26. यीशु अपणी सेवा शुरू करदा है

शैताने ला परीक्षा लेणे बाद बाद, यीशु वापिस गलील दे इलाके च आया। ऐई सै जगा है जिथू सै रेंदा था। पवित्र आत्मा उसयो बड़ी शक्ति दे दा था, कने यीशु इकी जगा ला दुज्जी जगा जो गिया कने लोकां जो शिक्षा दिती। सारयां उदे बारे च खरियां गल्लां कीतियां।

यीशु नासरत शेहरे च गिया। ऐ सै ग्रां है, जिथू सै छोटे होंदे रेंदा था। सब्त दे दिने, सै आराधना करणे दिया जगा पर गया। अगुवयां उसयो यशायाह परमेश्वरे दा संदेश देणे बाले दी इक कताब दिती। सै चांदे थे कि सै उसा कताबा चे पढ़े। कने यीशुऐ उसा कताबा जो खोली करी उदे इक हिस्से जो लोकां तांई पढ़या।

यीशुऐ पढ़या, "परमेश्वरे मिंजो अपणा आत्मा दितया है ताकि मैं कंगालां च शुभसमाचार दा प्रचार करी सकें। उनी मिंजो इस तांई भेजया है कि कैदियों जो आजाद करां, अनन्यां जो ह्खी दें, कने उना जो छुटकारा दें जीना जो दुज्जे लोक सता दे न। ऐ सै बकत है जालू परमेश्वरे सांझो पर दया करणी कने साड़ी सहायता करणी।"

फिरी यीशु बेई गिया। सारे लोक उसयो बड़े ध्याने ला दिखा दे थे। सै जाणदे थे कि पवित्रशास्त्र दा जड़ा हिस्सा उनी हुण पढ़या था सै मसीह दे बारे च था। यीशुऐ बोलया, "जड़ियां गल्लां मैं हुण तुहाड़े तांई पढ़ियां न, सै इस बकत होआ दियां न।" सारे लोक हेरान थे। उना बोलया, "क्या ऐ यूसुफे दा पुत्र नी है?"

तालू यीशुऐ बोलया, "ऐ सच है कि लोक कुसी ऐसे संदेश देणे बाले जो नी अपनांदे जड़ा उना दे शेहरे च पलया-बडूया हो। एलिय्याह परमेश्वरे दा संदेश देणे बाले दे बकते च, इस्राएल च मतियां विधवा जनानियां थियां। पर जालू साढ़े तिना सालां दीकर बरखा नी होई तां परमेश्वरे एलिय्याह जो इस्राएल च कुसी विधवा दी सहायता करणे तांई भेजया। इदे बजाए, उनी एलिय्याह जो कुसी होर देशे दियां विधवा बाल भेजा।"

यीशु बोलदा रिया, "कने एलीशा परमेश्वरे दे संदेश देणे बाले दे बकते च, इस्राएल च मते लोक चमड़िया दे रोगे ने बीमार थे। पर एलीशा उना चे कुसी जो भी ठीक नी किता। उनी सिर्फ इस्राएल दे दुशमणा दे सेनापति नामान जो ठीक किता।" पर जड़े लोक यीशु जो सुणा दे थे सै यहूदी थे। इस तांई जालू उना उसयो ऐ बोलदे सुणया तां सै उस पर गुस्सा होए।

नासरत दे लोकां यीशुऐ जो पकड़ी लिया कने उसयो आराधना दिया जगा ला घसीटी करी बाहर लेई गे। सै उसयो मारी देणे तांई थले फेंकणे जो इक चट्टाना पर लेई गे। पर यीशु भिड़ा चे निकली गिया कने नासरत शेहरे जो छडी करी चली गिया।

फिरी यीशु सारे गलील दे इलाक्यां च गिया, कने बड़ी भीड़ उदे बाल आई। सै ऐसे मते लोकां जो लेई करी आए जड़े बीमार कने विकलांग थे। उना चे कुछ दिखी, चली, सुणी या बोली नी सकदे थे, कने यीशुऐ उना जो ठीक किता।

इदे ईलावा, मते ऐसे लोक यीशुऐ बाल आए, जिना च बुरियां आत्मा थियां। यीशुऐ उना चे बुरियां आत्मा जो निकली जाणे दा हुकम दिता। सै बुरियां आत्मा हमेशा चिल्लादियां थियां, "तू परमेश्वरे दा पुत्र है!" भिड़ा दे लोक हेरान थे, कने उना परमेश्वरे दी स्तुति किती।

फिरी यीशुऐ बारहा चेलयां जो चुणया जिना जो उनी अपणे प्रेरित बोलया। उना प्रेरितों उदे सोगी यात्रा किती कने उसला शिक्षा लेई।