30. यीशु पंज हजार लोकां जो खाणा खुआंदा है

यीशुऐ अपणे प्रेरितां जो प्रचार करणे तांई कने लोकां जो शिक्षा देणे तांई मतियां लग-लग जगा च भेजया। जालू सै उना जगा ला बापिस मुड़ी करी यीशु बाल आए तां उना उसयो दसया कि उना क्या- क्या कितया था। तालू यीशुऐ उना जो झीला दे दुऐ पासे उदे सोगी इक शान्त जगा पर जाई करी कुछ बकत आराम करणे तांई सदया। कने सै इकी किस्तिया पर चड़ी करी झिला दे दुज्जे पासे गे।

पर ओथु मते ऐसे लोक थे जीना यीशु कने चेलयां जो किस्तिया च जांदे दिखया था। ऐ लोक उना ला पेहले झिला दे दुज्जे पासे जाणे तांई झिला दे बखे-बखे ला दौड़े। कने जालू यीशु कने चेले ओथु पुज्जे तां लोकां दी इक बड़ी बडी भीड़ ओथु पहले ला इन्तजार करा दी थी।

उसा भिड़ा च जनानियां कने बच्चयां जो गिणयो बिना 5,000 ला जादा मर्द थे। यीशुऐ उना लोकां पर बड़ा तरस आया। यीशुऐ तांई सै लोक बिना पुहाले दियां भेडां सांई थे। इस तांई उनी उना जो शिक्षा दिती कने उना दे बीच जड़े लोक बीमार थे उना जो ठीक किता।

संझा चेलयां यीशुऐ ने बोलया, "हुण देर होई गियो है कने अखे बखे कोई शेहर नी है। इना लोकां जो भेजी दे ताकि ऐ जाई करी कुछ अपणे खाणे दा इंतजाम करन।"

पर यीशुऐ चेलयां जो बोलया, "तुसां उना जो खाणे तांई दिया!" उना जवाब दिता, "असां ऐसा कियां करी सकदे न? साड़े बाल सिर्फ पंज रोटियां कने दो छोटियां मच्छियां न।"

यीशुऐ अपणे चेलयां जो बोलया कि इना लोकां जो घाऐ पर पंजां-पंजा करी री बोणे तांई बोला।

तालू यीशुऐ पंज रोटियां कने दो मछियां लियां कने स्वर्गे पासे दिखया, कने उस खाणे तांई परमेश्वरे जो धन्यवाद किता।

फिरी यीशुऐ रोटी कने मच्छियां दे दुकड़े किते। उनी लोकां जो देणे तांई अपणे चेलयां जो सै टुकड़े दिते। चेले उस खाणे जो बंडदे रे, कने सै कदी मुकया नी! सै सारे लोक खाई करी रजी गे।

उदे बाद, चेलयां उस खाणे जो गठेरया जिसयो लोकां खादया नी था कने उसने बारा टोकरियां भरुई गियां! सै सारा खाणा उना पंज रोटियां कने दो मच्छियां ला आया था।