24. यूहन्ना यीशु जो बपतिस्मा दिंदा है

एलीशिबा कने जकर्याह दा पुत्र यूहन्ना, बडा होई करी एक परमेश्वरे दा संदेश देणे बाला बणी गिया। सै बणे च रेंदा था, कने जंगली मखिर कने टिड्डियां खांदा था, कने उंटे दे रोमे ने बणयो कपड़े पेहनदा था।

मते भरी लोक यूहन्ना दियां गल्लां सुणने तांई बणे च आए। उनी उना जो ऐ बोलीकरी प्रचार किता कि, "पश्चाताप करा, क्योंकि स्वर्गे दा राज्य नेड़े है!"

जालू लोकां यूहन्ना दे संदेश जो सुणया, तां उना चे मतयां अपणे पापां ला पश्चाताप किता, कने यूहन्ना उना जो बपतिस्मा दिता। यूहन्ना जो दिखणे तांई बड़े धार्मिक अगुवे भी आए, पर उना अपणे पापां ला पश्चाताप नी किता।

यूहन्ना धार्मिक अगुवों जो बोलया, "हे जहरीले सपों! पश्चाताप करा कने अपणे व्यवहारे जो बदला। परमेश्वरे उना सारे रुखां जो बडी देणा है जड़े खरा फल नी दिंदे, कने उनी उना जो अग्गी च सुटी देणा।" जड़ा परमेश्वरे दा संदेश देणे बालयां बोलया था यूहन्ना उसयो पूरा किता, "दिख, जल्दी ही मैं तेरे अग्गे अपणे संदेश देणे बाले जो भेजणा है, जिनी तेरे तांई रस्ता तैयार करणा।"

कुछ धार्मिक अगुवयां यूहन्ना ला पूछया कि क्या सै मसीह है। यूहन्ना जवाब दिता, "मैं मसीह नी है, पर उनी मेरे बाद ओणा है। सै इतना महान है कि मैं उदे जूतयां दे तस्मयां खोलणे दे भी काबिल नी है।"

अगले दिने, यीशु बपतिस्मा लेणे तांई यूहन्ना बाल आया। जालू यूहन्ना उसयो दिखया, तां उनी बोलया, "दिखा! परमेश्वरे दा मेमना जिनी संसारे दे पापां जो चुकी करी लेई जाणा।"

यूहन्ना यीशुऐ ने बोलया, "मैं तीजो बपतिस्मा देणे दे काबिल नी है। जरूरी ऐ है कि तू मिंजो बपतिस्मा दे।" पर यीशुऐ बोलया, "तीजो मिंजो बपतिस्मा देणा चाइदा, क्योंकि करणे तांई ठीक कम्म ऐई है।" फिरी यूहन्ना उसयो बपतिस्मा दिता, कने यीशुऐ कदी भी पाप नी कितया था।

बपतिस्मा लेणे बाद जालू यीशु पाणिऐ ला बाहर आया, तां परमेश्वरे दी आत्मा कबूतरे दे रूपे च प्रकट होई कने थले आई करी उस पर रुकी गेई। तालू ही, परमेश्वरे स्वर्ग ला गल्ल किती। उनी बोलया, "तू मेरा पुत्र है। मैं तीजो ला प्यार करदा है, कने मैं तीजो ला खुश है।"

परमेश्वरे यूहन्ना ला बोलया था, "पवित्र आत्मा आई करी कुसी पर रुकी जाणा जिसयो तू बपतिस्मा देणा।" सेई परमेश्वरे दा पुत्र है परमेश्वर इक ही है। पर जालू यूहन्ना यीशुऐ जो बपतिस्मा दिता, तां उनी परमेश्वर पिता जो गल्लां करदे सुणया, पुत्र परमेश्वरे जो दिखया, जड़ा कि यीशु है, कने उनी पवित्र आत्मा जो दिखया।