31. यीशु पाणिऐ पर चलदा है

पंज हजार लोकां जो खाणा खुआणे बाद, यीशुऐ अपणे चेलयां जो किस्तिया च जाणे तांई बोलया। उनी उना जो झीला दे दुज्जे पासे चली जाणे तांई बोलया कने सै थोड़े बकते तांई ओथु ही रुकी गिया। चेले चली गे कने यीशुऐ भिड़ा जो विदा किता ताकि सै अपणे घरे जो जान। इदे बाद, यीशु प्रार्थना करणे तांई इकी पहाड़े पर चली गिया। ओथु सै किला ही था, कने उनी देर राती दीकर प्रार्थना किती।

उस बकत, चेले अपणिया किस्तिया जो चपू मारी करी चलयो थे, पर होआ उना दे खिलाफ बड़ी जोरे ला चलियो थी। रात बड़ी जादा होई जाणे पर भी सै सिर्फ झीला दे बीच ही पुजयो थे।

उस बकत यीशुऐ प्रार्थना करणा खत्म किता कने अपणे चेलयां बाल बापिस जाणा शुरू किता। सै किस्तिया पासे जाणे तांई पाणिऐ पर चलणा लग्गा।

तालू चेलयां उसयो दिखया। सै बड़े डरी गे क्योंकि उना सोचया था कि सै कोई भूत है। यीशु जाणदा था कि सै डरी गियो थे, इस तांई उनी उना जो हक पाई करी बोलया, "डरा मत, ऐ मैं ही है!"

तालू पतरसे यीशुऐ बोलया, "हे प्रभु, अगर ऐ तू है तां मिंजो पाणिऐ पर चली करी तेरे बाल आणे दा हुकम दे।" यीशुऐ पतरसे जो बोलया, "आ!"

पतरस किस्तिया ला उतरी गिया कने यीशुऐ बाल जाणे तांई पाणिऐ पर चलणा शुरू किता। पर थोड़ी दूर जाई करी, उनी अपणिया हखी यीशुऐ ला फेरी लियां कने लेहरां जो दिखणा कने तेज होआ जो मेहसूस करणा शुरू करी दिता।

तालू पतरस डरी गिया कने डूबणा लगी पिया। से चिल्लाया, "हे प्रभु, मिंजो बचा!" यीशुऐ तालू ही हथ अग्गे करी उसयो पकड़ी लिया। तालू उनी पतरसे बोलया, "तेरा भरोसा बड़ा घट है! तू भरोसा कनी किता की मैं तीजो बचाई लेणा है?"

तालू यीशु कने पतरस किस्तिया पर चढ़ी गे, कने तालू ही होआ चलणा बंद होई गेई। पाणी शान्त होई गिया। चेले हेरान होई करी यीशुऐ अग्गे झुकी गे। उना उदी आराधना किती कने उसयो बोलया, "सच्ची तू परमेश्वरे दा पुत्र है।"