29. निर्दयी नोकरे दी कहाणी

इक दिन, पतरसे यीशुऐ ला पूछया, "हे मालिक, मिंजो अपणे भाईए जो कितनी बरी माफ़ करणा चाइदा, जालू सै मेरे खिलाफ कोई पाप करदा है? क्या सत बरी दीकर?" यीशुऐ बोलया, "सत बरी नी, पर सत दे सत्तर बार!" यीशुऐ दा बोलणे दा मतलब है कि सांझो हमेशा माफ करणा चाईदा। तालू यीशुऐ इक कहाणी सुणाई।

यीशुऐ बोलया, "परमेश्वरे दा राज्य इक राजा सांई है जड़ा अपणे नोकरे ला लेखा जोखा लेणा चांदा था। उदा इक नोकर दस हजार तोड़यां दे इक बडे कर्ज दा कर्जदार था।"

पर सै नोकर अपणे कर्जे जो नी देई सकया, इस तांई राजे बोलया, "इदा कर्ज चुकाणे तांई इस नोकरे जो कने इदे परिवारे जो नोकरां दे रूपे च बेची दिया।"

उनी नोकरे राजे सामणे गोडे भार बेई करी बोलया, 'मिंजो पर दया कर कने सबर रख, मैं अपणे सारे कर्जे जो चुकाई दिंगा।' राजे उस पर दया किती, कने उनी उदे सारे कर्जे जो माफ करी दिता कने उसयो जाणा दिता।

पर जालू सै नोकर राजा दे दरबारे ला बाहर गिया, तां उसयो उदा इक साथी नोकर मिला जड़ा उदे चार सौ दिनारा दा कर्जदार था। उनी नोकरे अपणे साथी नोकरे जो पकड़ी लिया कने बोलया, 'जड़ा तेरे ऊपर मेरा कर्ज है मिंजो उदा भुगतान कर!

उनी साथी नोकरे पैरां पेई करी बोलया, 'मिंजो पर दया कर, कने मैं अपणे कर्ज दिया पुरिया रकमा दा भुगतान करी दिंगा।' पर उनी नोकरे अपणे साथी नोकरे जो जेला च पाई दिता, जालू दीकर कि सै उस कर्जे दा भुगतान नी करी दे।

जड़ा कुछ होया था उसयो कुछ होर नोकरां दिखया कने सै बड़े परेशान होए। सै राजा बाल गे कने उसयो सब कुछ दसया।

राजे उस नोकरे जो सदी करी बोलया, 'हे दुष्ट नोकर! मैं तेरा कर्ज इस तांई माफ किता था क्योंकि तू मिंजो ने विनती किती थी। तीजो भी इयां ही करणा चाइदा था।' राजा इतणा गुस्सा था कि उनी उस दुष्ट नोकरे जो जेला च पाई दिता जालू दीकर कि सै अपणे सारे कर्जे दा भुगतान नी करी दे।

तालू यीशुऐ बोलया, "मेरा स्वर्गे च विराजमान पिता भी तुहांजो चे हर इकी सोगी इयां करणा अगर तुसां अपणे भाईऐ जो दिले ला माफ नी करदे।"