15. बायदे दा देश

आखिर च, हुण सै बकत आई गिया था कि इस्राएली लोक उस बायदे दे देश कनान च जाई सकन। उस देशे च यरीहो नाऐ दा इक शेहर था। उस शेहरे दिया रक्षा तांई उदे चारो पासे मजबूत दीवारां थियां। यहोशूऐ उस नगर च दो भेदियां जो भेजया। उस शेहरे च राहाब नाऐ दी इक वेश्या रेंदी थी। उना इना भेदियों जो लुकणे तांई जगा दिती, कने फिरी बादे च उनी उना जो शेहरे ला बची करी निकलने च भी सहायता किती। उना ऐसा इस तांई किता क्योंकि सै परमेश्वरे पर भरोसा करदी थी। उना कसम खादी की जालू असां इस्राएलियां यरीहो जो नाश करणा तालू असां राहाब कने उदे परिवारे दी रक्षा करगे।

इस्राएली लोकां जो बायदे दे देशे च पूजणे तांई यरदन नदी पार करणी पोणी थी। परमेश्वरे यहोशू ने बोलया, "याजकां जो पेहले जाणा दे।" जालू याजकां यरदन नदिया च अपणे पैर रखे तां पांणी रुकी गिया, जिसला कि इस्राएली लोक नदिया दे दूऐ पासे सुकिया जगा पर जाई सके।

उना लोकां यरदन नदी पार करी लेई, तां परमेश्वरे यहोशू ला बोलया कि यरीहो शेहरे पर हमला करणे तांई तैयार रिया, सै बड़ा पक्का शेहर था। परमेश्वरे उना लोकां ने बोलया कि याजकां कने सैनिकां जो छे दिना दीकर उस शेहरे दे चारों पासे चक्कर लाणा है। याजकां कने सैनिकां इयां ही किता।

सतमें रोजे, इस्राएलियां उस शेहरे दे चारों पासे सत बरी होर चक्कर लाए। उना दे शेहरे दे चारों पासे सतमी बरी चक्कर लाणे बाद, याजकां अपणियां तुरहियां बजाईयां कने सैनिकां जोरे ने नारे लाए।

तालू यरीहो दे चारों पासे दियां दीवारां डेई गियां! जियां परमेश्वरे हुकम दितया था, इस्राएलियां शेहरे दिया हर इक चीजा जो खत्म करी दिता। उना सिर्फ राहाब कने उदे परिवारे जो छडी दिता, जड़े इस्राएलियां दां हिस्सा बणी गियो थे। जालू कनान च रेणे वाले होर लोकां सुणया कि इस्राएलियां यरीहो जो खत्म करी दितया है, तां सै डरी गे कि इस्राएली लोकां उना पर भी हमला करणा।

परमेश्वरे इस्राएलियां जो हुकम दितया था कि कनान च रेंणे बालियां कुसा भी जातिया सोगी शान्ति समझौता मत करदे। पर गिबोनियां नाए दिया इक कनानी जातिया यहोशू ने झूठ बोलया कि सै कनान ला दूर इक जगा च रेणे वाले न। उना यहोशू ने उना सोगी शान्ति समझौता करणे तांई बिनती किती। यहोशू कने होर इस्राएली अगुवयां परमेश्वरे ला नी पूछया कि उना जो क्या करणा चाइदा। कने उना गिबोनियां सोगी शान्ति समझौता करी लिया।

तिन दिना बाद, इस्राएलियां जो पता लगया कि गिबोनी लोक कनान च ही रेंदे थे। सै गुस्सा होई गे क्योंकि गिबोनियां उना जो धोखा दितया था। पर उना, उना सोगी कितियो उस शान्ति समझौते जो नी तोड़या क्योंकि सै परमेश्वरे सामणे कितया था। तालू कुछ बकते बाद, कनान च रेंणे बाले एमोरिया जातिया दे राजयां सुणया कि गिबोनियां इस्राएलियां सोगी शान्ति समझौता करी लिया है, इस तांई उना अपणियां-अपणियां सेना जो गठेरी करी इक बड़ी बडी सेना बणाई कने गिबोन पर हमला करी दिता। गिबोनिया सहायता तांई यहोशू बाल इक संदेश भेजया।

यहोशूऐ इस्राएलियां दिया सेना जो गठेरया कने गिबोनियां बाल पुजणे तांई सै पूरी रात चले। भ्यागा तड़के उना एमोरियां दिया सेना जो हेरान करी दिता कने उना पर हमला करी दिया।

उस दिन परमेश्वर इस्राएलियां तांई लड़या। उनी एमोरियों उपर बडे-बडे ओले सुटी करी मतयां एमोरियां जो मारी दिता।

परमेश्वरे सुरजे जो भी अम्बरे च इकी जगा रोकी दिता ताकि इस्राएलियां जो काफी बकत मिली जा ताकि सै एमोरियां जो पुरे तरीके ला हराई देन। उस दिन, परमेश्वरे इस्राएलियां तांई इक बड़ी बडी जित हासिल किती।

जालू परमेश्वरे एमोरी सेना जो हराई दिता, तालू बड़े कनानी जाति दे लोक इस्राएल पर हमला करणे तांई गिठे होए। तालू यहोशू कने इस्राएलियां उना पर हमला करी के उना दा खात्मा करी दिता।

इना लडाइयां बाद, परमेश्वरे इस्राएल दे हर इक गोत्रे जो बायदे दे उस देशे च उना दा हिस्सा दिता। तालू परमेश्वरे इस्राएल जो उदियां सारियां सीमां पर शान्ति करी दिती।

जालू यहोशू बुडा होई गिया तां उनी इस्राएल दे सारे लोकां जो सदया। तालू यहोशूऐ उना लोकां जो सै बायदा याद कराया जड़ा उना परमेश्वरे सोगी सीनै दे पहाड़े पर कितया था, कि सै उस बायदे दा पालन करन। उना लोकां परमेश्वरे सोगी बायदा कितया था की असां हमेशा भरोसे दे लायक बणी रेंगे कने उदे हुकमा दा पालन करदे रेंगे।