18. इस्राएल देशे दा दो देशां च बटबारा

दाऊद राजे चालियां सालां दीकर शासन किता। तालू सै मरी गिया, कने उदे पुत्रे सुलैमाने इस्राएले पर शासन करणा शुरू किता। परमेश्वरे सुलैमान ने गल्ल बात किती कने उसयो पूछया कि तीजो सारयां जादा क्या चाइदा है, कि परमेश्वर तेरे तांई करे। सुलैमाने परमेश्वरे ला मंगया कि सै उसयो बड़ा जादा बुद्धिमान बणाई दे। इसा गल्ला ला परमेश्वर खुश होया, इस तांई परमेश्वरे सुलैमान जो संसारे दा सारयां ला बुद्धिमान मर्द बणाई दिया। सुलैमाने मतियां गल्लां जो सिखया कने सै इक बुद्धिमान शासक था। परमेश्वरे उसयो बड़ा अमीर भी बणाई दितया था।

यरूशलेम शेहरे च सुलैमाने उस मंदरे जो बणाया जिदे तांई उदे पिता योजना बणाईयो थी कने मंदरे दे समाने जो गठेरया था। हुण लोक मिलाप बाले तंबूऐ दे बजाए मंदरे च परमेश्वरे दी अराधना करदे थे कने उदे तांई बलि चढ़ादें थे। परमेश्वर आइकरी मंदरे च हाजिर रेंदा था, कने ओथु सै अपणे लोकां सोगी वास करदा था।

पर सुलैमाने दुज्जे देशां दियां जनानियां ने प्यार किता। उनी मतियां, लगभग 1,000 जनानिया सोगी वियाह करीरी परमेश्वरे दे हुकमा जो तोड़या! इना चे मतियां जनानियां होर देशां ला आईयां थियां कने अपणे सोगी अपणे देवतयां जो भी लेई आइयां कने उना दियां पूजा करदियां रियां। जालू सुलैमान बुडा होई गिया तां उनी भी उना दे देवतयां दी पूजा किती।

इसा बजा ला परमेश्वर सुलैमाने ला गुस्सा होई गिया था। परमेश्वरे उसयो सजा देणे तांई बोलया कि, उनी इस्राएल देशे जो दो राज्यां च बंडी देणा है। उनी ऐ सुलैमाने दे मरणे बाद ऐसा करणा।

सुलैमान दे मरणे बाद, रहबाम राजा बणया। इस्राएल देशे दे सारे लोक उसयो अपणा राजा बणाणे तांई गिठे होए। उना रहबाम ला शिकायत किती कि सुलैमाने उना ला बड़ा जादा मेहनत कराईयो थी कने बड़े कर वसूलयो थे। उना रहबाम ला बिनती किती कि उना ला घट कम कराऐ।

पर रहबामे बड़िया ही मूर्खता ला जवाब दिता, "तुसां बोलदे न कि मेरे पिता सुलैमाने तुहांजो ला बड़ी जादा मेहनत करवाई। पर मैं तुहांजो ला होर भी जादा मेहनत करवाणी कने मैं तुहांजो उसला भी जादा दुखी करणा।"

जालू लोकां उसयो ऐसा बोलदे सुणया तां उना चे केइयां उदे खिलाफ बिरोध किता। दस गोत्रां उसयो छडी दिता; उदे सोगी हुण सिर्फ दो ही गोत्र बचयो थे। इना दो गोत्रां अप्पू जो यहूदा दा राज्य बोलया।

बाकी दे दस गोत्रां यारोबाम नाऐ दे इक माणुऐ जो अपणा राजा बणाई लिया। ऐ गोत्र देशे दे उत्तर-पूर्वी हिस्से च थे। उना अप्पू जो इस्राएल दा राज्य बोलया।

पर यारोबाम परमेश्वर दे खिलाफ चली गिया कने लोकां ला पाप करवाया। उनी अपणे लोकां ला पूजा करणे तांई दो मूर्तियां जो बणाया। सै हुण यहूदा दे राज्य च यरूशलेम शेहरे च परमेश्वरे दे मंदरे च उदी आराधना करणे तांई नी गे।

यहूदा कने इस्राएल दे राज्य अप्पू चे दुशमण बणी गे कने हमेशा इक दुज्जे ने लड़ना लगी पे।

इस्राएल दे नोऐ राज्य च, सारे ही राजा बुरे थे। इना चे केई राजा उना दिया जगा च राजा बणने दी इच्छा रखणे बाले इस्राएलियां मारी दिते थे।

इस्राएल राज्य दे सारे ही राजयां कने जादातर लोकां मूर्तियां दी पूजा किती। जालू उना ऐसा किता, तां सै अक्सर बेश्यां सोगी सुते कने एथू दीकर कि केई बरी मूर्तियां अग्गे बच्चयां दियां बलियां भी दितियां।

इस्राएल राज्य दे राजा, दाऊद दे वंशज थे। इना राजयां चे केई भले माणु थे, जीना अच्छे ने शासन किता कने परमेश्वरे दी आराधना किती। पर यहूदा दे सारे राजा बुरे थे। उना बुराईया ने शासन किता, कने मूर्तियां दी उपासना किती। एथू दीकर कि इना चे कुछ राजयां झूठे देवतयां अग्गे अपणे बच्चयां दी भी बलि देई दिती। यहूदा दे लगभग लोकां भी परमेश्वरे दे खिलाफ पाप किता कने होर देवतायां दी पूजा किती।