13. इस्राएली लोकां सोगी परमेश्वरे दा बायदा

इस्राएलियां जो लाल समुंद्रे पार लेई जाणे बाद, परमेश्वर उना जो बणे ला होई करी सीनै नाऐ दे पहाड़े पासे लेई गिया। ऐ सेई पहाड़ था जिथू मूसा अग्ग लगियो झाड़िया जो दिखया था। उना लोकां उस पहाड़े दे थले अपणे तम्बुआं जो लाया।

परमेश्वरे मूसा ने कने इस्राएले दे सारे लोकां ने बोलया, "तुहांजो हमेशा मेरियां गल्लां जो मनणा है कने जड़ा बायदा मैं तुहाड़े सोगी करदा है उसयो बणाई रखनयो। अगर तुसां ऐसा करदे न, तां तुहांजो मेरा कीमती इनाम, याजकां दा राज्य, कने तुसां इक पवित्र जाति बणना।"

इस्राएली लोकां तीन दिन दीकर अप्पू जो तैयार किता ताकि परमेश्वर उना बाल आई सके। तालू परमेश्वर सीनै पहाड़े दिया चोटी पर थले उतरया। जालू सै आया तां हिलण होया, बिजलियाँ चमकियां, धूँआ उठया, कने तुरहियां दा जोरदार अबाज होई। तालू मूसा अप्पू ऊपर पहाड़े पर गिया।

तालू परमेश्वरे लोकां सोगी इक बायदा किता कने उनी बोलया, "मैं तुहाड़ा परमेश्वर यहोवा है। मैं ही है जिनी तुहांजो मिस्र दिया गुलामिया ला छुड़ाया। कुसी होर देवता दी पूजा मत करदे।"

मूर्तियां मत बणादे कने उना दी पूजा मत करदे, क्योंकि मैं, यहोवा, तुहाड़ा एकलौता परमेश्वर है। कुसी बुरे कम्मे तांई मेरे नाऐ दा इस्तेमाल मत करदे। सब्त के दिने जो पवित्र मनणे तांई याद रखनयो। छे दिना च अपणे सारे कम्म करनयो, सतमा दिन तुहाड़े तांई अराम करणे कने मिंजो याद करणे दा दिन है।

अपणे माता कने पिता दा आदर करनयो। हत्या मत करदे। व्यभिचार मत करदे। चोरी मत करदे। अपणे पड़ोसी दिया घरे बालिया, उदे घरे जो, या उदे कुसी भी समाने जो लेणे दी इच्छा मत करदे।

तालू परमेश्वरे इना दस हुकमा जो पत्थरे दियां दो पटियां पर लिखी करी मूसा जो दिता। परमेश्वरे मनणे तांई लोकां जो होर भी मतियां व्यवस्थां दितियां। अगर उना इना व्यवस्थां दा पालन किता तां परमेश्वरे उना लोकां जो आशीष देणे कने उना दी सुरक्षा करणे दा बायदा किता। पर परमेश्वरे बोलया कि अगर उना व्यवस्था दा पालन नी किता तां उनी उना जो सजा देणी।

परमेश्वरे इस्राएलियां ला इक विशाल तंबू बणाणे तांई भी बोलया – जिसयो मिलाप बाला तंबू भी बोलदे। परमेश्वरे उना जो ठीक-ठीक दसया कि इस तंबू जो कियां बणाणा है, कने उदे अंदर कुना चीजां जो रखणा है। उनी उना जो उस तंबू जो दो कमरयां च बंडणे तांई इक बड़े बडे पर्दे जो बणाणे तांई भी बोलया। परमेश्वरे उस पर्दे दे पिच्छे वाले कमरे च ओणा कने ओथु रेणा। जिथू परमेश्वर था उस कमरे च जाणे दी अनुमति सिर्फ महायाजक जो थी।

उना लोकां जो उस मिलाप वाले तंबू दे सामणे इक बेदी जो बणाणी पोंणी। अगर कोई भी जड़ा परमेश्वरे हुकमा जो नी मंदा है कने पाप करदा है, तां सै उस वेदी पर इक जानवरे जो लेई करी ओऐ। तालू महायाजक उदी बलि दे कने वेदिया पर परमेश्वरे तांई बलिया जो फुके। परमेश्वरे बोलया कि उस जानवरे दे खूने उस माणुऐ दे पापों जो ढकी लेणा। इयां करीरी हुण परमेश्वरे उस पाप जो नी दिखणा। सै माणु परमेश्वरे दिया नजरा च "शुद्ध" होणा। परमेश्वरे मूसा दे भाई हारून जो कने हारून दे वंशजां जो अपणे याजक होणे तांई चुणया।

परमेश्वरे उना लोकां जो नियम दितयो थे, सै उना जो मनणे तांई राजी होए। सै सिर्फ परमेश्वर दे लोक होणे जो कने सिर्फ उदी आराधना करणे तांई राजी होऐ।

केई दिना दीकर, मूसा सीनै पहाड़े दिया चोटिया पर ही रिया। सै परमेश्वरे ला गल्लां करा दा था। पर लोक उदे बापिस मुड़ने दा इन्तजार करदे-करदे थकी गे। इस तांई सै हारून बाल सोना लेई करी आऐ कने उसयो इक मूर्ति बणाणे तांई बोलया ताकि सै परमेश्वर दे बदले उदी पूजा करी सकन। इयां करीरी उना बड़ा बडा परमेश्वर दे खिलाफ पाप किता।

हारूने बछड़े दी सोने दी इक मूर्ति बणाई। उना लोकां उस मूर्तिया दी पूजा करणा शुरू करी दिता कने उसयो बलि चढ़ाई! उना दे इस पाप दिया वजा ला परमेश्वर उना ला बड़ा गुस्सा होया था। सै उना जो खत्म करी देणा चांदा था। पर मूसा उना जो नी मारणे तांई परमेश्वरे ला प्राथना किती। परमेश्वरे उदी प्राथना जो सुणया कने उना जो खत्म नी किता।

मूसा सीनै पहाड़े ला थले उतरी आया। उनी सै दो पत्थरे दियां पटियां जो हथे पकड़या था, जिना पर परमेश्वरे दस हुकमा को लिखया था। फिरी उनी उसा मूर्तिया जो दिखया। सै इतना गुस्सा होया कि उनी उना पटियां जो तोड़ी दिता।

फिरी मूसा उसा मूर्तिया जो पि करी उसा दा बुरा बणाई दिता, उस बुरे जो पाणिऐ च मिलाई करी उना लोकां जो पियाई दिता। परमेश्वरे उना लोकां पर इक मुसीबत भेजी कने उना चे मते लोक मरी गे।

जिना पटियां जो मूसा तोड़ी दितया था, उना दी जगा लेणे तांई मूसा उना दस हुकमा जो लिखणे तांई पत्थरे दियां नोईयां पटियां बणाईयां। तालू सै फिरी पहाड़े पर चढ़ी गिया कने प्रार्थना किती कि परमेश्वर उना लोकां जो माफ करी दे। परमेश्वरे मूसा दी सुणी कने उना जो माफ करी दिता। नोईयां पटियां पर दस हुकमा जो लेई करी मूसा पहाड़े ला थले उतरी आया। तालू परमेश्वरे सीनै पहाड़े ला लेई करी बायदे दे देशे दीकर इस्राएलियां दी अगुवाई किती।