27. दयालु सामरी दी कहाणी

इक दिन, यहूदी व्यवस्था दा इक जाणकार यीशुऐ बाल आया। सै सारयां जो ऐ दसणा चांदा था कि यीशु गलत तरीके ने शिक्षा दे दा था। उनी बोलया, "हे गुरु, हमेशा दी जिन्दगी तांई मैं क्या करें?" यीशुऐ जवाब दिता, "परमेश्वरे दिया व्यवस्था च क्या लिखया है?"

उनी आदमिये बोलया, "व्यबस्था बोल्दी है कि अपणे परमेश्वरे सोगी सारे मन, प्राण, शक्ति, कने बुद्धि ने प्यार रख। कने अपणे पड़ोसिए सोगी अपणे सांई प्यार रख।" यीशुऐ जवाब दिता, "तू एकदम सही है! अगर तू ऐसा करे, तां तीजो हमेशा दी जिन्दगी मिलणी।"

पर सै व्यवस्था दा जाणकार लोकां जो दसणा चांदा था, कि उदा जिन्दगी जिणे दा तरीका खरा था। इस तांई उनी यीशुऐ ला पूछया, "ठीक है, तां मेरा पड़ोसी कुण है?"

यीशुऐ उस व्यवस्था दे जाणकारे जो इक कहाणी सुणाई करी जबाब दिता। "इक यहूदी माणु था जड़ा इक रस्ते ला होई करी यरूशलेम शेहरे ला यरीहो शेहरे जो चलया था।"

पर कुछ डाकुआं उसयो दिखया कने उस पर हमला करी दिता। उना उदा सब कुछ लेई लिया कने उसयो मारी-कुटी करी अधमरा करी री ओथु ला चली गे।

उदे थोड़े दे बकते बाद, इक यहूदी याजक उसा ही सड़का ला होकरी गिया। उनी याजके उस आदमिए जो सड़का पर पिया दिखया। जालू उनी उसयो दिखया तां सै सड़का दे पासे ला होई करी अग्गे चली गिया। उनी उस आदमिए जो दिखी करी अणदिखा करी दिता।

इदिया थोड़िया देरा बाद, इक लेवी उसा सड़का पर आया। (लेवी यहूदियों दा इक गोत्र था जीना मंदरे च याजकां दी सहायता किती थी।) सै लेवी भी सड़का दे दुज्जे पासे ला होई करी चली गिया। उनी भी उस आदमिए जो अणदिखा करी दिता।

अगला बन्दा जड़ा उसा सड़का पर आया सै सामरियां दा इक मर्द था। (सामरी कने यहूदी इक दुज्जे ने नफरत करदे थे।) उनी सामरिए सड़का पर उस आदमिए जो दिखया। उनी दिखया कि सै यहूदी था, पर फिरी भी उनी उस पर तरस खादा। कने सै उदे बखे गिया कने उदे जखमा पर पट्टियां बनियां।

फिरी उनी सामरिए उस माणुऐ जो अपणे गधे पर रखया कने उसयो उसा सड़का ला इक सरां च लेई गिया। जिथू सै उदी देखभाल करदा रिया।

अगले रोजे, उस सामरिए जो जाणा जरूरी था जिथू सै चलया था। उनी उस सरां दे मालिके जो कुछ पैसे दिते। उनी उसयो बोलया, "इस माणुऐ दी देखभाल करयां। अगर इस पैसे दे इलाबा तेरा कोई होर खर्च होंगा तां मैं से मुड़ी करी जालू ओंगा तां देई दिंगा।"

फिरी यीशुऐ उस व्यवस्था दे जाण कारे ला पूछया, "तू क्या सोचदा है? इना तिना लोकां चे कुण उस माणुऐ दा पड़ोसी है जिसया लूटया कने मारया था?" उनी जवाब दिता, "सेई जिनी उस पर दया किती।" यीशुऐ उसयो बोलया, "तू जा कने ऐसा ही कर।"