22. यूहन्ना दा जन्म

अतीत च, परमेश्वरे अपणे संदेश देणे बालयां सोगी गल्लां कीतियां थियां, इस तांई सै लोकां ने गल्ल करी सके थे। पर उनी उस बकत ला लेई करी फिरी 400 साल होणे दीकर उनी उना सोगी गल्ल नी किती। तालू परमेश्वरे जकर्याह ना दे संदेश देणे बाले बाल इक स्वर्गदूते जो भेजया। जकर्याह कने उदी घरे बाली एलीशिबा परमेश्वरे दी इज्जत करदे थे। सै बड़े बुडे होई गियो थे, कने उना दे कोई बच्चा नी होया था।

उनी स्वर्गदूते जकर्याह जो बोलया, "तेरिया घरे बालिया इक पुत्र जमणा। तू उदा ना यूहन्ना रखयां। परमेश्वरे उसयो पवित्र आत्मा ने परिपूर्ण करणा, कने यूहन्ना लोकां जो मसीह जो अपनाणे तांई तैयार करणा।" जकर्याहे जवाब दिता, "मैं कने मेरी घरे बाली बच्चा पैदा करणे तांई बड़े बुडे न! मैं कियां मनी लें कि तुसां मिंझो ने सच बोला दे न?"

उस स्वर्गदूते जकर्याह जो जवाब दिता, "तेरे बाल इस शुभ संदेशे जो देणे तांई मिंजो परमेश्वरे भेजया। क्योंकि तू मिंजो पर भरोसा नी किता, इस तांई जालू दीकर बच्चे दा जन्म नी होई जांदा तू बोली सकणा।" तालू ही, जकर्याह दा बोलणा बंद होई गिया था। तालू सै स्वर्गदूत जकर्याह दे बखे ला चली गिया। इदे बाद, जकर्याह घरे जो मुड़ी आया कने उदी घरे बाली गर्भवती होई।

जालू एलीशिबा छे महीने दी गर्भवती थी, तां सेई स्वर्गदूत चाण चक एलीशिबा दे रिश्तेदारे पर प्रकट होया, जिदा ना मरियम था। मरियम कुँआरी थी कने वियाह होणे तांई यूसुफ नाऐ दे माणुऐ सोगी उदी मंगणी होई गियो थी। स्वर्गदूते बोलया, "तू गर्भवती होणा कने इक पुत्र जमणा। तु उदा ना यीशु रखयां। सै सर्व-शक्तिमान परमेश्वरे दा पुत्र होणा कने उनी सदा तांई शासन करणा।"

मरियमा जवाब दिता, "ऐ कियां होणा, क्योंकि मैं तां कुँआरी है?" उनी स्वर्गदूते समझाया, "पवित्र आत्मा तीजो पर ओणा, कने परमेश्वरे दिया शक्तिया तीजो पर छां करणी। इस तांई सै बच्चा पवित्र होणा, कने सै परमेश्वरे दा पुत्र होणा।" जड़ा उनी स्वर्गदूते बोलया उस पर मरियमा भरोसा किता।

ऐ होणे बाद ही, मरियमा जाई करी एलीशिबा ने मिल्ली। जियां ही मरियमा उसयो नमस्कार किता, एलीशिबा दा बच्चा पेटे अंदर उछलया। उना तांई परमेश्वरे जड़ा कितया था उदे तांई सै दोनों जनानियां खुश होइयां। एलीशिबा सोगी तिन महीने रेणे बाद, मरियम घरे जो मुड़ी आई।

इदे बाद, एलीशिबा अपणे बच्चे जो जन्म दिता। जकर्याह कने एलीशिबा उस बच्चे दा ना यूहन्ना रखया, जदिया कि उनी स्वर्गदूते बोलया था। तालू परमेश्वरे जकर्याह जो ठीक करी दिता कने सै बोलणा लगी पिया। जकर्याह बोलया, "परमेश्वरे दी स्तुति हो, क्योंकि उनी अपणे लोकां दी मदद करणा याद रखया है! हे मेरे पुत्र, तू सर्व-शक्तिमान परमेश्वरे दा संदेश देणे बाला होणा। तू लोकां जो दसणा है कि सै कियां अपणे पापां तांई माफी मंगी सकदे न! "