23. यीशु दा जन्म

यूसुफ नाए दे इक धर्मी माणुऐ सोगी मरियम दी मंगणी होई गियो थी। जालू उनी सुणया कि मरियम गर्भवती है तां सै जाणदा था कि सै उदा बच्चा नी है। पर सै मरियम जो बदनाम नी करणा चांदा था, इस तांई उनी उसा जो चुपचाप तलाख देणे दी सोची। पर इसला पेहले कि सै ऐसा करदा, इक स्वर्गदूते उदे सुपने च आई करी उसने गल्ल किती।

उनी स्वर्गदूते बोलया, "हे यूसुफ, मरियम जो अपणी लाड़ी बणाणे ला मत डर। उदे अंदर जड़ा बच्चा है सै पवित्र आत्मा दिया तरफा ला है। उना इक पुत्रे जो जन्म देणा। उदा ना यीशु रखयां (जिदा मतलब है, 'यहोवा बचादां है'), क्योंकि उनी लोकां जो उना दे पापां ला बचाणा।"

कने यूसुफे मरियम सोगी वियाह करी लिया कने उसा जो अपणी लाड़ी बणाई करी घरे जो लेई आया, पर बच्चा होणे दीकर सै उसा सोगी नी सुता।

जालू मरियमा दा बच्चा जमणे दा बकत नेड़े आया था, तालू उना कने यूसुफे बैतलहम शेहरे जो जाणे दा इक लम्बा सफर किता। उना जो ओथु जाणा ही था, क्योंकि रोमी अधिकारी इस्राएल च रेणे वाले सारे लोकां दी गिणती करणा चांदे थे। सै चांदे थे कि सारे लोक ओथु जान जिथू उना दे पूर्वज रेंदे थे। राजा दाऊदे दा जन्म बैतलहम शेहरे च होया था, कने सै मरियम कने यूसुफ दोनों दा पूर्वज था।

मरियम कने यूसुफ बैतलहम शेहरे च गे, पर ओथु इक गुराला जो दे इलाबा उना जो रेणे तांई कोई जगा नी मिल्ली थी। सेई जगा थी, जिथू मरियमा अपणे बच्चे जो जन्म दिता। उना उसयो खुरलिया च सुआया, क्योंकि ओथु उदे तांई कोई बिस्तर नी था। उना उदा ना यीशु रखया।

उसा राती, ओथु बखे ही खेतरे च कुछ पुआल अपणिया भेडां दी रखवाली करा दे थे। अचानक, इक चमकदार स्वर्गदूत उना पर प्रकट होया, कने सै डरी गे। उनी स्वर्गदूते बोलया, "मत डरा, क्योंकि मेरे बाल तुहाड़े तांई शुभ संदेश है। बैतलहम शेहरे च मसीह दा जन्म होया है!"

जाई करी उस बच्चे जो तोपा, कने तुहांजो सै कपड़े च लुपटोया कने खुरलिया च सुतया मिलणा।" चाण चक, अम्बर स्वर्गदूतां ने भरुई गिया। सै परमेश्वरे दी स्तुति करा दे थे। उना बोलया, "सारी महिमा स्वर्गे च विराजमान परमेश्वरे जो मिल्ले। धरती पर उना लोकां च शान्ति हो जिना दी सै चिन्ता करदा है!"

तालू स्वर्गदूत चली गे। सै पुआल भी अपणियां भेडां जो छडी करी बच्चे जो दिखणा गे। थोड़िया देरा बाद ही सै उसा जगा पर पुज्जे जिथू यीशु था कने उना उसयो खुरलिया च लेटया दिखया, जदिया उनी स्वर्गदूते बोलया था। सै बड़े खुश थे। तालू सै पुआल बापस मुड़ी आए जिथू उना दियां भेडां थियां। उना जड़ा कुछ भी सुणया कने दिखया उस तांई सै परमेश्वरे दी स्तुति करा दे थे।

पूर्व च दूर इक देशे च कुछ आदमी थे। सै तारयां दे बारे च जाणदे थे कने सै बड़े बुद्धिमान थे। उना इक अजीव तारे जो अम्बरे च दिखया। उना बोलया कि इदा मतलब है कि यहूदियां दे इक नोए राजे दा जन्म होया है। इस तांई उना उस बच्चे जो दिखणे तांई अपणे देशे ला यात्रा करणे दा फेसला किता। एक लंबी यात्रा दे बाद, सै बैतलहम शेहरे च आऐ कने उस घरे जो आए जिथू यीशु कने उदे माता-पिता रे दे थे।

जालू इना आदमियां यीशुऐ जो अपणिया माऊ सोगी दिखया तां उना गोडयां भार बेई करी उदी आराधना किती। उना यीशुऐ जो कीमती तौफे दिते। फिरी सै चली गे।