21. परमेश्वर मसीह दे ओणे दा बायदा करदा है

जालू परमेश्वरे संसारे दी सृष्टि किती थी, तालू सै जाणदा था, कि बादे च कुसी दिने उसयो मसीह जो भेजणा पोणा। उनी आदम कने हव्वा ने बायदा किता था कि उनी ऐसा करणा। उनी बोलया कि हव्वा ने इक वंशज पैदा होणा जिनी साँपे दे सिरे जो गरेचणा है। जिनी साँपे हव्वा जो धोखा दिता सै पक्का ही शैतान था। परमेश्वरे दिया इसा गल्ला दा मतलब था, कि मसीहे पुरे तरीके ला शैताने जो हराई देणा।

परमेश्वरे अब्राहमे ने बायदा कितया थी कि उदे जरिये संसारे दियां सारियां जातियां जो आशीष मिलणी। परमेश्वरे बादे च मसीह जो भेजी करी इसा प्रतिज्ञा जो पूरा करणा। उनी मसीहे संसारे दिया हर इक जाति चे लोकां जो उना दे पापां ला छुड़ाणा।

परमेश्वरे मूसा ने बायदा कितया था कि भविष्य च उनी मूसा सांई इक होर परमेश्वरे दे संदेश देणे बाले जो भेजणा। ऐ परमेश्वरे दा संदेश देणे बाला मसीह होणा। इयां, परमेश्वरे दुबारा ला बायदा किता कि उनी मसीह जो भेजणा।

परमेश्वरे राजा दाऊदे ने बायदा किता था कि उदा इक वंशज मसीह होणा। सै राजा होणा कने परमेश्वरे लोकां पर हमेशा तांई शासन करणा।

परमेश्वरे यिर्मयाह परमेश्वरे दे संदेश देणे बाले ने गल्ल किती कने बोलया कि इक दिन उनी इक नोआ बायदा करणा। सै नोआ बायदा इस्राएल सोगी सीनै पहाड़े पर कितयो पुराणे बायदे सांई नी होणा। जालू लोकां सोगी उनी अपणी नोईया वाचा जो बनणा, तां उनी उना पर अप्पू जो व्यक्तिगत रूप च प्रकट करणा। हर इक जणे उसने प्यार रखणा कने उदिया व्यवस्था दा पालन करणे दी इच्छा रखणी। परमेश्वरे बोलया कि ऐ उदिया व्यवस्था दा उना दे दिलां पर लिखणे सांई होणा। सै उदे लोक होणे, कने परमेश्वरे उदे पापां जो माफ करणा। सै मसीह होणा जिनी उना सोगी उस नोऐ बायदे जो करणा।

परमेश्वरे दे संदेश देणे बालयां ऐ भी बोलया कि मसीह इक परमेश्वरे दा संदेश देणे बाले होणा। इक संदेश देणे बाला सै माणु है, जड़ा परमेश्वरे दे वचना जो सुणदा है कने फिरी लोकां जो परमेश्वरे दे संदेशां जो दसदा है। जिसयो भेजणे दी परमेश्वरे प्रतिज्ञा कितियो थी, सै मसीह इक सिद्ध परमेश्वरे दा संदेश देणे बाला होणा। मतलब कि मसीहे परमेश्वरे दे संदेशां जो अच्छे ने सुणना, कने उनी लोकां जो उना संदेशां जो डंगे ने सिखाणा।

इस्राएली याजक लोकां तांई परमेश्वरे अग्गे बलि चढ़ादे रे। ऐ बलियां लोकां जो उना दे कितयो पापां दिया सजा ला बचणे तांई परमेश्वरे जो चढ़ादें थे। याजकां लोकां तांई प्रार्थना भी किती। पर सै मसीह सिद्ध महायाजक होणा, जिनी परमेश्वरे जो देणे तांई इक सिद्ध बलि दे रूपे च अपणे आपे जो चढ़ाई देणा। मतलब कि उनी कदी पाप नी करणा कने जालू उनी अपणे आपे जो बलि होणे तांई देणा, तालू संसारे दी कोई भी होर बलि जरूरी नी होणी।

लोकां पर राजा कने प्रधान शासन करदे न, कने कदी-कदी सै गलतियां करदे न। राजा दाऊदे सिर्फ इस्राएलियां पर शासन किता, पर राजा दाऊदे दे वंशजे मसीहे पूरे संसारे पर शासन करणा, कने उनी हमेशा तांई शासन करणा। इदे इलाबा उनी हमेशा न्याय ने शासन करणा, कने सही फेसले लेणे।

परमेश्वरे दे संदेश देणे बालयां मसीह दे बारे च मतियां गल्लां बोलियां। उदाहरण तांई, मलाकिए बोलया कि मसीह दे आणे ला पेहले इक होर परमेश्वरे दा संदेश देणे बाले ओणा। सै परमेश्वरे दा संदेश देणे बाला बड़ा जरूरी होणा। इदे इलावा, यशायाह परमेश्वरे दा संदेश देणे बाले लिखया कि मसीहे इक कुआरिया ला पैदा होणा। कने मीका परमेश्वरे दे संदेश देणे बाले बोलया कि मसीहे बैतलहम शेहरे च जन्म लेणा।

यशायाह परमेश्वरे दा संदेश देणे बाले बोलया कि मसीहे गलील दे इलाके च रेणा। कने जड़े लोक बड़े दुखी न, मसीहे उना जो शान्ति देणी। उनी कैदियां जो भी आजाद करणा। मसीहे बीमारां जो कने जड़े सुणी नी सकदे, दिखी नी सकदे, बोली नी सकदे, या चली नी सकदे उना जो भी ठीक करणा।

यशायाह परमेश्वरे दे संदेश देणे बाले ऐ भी बोलया कि लोकां मसीह ने नफरत करणी कने उसयो अपनाणे ला मना करी देणा। होर परमेश्वरे दे संदेश देणे बालयां बोलया कि मसीहे दे इक साथिए उदे खिलाफ होणा। जकर्याह परमेश्वरे दे संदेश देणे बालयां बोलया कि उदे इनी साथिऐ ऐसा करणे तांई दुज्जे लोकां ला चाँदी दे ती सिक्के लेणे। इदे इलावा, कुछ परमेश्वरे दे संदेश देणे बालयां बोलया कि लोकां मसीहे जो मारी देणा, कने ऐ कि उना उदे कपड़यां तांई जुआ खेलणा।

परमेश्वरे दे संदेश देणे बालयां ऐ भी दसया कि मसीहे कियां मरणा। यशायाहे भविष्यद्वाणी किती कि लोकां मसीह पर थूकेणा, उदा मजाक उड़ाणा, कने उसयो कुटणा। उना उसयो बिनी देणा कने बड़े दुखां कने पीड़ा बाद उनी मरी जाणा, कने उनी कुछ भी गलत नी कितया होणा।

परमेश्वरे दे संदेश देणे बालयां ऐ भी दसया कि मसीहे पाप नी करणा। उनी सिद्ध होणा। पर उनी इस तांई मरणा क्योंकि परमेश्वरे उसयो होर लोकां दे पापां तांई सजा देणी। उदे मरणे ला लोकां परमेश्वरे सोगी मेल करी सकणा। इसी तांई परमेश्वर चांदा था कि मसीह मरे।

परमेश्वरे दे संदेश देणे बालयां ऐ भी दसया कि परमेश्वरे मसीह जो मरयां चे जिन्दा करणा। ऐ इसा गल्ला जो दसदा है कि ऐ सब कुछ नोऐ बायदे जो करणे दी परमेश्वरे दी योजना थी, ताकि सै उना लोकां जो बचाई सके जिना उदे खिलाफ पाप कितया है।

परमेश्वरे दे संदेश देणे बालयां पर मसीह दे बारे च मतियां गल्लां जो प्रकट किता, पर मसीह उना परमेश्वरे दे संदेश देणे बालयां चे कुसी दे भी जिन्दे जी नी आया था। इना परमेश्वरे दे संदेश देणे बालयां दे संदेश देणे दे 400 ला जादा सालां बाद, सही बकते पर, परमेश्वरे मसीह जो इस संसारे च भेजया।