12. निर्गमन

इस्राएली लोक मिस्र ला निकली करी बड़े खुश थे। सै हुण गुलाम नी थे, कने सै हुण बायदे दे देशे जो चलयो थे! जड़ा कुछ भी इस्राएलियां मंगया, मिस्रियां उना जो सै सब कुछ दिता, एथू दीकर की सोना चाँदी कने होर कीमती चीजां भी। दुज्जे देशां दे कुछ लोकां परमेश्वरे पर भरोसा किता कने जालू इस्राएली लोक मिस्र ला निकले तां सै भी उना सोगी चली पे।

दिन दे बकत बदले दा इक बड़ा बडा खम्भा उना दे अग्गे-अग्गे चलदा था। कने राती दे बकत ऐ अग्ग दा खम्भा बणी जांदा था। परमेश्वर उस बदले दे खम्भे च कने अग्गी दे खम्भे च, हमेशा उना सोगी था कने उनी यात्रा करदे बकत उना दी अगुवाई किती। उना जो सिर्फ उदे पीछे चलणे दा कम्म करणा था।

थोड़े बकत बाद, फिरौन कने उदे लोकां अपणा मन बदली दिता। हुण सै इस्राएलियां जो फिरी ला अपणा गुलाम बणाणा चांदे थे। इस तांई उना इस्राएलियां दा पीछा किता। ऐ परमेश्वर ही था जिनी उना दे मना जो बदली दितया था। उनी ऐसा इस तांई किता क्योंकि सै चांदा था कि हर कोई ऐ जाणी ले कि फिरौन ला कने मिस्रियां दे सारे देवतयां ला सै, यहोवा, बड़ा जादा शक्तिशाली है।

जालू इस्राएलियां मिस्र दिया सेना जो ओंदे दिखया तां उना जो पता लग्गा कि सै फिरौन दी सेना कने लाल समुंद्रे बीच फसी गियो न। सै बड़े डरी गे कने रोणा लग्गे, "असां मिस्र जो कजो छडया? असां मरणे वाले न!"

मूसे इस्राएलियां जो बोलया, "डरना बंद करा! परमेश्वरे अज तुहाड़े तांई लड़णा कने तुहांजो बचाणा।" तालू परमेश्वरे मूसा जो बोलया, "इना लोकां जो लाल समुंद्रे पासे अगे बदणे तांई बोल।"

तालू परमेश्वरे उस बदले दे खम्भे जो इस्राएलियां कने मिस्रियां बीच रखी दिता ताकि मिस्री लोक इस्राएलियां जो दिखी ना सकन।

परमेश्वरे मूसा जो समुंद्रे पर अपणा हथ अग्गे करणे तांई बोलया। फिरी परमेश्वरे हवा ने समुंद्रे दे पाणिऐ जो सजे कने खबे पासे करी दिता, जिसला समुंद्रे चे होइकरी इक रस्ता बणी गिया।

इस्राएली लोक अपणे दोनों पासे पाणिऐ दियां दिबारां सोगी सुकिया धरतिया पर समुंद्रे ला होइकरी अग्गे बदणा लगी पे।

तालू परमेश्वरे उस रस्ते ला बदले जो चुकी लिया ताकि मिस्री लोक इस्राएलियां जो बची करी जांदे दीखन। मिस्रियां उना जो पकड़णे तांई उना दा पीछा करणे दा फेसला किता।

उना समुंद्रे दे उस रस्ते पर इस्राएलियां दा पीछा किता, पर परमेश्वरे मिस्रियां जो डराई दिता कने उना दे रथां जो फसाई दिता। सै चिल्लाणा लग्गे, "नठा! इस्राएलियां दिया तरफा ला परमेश्वर लड़ा दा है!"

सारे इस्राएली समुंद्रे दे दुज्जे पासे पुज्जी गे। तालू परमेश्वरे मूसा जो बोलया कि सै दुबारा ला पाणिऐ पासे हथ अग्गे करे। जालू मुसा इयां किता, तां सै रस्ता बंद होई गिया कने समुंद्र पेहले सांई होई गिया। सारी मिस्री सेना डूबी गेई।

जालू इस्राएलियां दिखया कि मिस्री मरी गे, तां उना परमेश्वरे पर भरोसा किता। उना भरोसा किता कि मूसा परमेश्वरे दा संदेश देणे बाला था।

इस्राएली लोक इस तांई भी बड़े खुश थे क्योंकि परमेश्वरे उना जो मरणे ला कने गुलाम होणे ला बचाया था। हुण सै परमेश्वरे दी आराधना करणे कने उदे हुकमा जो मनणे तांई आजाद थे। इस्राएलियां अपणिया अजादिया दा तेयोहार मनाणे तांई कने परमेश्वरे दी प्रशंसा करणे तांई केई गीत गाए, क्योंकि उनी उना जो मिस्रियां दिया सेना ला बचाया था।

परमेश्वरे इस्राएलियां जो हर साल इक त्यौहार मनाणे दा हुकम दिता ऐ याद कराणे तांई कि कियां परमेश्वरे मिस्रियां जो हराया कने उना जो गुलाम होणे ला आजाद किता। इसयो फसह दा त्यौहार बोलया। इस त्यौहारे बाले दिने उना जो इक खरे मेमने दी बलि देणी थी, उसयो भूनी करी, कने उसयो बिना खमीरे वालिया रोटिया सोगी खाणा था।