19. परमेश्वरे दे संदेश देणे बाले

परमेश्वर हमेशा इस्राएलियां बाल परमेश्वरे दा संदेश देणे बालयां जो भेजदा रिया था। परमेश्वरे दा संदेश देणे बाले परमेश्वरे ला संदेशां जो सुणदे कने फिरी उसयो लोकां जो दसदे थे।

जालू अहाब इस्राएल राज्य पर राजा था, तां उस बकत एलिय्याह परमेश्वरे दा संदेश देणे बाला था। अहाब इक बुरा माणु था। उनी झूठे बाल देवता दी पूजा करणे तांई लोकां जो मजबूर कितया था। इस तांई एलिय्याह अहाब जो बोलया कि परमेश्वर उना लोकां जो सजा देणा लगया। उनी उसयो बोलया, "जालू दीकर मैं दुबारा बरखा होणे तांई नी बोलें, तालू दीकर इस्राएल दे राज्य च बरखा नी होणी कने ना ही ओस पोणी।" इसा गल्ला पर अहाब जो इतणा गुस्सा आया कि उनी एलिय्याह जो मारी देणे दा फेसला करी लिया।

इस तांई परमेश्वर एलिय्याह ने बोलया कि, सै बंणे जाई करी अहाब ला लुकी बो। एलिय्याह बंणे च उस तलाबे बाल गिया जिथू जाणे तांई परमेश्वरे उसयो बोलया था। हर भयागा कने हर शामी, पंछी एलिय्याह तांई रोटी कने मीट लेई करी ओंदे थे। इस पुरे बकत च, अहाब कने उदी सेना एलिय्याह जो तोपदे रे, पर उसयो तोपी नी सके।

बरखा नी होणे दिया बजा ला कुछ बकत बाद सै तलाब सूकी गिया। इस तांई एलिय्याह बखे दे ही इकी देशे च चली गिया। उस देश च इक गरीब विधवा थी, जिसा दा इक पुत्र था। उना बाल अनाज लगभग मुकी चलया था क्योंकि ओथु कोई फसल नी थी। पर फिर भी, उना जनानिया एलिय्याह दी देखभाल किती, इस तांई परमेश्वरे उदी कने उसा दे पुत्रे दियां जरूरतां जो पूरा किता, इसा बजा ला उदे आटे दी डरमी कने उसा दे तेले दी केनी कदी खाली नी होई। उस पूरे अकाल दे बकत उना बाल अनाज था। एलिय्याह कुछ सालां दीकर ओथु रिया।

साडे तीना सालां बाद, परमेश्वरे एलिय्याह ने बोलया कि उनी दुबारा ला बरखा करणी। उनी एलिय्याह जो इस्राएल दे राज्य च जाई करी अहाब ने गल्लां करणे तांई बोलया। इस तांई एलिय्याह अहाब बाल गिया। जालू अहाबे उसयो दिखया तां उनी बोलया, "अच्छा तू है, मुसीबत पैदा करणे बाला!" एलिय्याह जवाब दिता, "मुसीबत पैदा करणे बाला तां तू है! तू यहोवा जो छडी दितया है। सेई सच्चा परमेश्वर है, पर तू बाल देवता दी पूजा करा दा है। हुण तीजो इस्राएल राज्य दे सारे लोकां जो कर्मेल पहाड़े पर लेई करी ओंणा पोंणा।"

कने सारे लोक कर्मेल पहाड़े पर गे। सै लोक भी आए जड़े बोलदे थे की असां बाल देवता दे संदेशां जो बोलदे न। बाल दे संदेश देणे बाले सारे 450 लोक थे। एलिय्याह लोकां ने बोलया, "कालू दीकर तुसां अपणे मना जो फेरी रखगे? अगर यहोवा परमेश्वर है तां उदी आराधना करा! अगर बाल परमेश्वर है, तां उदी पूजा करा!"

तालू एलिय्याह बाल दे संदेशां जो देणे बालयां जो बोलया, "इक दांदे जो बलि करीरी उदे मिटे जो बलिदान होणे तांई इक वेदिया पर रखा, पर अग मत लांदे। उदे बाद मैं भी इयां ही करणा, कने इक लग वेदिया पर मैं उस मिटे जो रखणा। तालू अगर परमेश्वर वेदिया पर अग्ग सुटदा है, तां तुहांजो पता लगी जाणा कि सै सच्चा परमेश्वर है।" तालू बाल दे संदेश देणे बालयां बलिया जो तैयार कितया पर अग नी लाई।

तालू बाल दे संदेश देणे बालयां बाल देवते ने प्रार्थना किती, "हे बाल, साड़ी सुण!" पूरे दिन उना प्रार्थना किती कने चिल्लाए कने एथू दीकर कि उना अपणे आपे जो चाकुआं ने बडी लिया, पर बाल देवते जवाब नी दिता, कने उनी कोई अग नी सुटी।

बाल दे संदेश देणे बाले लगभग पूरा दिन प्रार्थना करदे रे। आखरी च उना प्रार्थना करणा बंद करी दिता। तालू एलिय्याह दुज्जे दांदे दे मिटे जो परमेश्वरे दिया वेदिया पर रखी दिता। उदे बाद, उनी लोकां जो बोलया कि पांणिऐ दे भरयो बडे-बडे बांडयां जो उस बलिया पर तालू दीकर नियोरदे रिया जालू दीकर कि मिटी, लकड़ियां, कने एथू दीकर कि वेदिया दे अखे बखे दी जगा सीजी ना जाए।

तालू एलिय्याह प्रार्थना किती, "हे यहोवा, अब्राहम, इसहाक, कने याकूब दे परमेश्वर, सांझो दस कि तू इस्राएल दा परमेश्वर है कने ऐ कि मैं तेरा सेवक है। मिंजो जवाब दे जिसला कि इना लोकां जो पता लगे कि तू ही सच्चा परमेश्वर है।"

तालू ही, अम्बरे ला आग पेई कने उना मिट, लकड़ियां, चट्टाना, मिट्टी, कने एथू दीकर कि वेदी दे अखे बखे दे पाणिऐ जो भी फुकी दिता। जालू लोकां ऐ दिखया, तां सै थले धरती पर डेई पे कने बोलणा लगे, "यहोवा ही परमेश्वर है! यहोवा ही परमेश्वर है!"

तालू एलिय्याह बोलया, "बाल दा एक भी संदेश देणे बाला बची करी नी जाई सके!" इस तांई लोकां बाल दे संदेश देणे बालयां जो पकड़ी लिया कने उना जो ओथु ला लग लेई गे कने उना जो मारी दिता।

तालू एलिय्याह अहाब राजा जो बोलया, "जट अपणे घरे जो नठी जा, क्योंकि बरखा होणे वाली है।" तालू ही बदल घणे होई गे, कने बड़ी भरी बारखा लगी पेई। यहोवा उस सूखे जो मुकाई दिता। इसला पता लगदा है कि यहोवा ही सच्चा परमेश्वर है।

जालू एलिय्याह अपणे कम्म सारे मुकाई बेठा, तां परमेश्वरे एलीशा नाए दे इक माणुऐ जो अपणा संदेश देणे बाला चुणया। परमेश्वरे एलीशा दे जरिये मते चमत्कार किते। इक चमत्कार नामान सोगी होया। सै इक दुशमणे दिया सेना दा सरदार था, पर उसयो चमड़िया दा इक बुरा रोग होई गिया था। नामाने एलीशा दे बारे च सुणया था, इस तांई सै एलीशा बाल आया कने उसयो ठीक करणे तांई विनती किती। एलीशा नामान जो बोलया कि जाई करी यरदन नदिया दे पाणिऐ च सत बरी डुबकी लाई ले।

नामान गुस्सा होई गिया। उनी ऐसा करणे ला मना करी दिता, क्योंकि ऐ उसयो मुर्खता दा कम लगा दा था। पर बादे च उनी अपणा मन बदली लिया कने जाइकरी यरदन नदिया दे पाणिऐ च सत बरी डुबकी लाई। जालू सै आखरी बरी पाणिऐ ला बाहर आया, तां परमेश्वरे उसयो ठीक करी दिता।

परमेश्वरे इस्राएल दे लोकां बाल होर मते परमेश्वरे दे संदेश देणे बालयां जो भेजया। उना सारयां लोकां मूर्तियों दी पूजा करणा बंद करी देणे तांई बोलया। इदे बदले, उना जो इक दुज्जे सोगी अच्छे ला बर्ताव करणा चाइदी कने इक दुज्जे पर दया करणी चाइदा। उना संदेश देणे बालयां, लोकां जो चेतावनी दिती कि बुरे कम्मा जो करणा बंद करी दिया कने इदे बदले परमेश्वरे दियां गल्लां दा पालन करणा है। अगर उना लोकां इयां नी किता तां परमेश्वरे उना जो दोषी मनी करी उना दा न्याय करणा, कने उना जो सजा देणी।

जादातार उना लोकां परमेश्वरे दे हुकमा दा पालन नी किता। हमेशा उना संदेश देणे बालयां सोगी बुरा व्यवहार किता कने एथू दीकर कि कदी-कदी उना जो मारी दिता। इक बरी, उना यिर्मयाह परमेश्वरे दे संदेश देणे बाले जो सुके खुऐ च सुटी दिता कने उसयो ओथु मरणे तांई छडी दिता। सै खुऐ दे तले च चिकड़े च फसी गिया। पर तालू राजा जो उस पर दया आई कने उनी अपणे सेनिकां जो आदेश दिता कि यिर्मयाह दे मरणे ला पेहले उस खुऐ ला बाहर कडी लेई ओआ।

परमेश्वरे दे संदेश देणे बाले परमेश्वरे दिया तरफा ला बोलदे रे, भले ही लोकां उना ला नफरत किती। उना लोकां जो चेतावनी दिती कि अगर उना पश्चाताप नी किता, तां परमेश्वरे उना जो खत्म करी देणा। उना लोकां जो ऐ भी याद कराया कि परमेश्वरे उना बाल मसीह जो भेजणे दा बायदा कितया है।