17. दाऊद सोगी परमेश्वरे बायदा

शाऊल इस्राएल दा पेहला राजा था। सै लंबा कने सुंदर था, जदिया सै लोक चांदे थे इकदम तदिया। इस्राएल पर अपणे शासने दे पेहले कुछ सालां च शाऊल इक अच्छा राजा था। पर बादे च सै इक बुरा माणु बणी गिया कने उनी परमेश्वरे दियां गल्लां जो नी मनया, इस तांई परमेश्वरे इक होर माणुऐ जो चुणया, जिनी इक दिन उदिया जगा पर राजा बणना।

परमेश्वरे दाऊद नाए दे इक जवान इस्राएली माणुऐ जो चुणया कने शाऊल दिया जगा पर राजा बणने तांई उसयो तैयार करणा शुरू करी दिता। दाऊद बैतलहम शेहरे दा इक गवाल था। केई बरी जालू शेर कने भालूऐ भेडां पर हमला किता जीना दी दाऊद रखबाली करदा था, तां दाऊद शेर कने भालू दोनों जो मारी दिता। दाऊद इक नम्र कने धर्मी माणु था। उनी परमेश्वरे पर भरोसा किता कने उदियां गल्लां जो मनया।

जालू दाऊद हले जवान ही था, तां उनी लंबे-चौड़े गोलियत दे खिलाफ लाड़ाई किती। गोलियत इक बड़ा अच्छा सैनिक था। सै बड़ा जोरे बाला कने लगभग तीन मीटर लंबा था! पर परमेश्वरे गोलियत जो मारणे कने इस्राएल जो बचाणे च दाऊदे दी सहायता किती। इदे बाद, दाऊदे इस्राएल दे दुशमणा जो केई बरी हराया। दाऊद इक बडा सैनिक बणी गिया, कने उनी मतियां लड़ाईयां च इस्राएली सेना दी अगुवाई किती। लोकां उदी बड़ी तारीफ किती।

लोक दाऊद ने इतणा प्यार करणा लगी पे, कि शाऊल उसला जलन करणा लगा। शाऊल उसयो मारी देणा चांदा था, इस तांई दाऊद उसला कने उदे सैनिकां ला लुकणे तांई बंणे जो नठी गिया। इक दिन, जालू शाऊल कने उदे सैनिक दाऊद दिया तोपा च थे, तां शाऊल इक गुफा च गिया। ऐ सेई गुफा थी जिसा च दाऊद लुकया था, पर शाऊले उसयो नी दिखया। दाऊद शाऊले दे पीछे उदे बखे आया कने उदे कपड़यां ला इक टुकड़ा बडी लिया। बादे च, जालू शाऊल उसा गुफा ला निकलया तां दाऊदे उसयो पुकारी करी उस टुकड़े जो दसया। ऐ दिखी करी, शाऊले जो पता लगी गिया कि दाऊदे राजा बणने तांई उसयो मारणे ला मना करी दितया है।

कुछ बकत बाद, शाऊल लड़ाईया च मरी गिया, कने दाऊद इस्राएल दा राजा बणी गिया। सै इक अच्छा राजा था, कने लोक उसयो प्यार करदे थे। परमेश्वरे दाऊदे जो आशीषित किता कने उसयो इक सफल राजा बणाया। दाऊदे केई लड़ाईयां लड़ियां, कने परमेश्वरे उसयो इस्राएल दे दुशमणा जो हराणे च मदद किती। दाऊदे यरूशलेम शेहरे जो जीती लिया कने उसयो अपणी राजधानी बणाया, जिथू सै रिया कने शासन किता। दाऊद चालियां सालां दीकर राजा रिया। उस बकत इस्राएल शक्तिशाली कने अमीर बणी गिया।

दाऊद इक मंदिर बणाणा चांदा था, जिथू सारे इस्राएली लोक परमेश्वरे दी आराधना करी सकन कने उदे तांई बलिदान चढ़ाई सकन। लगभग 400 सालां ला, सै लोक मूसा दे बणायो मिलाप बाले तंबूऐ च परमेश्वरे दी आराधना करा दे थे, कने उदे तांई बलिदान चढ़ा दे थे।

पर ओथु नातान ना दा इक परमेश्वरे दा संदेश बाला था। परमेश्वरे उसयो दाऊदे ला ऐ बोलणे तांई भेजया: "तू मतियां लड़ाईयां लड़ियां न, इस तांई तू मेरे तांई इस मंदिर जो नी बणाणा। तेरे पुत्रे इसयो बणाणा। तमी, मैं तीजो मती आशीष देणी। तेरे इक वंशजे हमेशा तांई मेरे लोकां पर राजा दे रूपे च शासन करणा।" हमेशा तांई शासन करणे वाला सै दाऊद दा एकलोता वंशज मसीह था। मसीह परमेश्वरे दा चुणया होया जन था, जीनी संसारे दे लोकां जो उना दे पापां ला बचाणा।

जालू दाऊदे नातान दे संदेशे जो सुणया तां उनी परमेश्वरे दा धन्यवाद किता कने उदी स्तुति किती। परमेश्वर उदिया प्रतिष्ठा जो बदा दा था कने उसयो मतियां आशीषां दे दा था। बेशक, दाऊद नी जाणदा था कि परमेश्वरे इना गल्लां जो कालू करणा। इस बकत असां जाणदे न कि इस्राएलियां जो इक लंबे बकते दीकर, लगभग 1,000 सालां दीकर मसीह दे ओंणे दा इन्तजार करणा पोणा।

दाऊदे केई सालां दीकर अच्छे ला अपणे लोकां पर शासन किता। उनी बड़िया इमानदारी ला परमेश्वरे दियां गल्लां जो मनया कने परमेश्वरे उसयो आशीषित किता। पर उनी अपणिया जिन्दगिया दे आखरी दिना च उनी परमेश्वरे दे खिलाफ बड़ा बडा पाप किता था।

एक दिन दाऊदे अपणे मेहले ला बाहर इक सुंदर जनानिया जो नोंदे दिखया। सै उसयो नी जाणदा था, पर उनी पता करी लिया कि उसा दा ना बतशेबा था।

अपणिया नजरा जो फेरणे दे बदले, दाऊदे उसयो अपणे बाल लोणे तांई कुसी जो भेजया। सै उसा सोगी सुता कने उसा जो वापिस घरे जो भेजी दिता। थोड़े बकत दे बाद बतशेबा ऐ बोली करी दाऊदे बाल संदेश भेजया कि सै गर्भवती है।

बतशेबा दा घरे बाला ऊरिय्याह ना दा इक माणु था। सै दाऊदे दे अच्छे सैनिकां चे एक था। उस बकत सै लड़ाई करणे तांई बाहर गिया था। दाऊदे ऊरिय्याह जो लड़ाईया ला बापिस सदी करी उसयो अपणिया घरे बालिया सोगी रेणे तांई बोलया। पर होर सैनिक लड़ाईया च ही थे इस तांई ऊरिय्याह घरे जाणे ला मना करी दिता। दाऊदे ऊरिय्याह जो बापिस लड़ाईया च भेजी दिता कने कने सेनापति ला उसयो लड़ाईया च उसा जगा च रखणे तांई बोलया जिथू दुशमण सारयां ला जादा शक्तिशाली होन ताकि सै मरी जाए। तां इयां ही होया कि ऊरिय्याह लड़ाईया च मरी गिया।

ऊरिय्याह दे लड़ाईया च मरी जाणे बाद दाऊदे बतशेबा ने वियाह करी लिया। बादे च, उना दाऊदे दे पुत्रे जो जन्म दिता। दाऊदे जड़ा कितया उसला परमेश्वर बड़ा गुसा था, इस तांई उनी नातान परमेश्वरे दे संदेश देणे बाले जो दाऊदे जो ऐ दसणे तांई भेजया कि उदा पाप कितणा बुरा था। दाऊदे अपणे पापां दा पश्चाताप किता कने परमेश्वरे उसयो माफ करी दिता। अपणिया बाकी बचियो जिन्दगिया च, कने अपणे मुशकिल हालातां च भी दाऊद परमेश्वरे दे पिच्छे चलया कने उदियां गल्लां जो मनया।

पर दाऊद दा बच्चा मरी गिया। इयां करीरी परमेश्वरे दाऊदे जो सजा दिती। दाऊदे दे मरणे दीकर, उदे अपणे परिवारे दे कुछ लोकां उदे खिलाफ लड़ाई लड़ी, कने दाऊदे दी अपणी शक्ति घटी गियो थी। पर परमेश्वर भरोसे दे लायक था कने हुण भी उनी सै किता जड़ा उनी दाऊदे ने करणे दा बायदा कितया था, भले ही दाऊदे उदा हुकम नी मनया था। बादे च, दाऊदे कने बतशेबा दी दुज्जी ओलाद पैदा होई, कने उना उदा ना सुलैमान रखया।