20. बंधुआई कने मुड़ना

इस्राएल दे राज्य कने यहूदा दे राज्य दोना परमेश्वरे दे खिलाफ पाप किता। उना उस बायदे जो तोड़ी दिता जड़ा परमेश्वरे उना सोगी सीनै पहाड़े पर कितया था। परमेश्वरे उना जो पश्चाताप करणे कने दुबारा ला उदी अराधना करणे तांई चेतावनी देणे तांई अपणे संदेश देणे बालयां जो भेजया, पर उना संदेश देणे बालयां दियां गल्लां जो मनणे ला मना करी दिता।

परमेश्वरे उना दे दुशमणा जो उना जो नाश करणे दे काबिल करीरी उना दोना राज्यां जो सजा दिती। अश्शूर इक होर देश था, जड़ा बड़ा शक्तिशाली होई गिया था। सै दुज्जे देशां तांई बड़े निर्दयी थे। उना आईकरी इस्राएल दे राज्यां दा नाश करी दिता। अश्शूरियां आइकरी इस्राएल दे राज्य च मतयां जो मारी दिता, जिसयो दिल किता उसयो लूटी लिया, कने देशे दे केई हिस्सयां जो फुकी दिता।

अश्शूरियां सारे अगुवां, अमीर लोकां, कने ऐसे लोकां जो जड़े कीमती चीजां जो बणाई सकदे थे, इक सोगी गठेरया कने सै उना जो अश्शूर देशे जो लेई गे। इस्राएल च सिर्फ कुछ गरीब इस्राएली ही बचे।

फिर अश्शूरी लोक उस देशे च रेणे तांई विदेशियां जो लेई करी आए। उना विदेशियां उना शेहरां जो दुबारा ला बणाया। जड़े इस्राएली ओथु बचयो थे उना सोगी वियाह करी ले। इना लोकां दे वंशज सामरी दे।

यहूदा दे राज्य दे लोकां दिखया कि कियां परमेश्वरे उस पर भरोसा नी करणे दिया बजा ला कने उदियां गल्लां जो नी मनणे दिया बजा ला इस्राएल दे राज्य दे लोकां जो सजा दिती थी। पर फिरी भी उना कनानियां दे देवतयां दियां मूर्तियां दी पूजा किती। परमेश्वरे उना जो चेतावनी देणे तांई अपणे संदेश देणे बालयां जो भेजया, पर उना सुणने ला मना करी दिता।

लगभग 100 सालां बाद अश्शूरियां इस्राएल दे राज्य दा नाश करी दिता। परमेश्वरे बेबीलोन दे राजा, नबूकदनेस्सर जो यहूदा दे राज्य पर हमला करणे तांई भेजया। बेबीलोन इक शक्तिशाली देश था। यहूदा दा राजा नबूकदनेस्सर दा गुलाम बणने कने हर साल उसयो मते भरी पेसे देणे तांई राजी होई गिया।

पर कुछ सालां बाद बाद, यहूदा दे राजा बेबीलोन दे खिलाफ बिद्रोह किता। कने बेबीलोनियां मुड़ी करी यहूदा दे राज्य पर हमला करी दिता। उना यरूशलेम शेहरे पर कब्जा करी लिया, मंदरे जो तोड़ी दिता, कने शेहर कने मंदरे दे खजाने जो लूटी लिया।

बिद्रोह करणे दिया बजा ला यहूदा दे राजा जो सजा देणे तांई, नबूकदनेस्सर दे सैनिकां राजा दे पुत्रे जो उदे सामणे मारी दिता कने फिरी उसयो अन्ना करी दिता। इदे बाद, सै राजा जो लेइ गे कने उसयो बेबीलोन दिया जेला च बंद करी दिता ताकि सै ओथु ही मरी जा।

नबूकदनेस्सर कने उदी सेना यहूदा दे राज्य दे लगभग सारे ही लोकां जो बेबीलोन लेइ गे, सिर्फ सारयां ला गरीब लोकां को पीछे छडी गे ताकि सै खेतरां च फसल उगान। उस बकत जो बंधुआई दा काल बोलया, जिदे च परमेश्वरे लोकां जो बायदे दे देशे ला निकली जाणे तांई मजबूर करी दितया था।

भले ही परमेश्वर अपणे लोकां जो उना दे पापां दी सजा देणे तांई गुलामी च लेई गिया था, तमी सै उना जो या अपणे लोकां जो नी भूलया था। परमेश्वर अपणे लोकां दी निगरानी करदा रिया कने अपणे संदेश देणे बालयां दे जरिए उना ने गल्लां करदा रिया। उनी बायदा किता कि सत्तर सालां बाद, उना दुबारा फिरी बायदे दे देशे जो चली जाणा।

लगभग सत्तर सालां बाद, फारस दे राजा कुस्रूऐ बेबीलोन जो हराई दिता, इस तांई बेबीलोन दे साम्राज्य दे बदले फारस दे साम्राज्य केई देशां पर राज किता। इस्राएली लोकां जो हुण यहूदी बोलदे थे। उना चे मतयां अपणी पूरी जिन्दगी बेबीलोन च कटी सड़ी थी। सिर्फ कुछ बुडे यहूदियां जो यहूदा दे देश दी याद थी।

फारसी लोक बड़े शक्तिशाली थे, पर उना अपणे जीतयो लोकां पर दया किती। फारसी लोकां दा राजा बणने दे थोड़े बकते बाद, कुस्रूऐ इक हुकम दिता कि कोई भी यहूदी जड़ा यहूदा जो बापिस जाणा चांदा है, सै फारस ला निकली करी बापिस यहूदा जो जाई सकदा है। एथू दीकर कि उनी उना जो मंदरे जो फिरी ला बणाणे तांई धन भी दिता। कने गुलामी दे सत्तर सालां बाद, यहूदियां दे थोड़े दे लोक यहूदा च यरूशलेम शेहरे जो मुड़ी करी आए।

जालू सै लोक यरूशलेम च पुज्जे, तां उना मंदरे जो कने शेहरे दे चारों पासे दिया दीवारां जो दुबारा ला बणाया। फारसी लोक हले भी उना पर शासन करदे थे, पर इक बरी फिरी सै बायदे दे देशे च रे दे थे कने मंदरे च अराधना करा दे थे।