34. यीशु होर कहाणियां दी शिक्षा दिंदा है

यीशुऐ परमेश्वरे दे राज्य दे बारे च होर मतियां कहाणियां सुणाईयां। उदाहरण तांई, उनी बोलया, "परमेश्वरे दा राज्य इक राई दे बीए सांई है जिसयो कुनी अपणे खेतरे च राई दिता। तुसां जाणदे न कि राईया दा बी सारे बियां ला छोटा होंदा है।"

पर जालू राई दा बी बडा होई जांदा है तां सै बगीचे दे सारे रुखां चे सारयां ला बडा होई जांदा है, इतना बडा कि पंछी आई करी उदियां डालियां पर आराम करदे न।

यीशुऐ इक होर कहाणी दस्सी, "परमेश्वरे दा राज्य खमीरे सांई है जिसयो इकी जनानिया आटे च मिलाई दिन्दी है तालू सै सारे पेड़े च होई जांदा है।"

स्वर्ग दा राज्य उस खजाने सांई है जिसयो कुनी खेतरे च लुकाई दितया। कुसी होर बंदे जो सै खजाना मिली गिया कने उनी उसयो पाणे दी बड़ी इच्छा किती। इस तांई उनी उसयो फिरी दबी दिता। सै खुशिया ने इतना भरुया था कि उनी जाई करी अपणा सारा कुछ बेची दिता ताकि सै उस खेतरे जो खरीदी सके जिथू सै खजाना था।

स्वर्गे दा राज्य इक बड़े कीमती शुद्ध मोतिए सांई भी है। जालू कोई मोतियों दा व्यापारी उसयो पाई लेंदा है तां सै उसयो खरीदणे तांई अपणा सारा कुछ बेची दिंदा है।

ओथु कुछ लोक थे जड़े सोचदे थे कि परमेश्वरे उना जो इस तांई अपनाणा क्योंकि सै भले कम्म करा दे न। ऐ लोक ऐसे लोकां जो तुच्छ मंदे थे जड़े उना भले कमा जो नी करदे थे। इस तांई यीशुऐ उना जो ऐ कहाणी सुणाई, "दो मर्द थे कने दोनों ही प्रार्थना करणे तांई मंदरे च गे। उना चे इक चुंगी लेणे वाला था, कने दुज्जा इक धार्मिक अगुवा था।"

उस धार्मिक अगुवे ऐ बोली करी प्रार्थना किती, 'हे परमेश्वर, तेरा धन्यवाद हो कि मैं होर लोकां सांई –जियां कि डाकू, अन्यायी माणु, व्यभिचारी, या एथू दीकर कि जड़ा एथू चुंगी लेणे बाले सांई पापी नी है।'

उदाहरण तांई, मैं हर हप्ते दो बरी बरत रखदा है, कने मिंजो मिलणे बाले पैसे कने चीजां दां दसमा हिस्सा तीजो दिंदा है।

पर सै चुंगी लेणे बाला उस धार्मिक अगुवे ला बड़ा दूर खड़ोई गिया। उनी ऊपर स्वर्गे पासे हखी भी नी चुकियां। इदे बजाए, उनी अपु मुट्ठी ला अपणिया छाती जो पिटया कने प्रार्थना किती, 'हे परमेश्वर, मिंजो पर दया कर क्योंकि मैं इक पापी है।'

फिरी यीशुऐ बोलया, "मैं तुहांजो सच बोलदा है, परमेश्वरे उस चुंगी लेणे बाले दी प्रार्थना जो सुणया कने उसयो धर्मी घोषित किता। पर उनी उस धार्मिक अगुवे दिया प्रार्थना जो पसंद नी किता। परमेश्वरे हर इकी घमंडी दे सिरे जो थले करणा, पर उनी हर उस बंदे जो आदर देणा जड़ा अप्पू जो नम्र करदा है।"