तां इस्राएली मिस्र जो छडी करी जाई सकदे न। जालू मूसा प्रार्थना किती तां परमेश्वरे मिस्र पर डाँसां जो हटाई दिता। पर फिरौने अपणा मन फिरी बदली लिया कने उना लोकां जो अजाद होकरी जाणा नी दिता।

इदे बाद, परमेश्वरे मिस्रियां दे सारे पालयो डंगरा जो बीमार करी दिता कने मरी जाणा दिता। पर फिरौने हले दीकर भी अपणा मन नी बदलया कने उनी इस्राएलियां जो जाणा नी दिता।

तालू परमेश्वरे मूसा जो फिरौने सामणे होआ च राख फेंकणे तांई बोलया। जालू उनी इयां किता तां मिस्र दे लोकां दिया चमड़िया पर फोड़े निकली पे, उना फोड़यां च बड़ी भरी पीड़ होंदी थी, पर इस्राएलियां जो कुछ नी होया। परमेश्वरे फिरौने दे मने जो हठी करी दिता, कने फिरौने इस्राएलियां जो अजाद होई करी जाणा नी दिता।

इदे बाद, परमेश्वरे ओले सुटे कने मिस्र दियां लगभग सारियां फसलां जो बरबाद करी दिता कने जड़ा कोई भी बाहर निकलया सै ओलया ने मरी मरी गिया। फिरौने मूसा कने हारून जो सदया कने उना बोलया, "मैं पाप कितया है। तुसां लोक जाई सकदे न।" मूसा प्रार्थना किती, कने अम्बरे ला ओले पोणा रुकी गे।

पर फिरौने फिरी ला पाप किता कने अपणे मने जो जिदी करी लिया। उनी इस्राएलियां जो अजाद होई करी जाणा नी दिता।

परमेश्वरे मिस्र पर टिड्डियां जो ओणा दिता। इना टिड्डियां उना दियां सारियां फसलां जो खाई लिया जड़ियां ओलयां ला बची गियां थियां।

फिरी परमेश्वरे नेहरा करी दिता जड़ा तीन दिना दीकर रिया। ऐ इतणा घोर था कि मिस्री लोक अपणे घरां ला नी निकली सके। पर जिथू इस्राएली लोक रेंदे थे, ओथु लौ थी।

इना नौ मुशकिलां बाद भी, फिरौने इस्राएलियां जो आजाद होई करी जाणे ला मना करी दिता। क्योंकि फिरौने नी सुणया था, इस तांई परमेश्वरे इक होर मुशकिला जो भेजणे दी योजना बणाई। इना फिरौने दे मने जो बदली देणा।