14. बणे च भटकणा

परमेश्वरे इस्राएलियां जो उना नियमा जो दसणा बंद किता, जिना दा उना जो उदे बायदे दिया बजा ला पालन करणा है। फिरी उनी सीनै पहाड़े ला अग्गे उना दी अगुवाई किती। सै उना जो बायदे दे देशे च लेई जाणा चांदा था। इस देशे जो कनान भी बोलदे थे। परमेश्वर बदले दे खम्भे च उना दे अग्गे-अग्गे चलदा था, कने सै उदे पिच्छे-पिच्छे चले।

परमेश्वरे अब्राहम, इसहाक कने याकूब ने बायदा कितया था कि सै बायदे दा देश उना दे वंशजां जो दिंगा, पर इस बकत ओथु मतियां जाति रे दियां थियां। उना जो कनानी बोलदे थे। ऐ कनानी लोक परमेश्वरे दी आराधना नी करदे थे कने उदे हुकमा जो नी मंदे थे। सै झूठे देवतयां दी पूजा करदे थे कने बड़े बुरे कम्म करदे थे।

परमेश्वरे इस्राएलियां जो बोलया, "जालू तुसां उस वाचा दे देशे च जा, तां ओथु दे सारे कनानियां ला छुटकारा पाई लेनयो। उना सोगी कोई समझौता मत करदे कने उना सोगी वियाह मत करदे। तुसां उना दियां सारियां मूर्तियां जो तोड़ी दिनयो। अगर तुसां मेरा हुकम नी मनगे, तां तुसां मिंजो छडी करी उना दे देवतयां दी पूजा करणा लगी पोणा।"

जालू इस्राएली कनान दे बखे पुज्जे, तां मूसा इस्राएल दे हर इक गोत्रे चे इक-इक करीरी बारह मर्दां जो चुणया। उनी उना जो जाई करी उस देशे दा भेद लेणे तांई भेजया, कि दिखा कि सै कदिया देश है। उना जो कनानियां दा ऐ भेद लेणा था कि सै जोरे बाले न की कमजोर न।

उना बारहा जणया पूरे कनान ला होंदे होए चालियां दिना दी यात्रा किती कने फिरी सै बापिस मुड़ी आऐ। उना लोकां जो दसया, "ऐ देश बड़ा उपजाऊ है कने फसलां बडियां भरियां न!" पर दस भेदियां बोलया, "उना दे शेहर बड़े पक्के न कने सै लोक लंबे-चौड़े न! अगर असां उना पर हमला करदे न, तां पक्का उना सांझो हराई देणा कने सांझो मारी देणा।"

तालू ही कालेब कने यहोशू कने होर दो भेदियां बोलया, "ऐ सच है कि कनान दे लोक लंबे कने जोरेबाले न, पर असां उना जो पक्का हराई सकदे न! परमेश्वरे साड़े तांई लड़णा!"

पर लोकां कालेब कने यहोशू दी नी सुणी। सै मूसा कने हारून पर गुस्सा होऐ कने बोलणा लग्गे, "तुसां सांझो इसा भयानक जगा पर कजो लेई करी आऐ? सांझो मिस्र च ही रेणा चाईदा था। अगर असां उस देशे च जांदे न, तां असां लड़ाईया च मरी जाणा, कने कनान दे लोकां साड़ियां लाड़ियां कने बच्चयां जो गुलाम बणाई लेंणा।" सै लोक उना जो वापिस मिस्र लेई करी जाणे तांई इक होर अगुवे जो चुणना चांदे थे।

जालू उना लोकां ऐसा बोलया तां परमेश्वर बड़ा गुस्सा होई गिया था। सै मिलाप वाले तम्बूऐ च आया कने बोलया, "तुसां मेरे खिलाफ गल्लां कितियां न, इस तांई तुसां सारयां जो इस बणे च भटकणा पोणा। हर इक जणा जड़ा बी सालां दा या उसला जादा उमरा दा है, उनी ओथु मरी जाणा कने कदी भी उस देशे च जाई नी सकणा है, जड़ा मैं तुहांजो देणा है। सिर्फ कालेब कने यहोशू जाई सकदे न।"

जालू लोकां परमेश्वरे जो इयां बोलदे सुणया, तां सै दुखी होए क्योंकि उना पाप कितया था। इस तांई उना कनान दे लोकां पर हमला करणे दा फेसला किता। मूसा उना जो नी जाणे तांई चेतावनी दिती क्योंकि परमेश्वर उना सोगी नी था, पर उना उदी नी सुणी।

परमेश्वर इसा लड़ाईया च उना सोगी नी था, इस तांई कनानियां उना जो हराई दिता कने उना चे केईयां जो मारी दिता। तालू इस्राएली लोक कनान ला बापिस मुड़ी गे। अगले चालियां सालां दीकर, सै बणे च रुआं-प्रां भटकदे रे।

इस्राएली लोक जालू बंणे च चाली साल भटकदे रे, तालू परमेश्वरे उना दियां सारियां जरूरतां जो पूरा किता। उनी उना जो स्वर्ग ला "मन्ना" दिता। उनी बटेरयां दे झुंड भी (जड़े कि छोटे आकारे दे पंछी होंदे न) उना बाल भेजे ताकि उना बाल खाणे तांई मास हो। इना चालियां सालां च, परमेश्वरे उना दे कपड़यां कने जूतयां जो फटणे ला बचाई रखया।

परमेश्वरे उना जो पीणे तांई चमत्कार करीरी पथरे चे पाणी कडया। पर इना सारियां चीजां बाद भी, इस्राएली लोकां परमेश्वरे दे खिलाफ कने मूसा दे खिलाफ शिकायत किती कने गल्लां कितियां। तमी, परमेश्वर भरोसे लायक था। उनी जड़ा बायदा कितया था कि सै अब्राहम, इसहाक, कने याकूब दे वंशजां तांई करणा है, सै उनी किता।

इक बरी फिरी जालू उना लोकां बाल पांणी नी था, तां परमेश्वरे मूसा जो बोलया, "सपड़े सोगी गल्लां कर, कने उसला पांणी निकली पोणा।" पर मूसा सपड़े सोगी गल्लां नी कितियां। पर उनी सोठिया ने सपड़े पर दो बरी मारया। इयां करीरी उनी परमेश्वरे दा निरादर किता। सारयां जो पीणे तांई पांणी तां निकली आया, पर परमेश्वर मूसा ने गुस्सा होई गिया। उनी बोलया, "क्योंकि तू इयां कितया है, इस तांई तू बायदे दे देशे च नी जाई सकणा है।"

जालू इस्राएली लोक चालियां सालां दीकर बणे च भटकी बेठे, तालू जड़े परमेश्वरे दे खिलाफ गियो थे, सै सारे मरी गे। तालू परमेश्वर उना लोकां जो फिरी उस बायदे दे देशे दीकर लेई गिया। हुण मूसा बड़ा बुडा होई गिया था, इस तांई परमेश्वरे लोकां दी अगुवाई करणे तांई कने मूसा दी सहायता करणे तांई यहोशू जो चुणया। परमेश्वरे मूसा ने ऐ बायदा भी कितया था कि इक दिन सै उना लोकां बाल मूसा सांई इक परमेश्वरे दा संदेश देणे बाला भेजणा।

तालू परमेश्वरे मूसा जो इक पहाड़े दिया चोटिया पर जाणे तांई बोलया ताकि सै बायदे दे देशे जो दिखी सके। मूसा उस प्रतिज्ञा दे देशे जो दिखया, पर परमेश्वरे उसयो उदे च जाणे दी इजाजत नी दिती। तालू मूसा मरी गिया, कने इस्राएलियां ती दिना दीकर दुख मनाया। यहोशू उना दा नोआ अगुवा बणी गिया। यहोशू इक अच्छा अगुवा था क्योंकि उनी परमेश्वरे पर भरोसा किता कने उदियां गल्लां जो मनया।