28. धनी जवान शासक

इक दिन, इक अमीर जवान शासके यीशुऐ बाल आई करी उसयो पूछया, "हे उत्तम गुरु, हमेशा दी जिन्दगी जिणे तांई मिंजो क्या करणा चाइदा?" यीशुऐ उसयो बोलया, "तू मिंजो 'उत्तम' कजो बोलदा है? सिर्फ इक ही उत्तम है कने सै परमेश्वर है। पर अगर तू हमेशा दी जिन्दगी पाणा चांदा है तां परमेश्वरे दिया व्यवस्था दा पालन कर।"

उनी पूछया, "मिंजो कुण-कुण दे हुकमा जो मनणे दी जरूरत है?"। यीशुऐ जवाब दिता, "कुसी दी हत्या नी करणी, व्यभिचार नी करणा, चोरी नी करणी, झूठ नी बोलणा, अपणे पिता कने माता दा आदर करयां, कने अपणे पड़ोसी ने अपणे सांई प्यार करयां।"

पर उनी जवान मर्दे बोलया, "मैं अपणे बचपन ला ही इना सारे हुकमा जो मंदा आया है। मिंजो हमेशा तांई जिन्दा रेणे जो हले भी क्या करणे दी जरूरत है?" यीशुऐ उस पासे प्यारे ने दिखया।

यीशुऐ जवाब दिता, "अगर तू सिद्ध होणा चांदा है तां जाई करी अपणा सब कुछ बेची दे कने सै धन गरीबां च बंडी दे, कने तीजो स्वर्गे च धन मिलणा। तां फिरी आई करी मेरे पीछे चली पोयां।"

यीशुऐ जड़ा बोलया सै जालू उनी जवान मर्दे सुणया तां बड़ा उदास होई गिया, क्योंकि सै बड़ा अमीर था कने सै अपणिया सारिया धन दौलता जो देणा नी चांदा था। सै मुड़ी करी यीशुऐ बखे ला चली गिया।

तालू यीशुऐ अपणे चेलयां जो बोलया, "परमेश्वरे दे राज्य च अमीर लोकां दा जाणा बड़ा मुश्किल है! हाँ, इक अमीर मर्दे दे परमेश्वरे दे राज्य च प्रवेश करणे दी तुलना च कुसी ऊँटे दा सूईया दे नके च निकली जाणा आसान है।"

जड़ा यीशुऐ बोलया सै जालू चेलयां सुणया तां सै हेरान थे। उना बोलया, "अगर ऐसा है तां परमेश्वरे कुसयो बचाणा?"

यीशुऐ चेलयां पासे दिखया कने बोलया, "लोकां तांई अपणा उद्धार करणा नामुनकिन है। पर परमेश्वरे तांई कुछ भी करणा नामुनकिन नी है।"

पतरसे यीशुऐ ने बोलया, "असां चेले अपणा सब कुछ छडी करी तेरे पीछे चलयो न। तां साड़ा इनाम क्या होणा?"

यीशुऐ जवाब दिता, "हर एक जणा जिनी मेरिया बजा ला घर, भाई, बेहण, पिता, माता, बच्चे, या अपणिया जगा जमिना जो छड़या है, उसयो 100 गुणा जादा मिलणा कने हमेशा दी जिन्दगी भी मिलणी। पर मते जड़े पेहले न सै पिछले होंणे, कने मते जड़ पिछले न सै पेहले होंणे।"