11. फसह

परमेश्वरे मूसा कने हारून जो फिरौने बाल ऐ बोलणे तांई भेजया कि इस्राएलियां जो जाणा दे। उना उसयो चेतावनी दिती कि सै अगर उना जो जाणा नी दिंगा, तां परमेश्वरे मिस्र दे लोकां दे कने जानवरां दे सारे पेहले बच्यां जो मारी देणा। फिरौने ऐ सुणी करी भी परमेश्वरे पर भरोसा करणे ला कने उदियां गल्लां मनणे ला मना करी दिता।

परमेश्वरे पर जीना लोकां भरोसा किता उना दे जेठे पुत्रे जो बचाणे तांई परमेश्वरे इक उपाय दसया। उपाय ऐ था की हर परिवारे जो इक निर्दोष मेमना लेई करी उदी बलि देणी थी।

परमेश्वरे इस्राएलियां जो उस मेमने दे खूने जो अपणे घरां दे दरबाजे पर लाणे तांई बोलया। कने उना जो मेमने दे मासे जो भूनी करी कने फिरी उस मासे जो अखमीरी रोटिया सोगी फुर्तिया ने खाणे जो बोलया था। परमेश्वरे उना जो उस खाणे जो खाणे बाद, तालू ही मिस्र जो छडणे तांई भी तैयार रेणे जो बोलया।

जियां करणे तांई परमेश्वरे इस्राएलियां जो बोलया था, उना तियां सारा कुछ किता। अधिया राती, परमेश्वर हर एक जेठे पुत्रे जो मारणे तांई मिस्र च आया।

इस्राएलियां दे हर एक घरे दे दरबाजे पर खून लगया था, इस तांई परमेश्वरे उना घरां जो छडी दिता। उना घरां दे सारे लोक खरे थे। सै मेमने दे खूने दिया बजा ला बची गियो थे।

पर मिस्रियां परमेश्वरे पर भरोसा नी कितया था कने उदे हुकमा जो नी मनया था। इस तांई परमेश्वरे उना दे घरां जो नी छडया था। परमेश्वरे मिस्रियां दे हर इकी दे जेठे पुत्रां जो मारी दिता।

जेला दे कैदियां दे जेठे पुत्रे ला लेईकरी, फिरौने दे जेठे दीकर, हर इकी जो मरी दिता। इस इतने बडे दुखे दिया बजा ला मिस्र दे मते लोक रोआ दे थे कने दुख मना दे थे।

उसा ही राती, फिरौने मूसा कने हारून जो सदया कने बोलया, "इस्राएलियां जो लेइकरी झट ही मिस्र ला निकली जा!" मिस्र दे लोकां भी इस्राएलियां ला निकली जाणे दी बिनती किती।