16. छुड़ाणे बाले

यहोशूऐ दे मरणे बाद इस्राएलियां परमेश्वरे दी गल्ल नी मनी। उना परमेश्वरे दे नियमा दा पालन नी किता, कने उना उस बायदे दे देशे च बचयो कनानियां जो बाहर नी कडया। इस्राएलियां अपणे सच्चे परमेश्वर, यहोवा जो छडी करी कनानियां दे देवतयां दी पूजा करणा शुरू करी दिती। इस्राएलियां बाल कोई राजा नी था, इस तांई जिसयो जड़ा ठीक लगा उनी सेई किता।

परमेश्वरे दा हुकम नी मनणे ला इस्राएलियां इक पद्धति दी शुरूआत करी दिती, जिसया इस्राएलियां केई बरी दोहराया था। ऐ पद्धति इयां चली: कुछ सालां दीकर इस्राएलियां परमेश्वरे दे हुकमा जो नी मनणा, तालू परमेश्वरे उना जो दुशमणा ला हराई करी सजा देणी। दुशमणा इस्राएलियां ला उना दियां चीजां जो लुटी लेणा, उना दिया सम्पत्तिया जो बरबाद करी देणा, कने उना चे मतयां जो मारी देणा। फिरी जालू इस्राएलियां दे दुशमणा उना पर केई सालां दीकर हत्याचार करणा, उदे बाद इस्राएलियां अपणे पापां दा पश्चाताप करणा कने परमेश्वरे ला उना जो बचाणे तांई प्रार्थना करणी।

हर बरी जालू इस्राएलियां पश्चाताप करणा, तां परमेश्वरे उना जो बचाणा। उनी इक छुड़ाणे बाले जो भेजी करी ऐसा करणा – इक ऐसा जणा जिनी उना दे दुशमणा दे खिलाफ लड़णा कने उना जो हराणा। तालू देश च शान्ति होणी कने उनी छुड़ाणे बाले उना पर अच्छे ला शासन करणा। परमेश्वरे उना लोकां जो बचाणे तांई मते छुड़ाणे बाले भेजे। परमेश्वरे बखे दे ही इकी दुशमण जाति, मिद्यानियां ला इस्राएलियां जो हराई करी दुबारा ला फिरी ऐसा किता।

मिद्यानियां केई सालां दीकर इस्राएलियां दिया फसलां जो लूटया। इस्राएली लोक बड़े डरी गियो थे, कने सै गुफां च लुकी बेठे, ताकि मिद्यानी लोक उनो जो तोपी नी सकन। आखिरी च उना जो बचाणे तांई उना परमेश्वरे जो पुकारया।

गिदोन नाऐ दा इक इस्राएली आदमी था। इक दिन सै इक गुप्त जगा च कणका जो झाड़ा था ताकि मिद्यानी लोक चोरी नी सकन। यहोवा दे स्वर्गदूते गिदोन बाल आई करी उसयो बोलया, "हे शूरवीर सूरमा, परमेश्वर तेरे सोगी है। जा कने इस्राएलियां जो मिद्यानियां ला बचा।"

गिदोने दे पिता मूर्तिया तांई इक वेदी बणाईयो थी। सारयां ला पेहली गल्ल जड़ी परमेश्वरे गिदोने जो करणे तांई बोली कि उसा वेदिया जो तोड़ी दे। पर गिदोन लोकां ला डरदा था, इस तांई उनी रात होणे दा इन्तजार किता। राती उनी उसा वेदी जो तोड़ी करी उसा दे टोटे-टोटे करी दिते। उनी परमेश्वरे तांई इक नोई वेदी बणाई कने उस पर परमेश्वरे तांई बलि चढ़ाई।

अगले दिने भयागा जालू लोकां दिखया कि कुनी वेदी जो तोड़ी दितया है, इस तांई सै बड़े गुसा होए। कने गिदोन जो मारणे तांई उदे घरे जो गे, पर गिदोन दे पिता बोलया, "तुसां कजो अपणे देवता दी सहायता करणे दी कोशिश करा दे न? अगर सै देवता है तां उसयो अपणी रक्षा अप्पू करणा दिया!" क्योंकि उनी ऐसा बोलया इस तांई लोकां गिदोन जो नी मारया।

तालू इस्राएलियां जो लूटणे तांई मिद्यानी लोक फिरी आए। सै इतणे भरी थे कि उना दी गिणती भी नी करी सकदे थे। गिदोने उना दे खिलाफ लड़ने तांई इस्राएलियां जो गठेरया। गिदोने परमेश्वरे ला दो निशाणा मंगे ताकि उसयो भरोसा होई जाए कि परमेश्वर उसयो सच्ची इस्राएल जो बचाणे तांई बोला दा है।

पेहले निशाण तांई, गिदोने भेडा दिया ऊनी जो धरती पर रखी करी परमेश्वरे जो बोलया कि भयागा दा पाला सिर्फ भेडा दिया इसा ऊना पर पोए कने धरती पर नी पोए। परमेश्वरे ऐसा ही किता। अगली राती, उनी परमेश्वरे ला बोलया कि धरती पाले ने सजी जा पर भेडा दी ऊन सुकी रे। परमेश्वरे ऐसा भी किता। इना दो निशाणा दिया बजा ला, गिदोने भरोसा किता कि परमेश्वर सच्ची चांदा है कि सै इस्राएलियां जो मिद्यानियां ला बचाए।

तालू गिदोने सैनिकां जो अपणे बाल सदया कने 32,000 मर्द आए। पर परमेश्वरे उसयो बोलया कि ऐ बड़े जादा न। गिदोने उना चे 22,000 जो घरे वापिस भेजी दिता जड़े लड़ने ला डरदे थे। परमेश्वरे गिदोन ला बोलया कि ऐ मर्द हले भी जादा न। इस तांई गिदोने 300 सैनिकां जो छडी करी बाकियां जो घरे जो भेजी दिता।

उस राती परमेश्वरे गिदोने ने बोलया, "मिद्यानियां दिया छावनिया च जा कने और उना जो गल्लां करदे सुण। जालू तू सुणना कि सै क्या गल्लां करा दे न, तां तू उना पर हमला करणे ला नी डरणा।" इस तांई उस राती, गिदोन थले उना दियां छावनियां च गिया कने उनी इक मिद्यानी सैनिके जो अपणे मित्रे सोगी सै गल्लां करदे सुणया जड़ियां उनी सुपने च दिखियां थियां। उस सैनिके दे मित्रे बोलया, "इस सुपने दा मतलब है कि गिदोने दिया सेना सांझो मिद्यानी सेना जो हराई देणा!" जालू गिदोने ऐ सुणया तां उनी परमेश्वरे दी स्तुति किती।

तालू गिदोन अपणे सैनिकां बाल मुड़ी आया कने उना चे हर इकी जो इक-इक नरसिंगा, इक मिटिया दा भांडा, कने इक मशाल दिती। उना उस छावनिया जो घेरी लिया जिथू मिद्यानी सैनिक सुतयो थे। गिदोने दे 300 सैनिकां अपणियां मशालां जो भांडे ने ढकया था, इस तांई मिद्यानी लोक उना मशालां दिया लौई जो दिखी नी सके थे।

तालू गिदोन दे सारे सैनिकां अपणे भांडया जो इक ही बकते पर तोड़ी दिता कने मशालां दी लौ चमकणा लगी। उना अपणे नरसिंगे फूँके कने चिल्लाए, "यहोवा दिया तरफा ला गिदोने दी तलवार!"

परमेश्वरे मिद्यानियों जो डराई दिता, इस तांई सै घबराई करी इक दुज्जे जो मारणा लगी पे। तालू ही, गिदोन दे संदेश देणे बालयां जो होर मते इस्राएलियां जो मिद्यानियां दा पीछा करणे च उना दी सहायता करणे जो सदणे तांई भेजया। इस्राएलियां उनाचे मतयां जो मारी दिता कने बाकियां दा पिच्छा करीरी उना जो इस्राएल देशे ला बाहर कडी दिता। उस दिन 1,20,000 मिद्यानी मरी गे। इयां परमेश्वरे इस्राएल जो बचाया।

सै लोक गिदोन जो अपणा राजा बणाणा चांदे थे, पर गिदोने उना जो ऐसा नी करणा दिता, पर उनी उना ला सै सोने दे गेहणे मंगे जड़े उना मिद्यानियां ला लूटयो थे। उना लोकां बड़ा जादा सोना गिदोन जो दिता।

तालू गिदोने उस सोने ने इक खास कपड़े बणाऐ जीना जो महायाजक पांदे थे। पर लोकां मुर्तिया सांई उदी पूजा करणा शुरू करी दिती। तालू परमेश्वरे फिरी इस्राएल जो सजा दिती क्योंकि उना मूर्ति दी पूजा किती थी। परमेश्वरे उना दे दुशमणा जो शक्तिशाली करी दिता ताकि सै उना जो हराई सकन। आखिरी च उना फिरी परमेश्वरे ने प्राथना किती कि साड़ी सहायता कर, कने परमेश्वरे उना जो बचाणे तांई इक होर छुड़ाणे बाले जो भेजया।

ऐ गल्ल बड़ी बरी होई: इस्राएली लोकां पाप करणे, परमेश्वरे उना जो सजा देणी, उना पश्चाताप करणा, कने परमेश्वरे उना जो छुड़ाणे तांई कुसी जो भेजणा। केई सालां दीकर, परमेश्वरे मते छुड़ाणे बालयां जो भेजया जिना इस्राएलियां जो उना दे दुशमणा ला बचाया।

फिरी उना लोकां होर देशां सांई परमेश्वरे ला अपणे तांई इक राजा दी मंग किती। सै इक ऐसा राजा चांदे थे, जड़ा लंबा कने शक्तिशाली हो, कने जड़ा लड़ाईया दे बेले उना दी अगुवाई करी सके। परमेश्वरे जो ऐ निवेदन पसंद नी आया, पर उनी उना जो सियुदा राजा दिता जदिया उना मंग किती थी।