32. यीशु इक बुरिया आत्मा ने दुखी बंदे जो कने इक बुरिया जनानिया जो ठीक करदा है

यीशु कने उदे चेले अपणिया किस्तिया च उसा जगा पर गे जिथू गिरासेनी लोक रेंदे थे। सै उसा जगा च पुज्जी करी किस्तिया ला उतरी गे।

ओथु इक माणु था जड़ा बुरिया आत्मा ने दुखी था।

ऐ माणु इतणा जोरे बाला था कि कोई भी उसयो काबू च नी करी सकदा था। केई बरी लोकां उदे हथा कने पैरां जो सुंगला ने भी बनया, पर सै उना जो तोड़ी दिंदा था।

सै माणु उस इलाके दे कब्रिस्तान च रेंदा था। ऐ माणु पूरा दिन कने पूरी रात बकदा रेंदा था। सै कपड़े नी पेहनदा था कने अपु जो पत्थरां ने मारदा रेंदा।

सै माणु दौड़ी करी यीशुऐ बाल आया कने उदे सामणे गोडे भार बेई गिया। तालू यीशुऐ उस माणुऐ दे अंदरे दिया बुरिया आत्मा ने गल्ल किती कने बोलया, "इस माणुऐ ला बाहर निकली आ!"

उना बुरिया आत्मा जोरे ने चिंड मारी करी बोलया, "हे यीशु, परम प्रधान परमेश्वरे दे पुत्र, तीजो मिंजो ने क्या कम्म? दया कर मिंजो मत सता!" तालू यीशुऐ उस बुरिया आत्मा ला पूछया, "तेरा ना क्या है?" उनी जवाब दिता, "मेरा ना सेना है, क्योंकि असां मते न।" (रोमी सेना च केई हजार सैनिकां दे झुंडे जो "सेना" बोलदे थे।)

उना बुरियां आत्मा यीशुऐ ला विनती किती, "सांझो इस इलाके ला बाहर मत भेज!" ओथु ही बखे पहाड़े पर सूअरां दा एक झुंड चुगा दा था। इस उना बुरियां आत्मा यीशुऐ ने विनती किती, "की सांझो उना सूअरां च भेजी दे!" यीशुऐ बोलया, "ठीक है, उना च चली जा!"

सै बुरियां आत्मा उस माणुऐ ला निकली करी उना सूअरां च चली गियां। उना सूअरां दौड़ी करी इक खड़े सपड़े ला झीला च छाल मारी दिती कने डूबी मरे। उस झुंडे च लगभग 2,000 सूअर थे।

ओथु उना सूअरां दी देखभाल करणे बाले लोक थे। जड़ा कुछ होया था, जालू उना दिखया तां सै लोक अपणे ग्रां जो नठी गे। यीशुऐ जड़ा कितया था ओथु उना सबना जो दसया। उस ग्रां दे लोक ओथु आए कने उस माणुऐ जो दिखया जिदे च बुरियां आत्मा थियां। सै शान्ति ने, कपड़े पेहनी करी, कने इक आम बंदे सांई बैठया था।

सै लोक बड़े डरयो थे कने उना यीशुऐ जो एथू ला चली जाणे तांई बोलया। यीशु किस्तिया पर चढ़ी गिया। सै माणु जिदे च बुरियां आत्मा थियां उनी यीशुऐ सोगी जाणे दी विनती किती।

पर यीशुऐ उसयो बोलया, "नी। मैं चांदा है कि तू घरे जाई करी सारयां जो दस कि परमेश्वरे तेरे तांई क्या कितया है। उना जो दस कि कियां परमेश्वरे तीजो पर दया किती थी।"

इस तांई सै माणु ओथु ला चली गिया कने सारयां जो इस बारे च दसया जड़ा यीशुऐ उदे तांई कितया था। उदी कहाणी सुणने वाला हर एक जणा हेरान होआ दा था।

यीशु झीला दे दुज्जे पासे आया। ओथु पुजणे बाद, इक बड़ी बडी भीड़ उदे बखे गठोई गेई। उस भिड़ा चे इक जनानी थी जिसा जो बारहा सालां ला खून चलणे दी बिमारी थी। उनी अपणा सारा पैसा ठीक होणे च लाइ दितया था ताकि सै उसयो ठीक करी सकन, पर उदा रोग होर भी बिगड़ी गिया था।

उना सुणया था कि यीशुऐ केई बीमार लोकां जो ठीक कितया था कने उना सोचया, "मिंजो यकीन है कि अगर मैं सिर्फ यीशुऐ दे कपड़यां जो ही छूई लें, तां मैं भी ठीक होई जाणा!" इस तांई सै यीशु दे पीछे ला आई कने उदे कपड़यां जो छूई लिया। जियां ही उना यीशुऐ दे कपड़यां जो छुता, उसा दा खून चलणा बंद होई गिया।

तालू ही, यीशुऐ जो पता लगी गिया कि उदे ला शक्ति निकली है। इस तांई उनी पीछे मुड़ी करी पूछया, "मिंजो कुनी छूता?" चेलयां जवाब दिता, "एथू इतणे सारे लोकां तेरे चारो पासे भीड़ लाईयो है, कने तीजो धके दे द न। तां तू कजो पूछा दा है कि मिंजो कुनी छूता है?"

सै जनानी यीशुऐ सामणे कमदी कने डरदी होई गोडे भार बेई गेई। तालू उनी उसयो बोली दिता कि उनी क्या कितया है, कने ऐ भी कि सै ठीक होई गेई है। यीशुऐ उसयो बोलया, "तेरे भरोसे तीजो ठीक कितया है। शान्ति ने जा।"