25. शैतान यीशुऐ दी परीक्षा लेंदा है

यीशु दा बपतिस्मा होणे बाद तालू ही, पवित्र आत्मा उसयो बणे च लेई गिया। यीशु ओथु चाली दिन कने चाली राती रिया था। उना दिना उनी बरत रखे, कने शैताने यीशुऐ बाल आई करी पाप कराणे तांई उदी परीक्षा लेई।

पेहले, शैताने यीशुऐ जो बोलया, "अगर तू परमेश्वरे दा पुत्र है तां इन पत्थरां जो रोटी बणाई दे ताकि तू खाई सके!"

पर यीशुऐ शैताने जो बोलया, "परमेश्वरे दे वचन च ऐ लिखया है, 'जिन्दा रेणे तांई माणुऐ जो सिर्फ रोटी दी जरूरत नी है, पर उसा हर गल्ला दी जरूरत है जड़ा परमेश्वर उना जो बोलदा है!'"

तालू शैतान यीशुऐ जो मंदरे दी सारयां ला उच्चिया जगा पर लेई गिया। उनी यीशुऐ जो बोलया, "अगर तू परमेश्वरे दा पुत्र है तां एथू ला ही थले छाल मारी दे, क्योंकि लिखया है, 'परमेश्वरे तीजो बचाणे तांई अपणे स्वर्गदूतां जो हुकम देणा कि तेरे पैरां च पत्थरे ने चोट ना लग्गे।'"

पर यीशुऐ सै नी किता जड़ा शैताने उसयो करणे तांई बोलया था। इदे बदले, उनी बोलया, "परमेश्वर हर इकी जो बोलदा है, 'तू अपणे परमेश्वरे दी परीक्षा मत लेंदा।'"

फिरी शैताने उसयो संसार दे सारे राज्य दस्से। उनी उसयो दसया कि सै कितणे शक्तिशाली थे, कने सै कितणे खरे थे। उनी यीशुऐ जो बोलया, "मैं तीजो ऐ सब दिंगा अगर तू गोडे भार बेई करी मेरी भक्ति करे।"

यीशुऐ जवाब दिता, "हे शैतान, मेरे बखे ला चली जा! परमेश्वरे दे वचने च सै लोकां जो हुकम दिंदा है, 'सिर्फ अपणे प्रभु परमेश्वरे दी आराधना करा। परमेश्वरे दे रूपे च सिर्फ उदा ही आदर करा।'"

यीशुऐ शैताने दिया परीक्षा ला हार नी मनी, इस तांई शैतान उदे बखे ला चली गिया। तालू स्वर्गदूत आई करी यीशुऐ दी सेवा करणा लगे।