35. दयालु पिता दी कहाणी

इक दिन, यीशु उना मतयां लोकां जो शिक्षा दे दा था जड़े उदी सुणने तांई गिठे होयो थे। ऐ लोक चुंगी लेणे बाले कने उना सोगी होर लोक भी थे जिना मूसा दिया व्यवस्था दा पालन करणे दी कोशिश नी कीतियो थी।

कुछ धार्मिक अगुवयां दिखया कि यीशु इना लोकां सोगी एक मित्रे सांई गल्ल करा दा था। इस तांई उना इक दुज्जे ला ऐ बोलणा शुरू करी दिता कि सै गलत करा दा है। यीशुऐ उना जो गल्लां करदे सुणया, इस तांई उनी उनो जो ऐ कहाणी सुणाई।

एक माणु था जिदे दो पुत्र थे। छोटे पुत्रे अपणे पिता जो बोलया, 'हे पिता, मिंजो हुण मेरा हिस्सा चाइदा!' पिता अपणे दोनों पुत्रां बीच अपणी सम्पत्तिया दा बटवारा करी दिता।

थोड़े दिना बाद ही छोटा पुत्र अपणा सारा कुछ गठेरी करी दूर देशे जो चली गिया कने उनी पापी जिन्दगी जिणे च अपणी सारी धन दौलत बर्बाद करी दिती।

इदे बाद, जिथू छोटा पुत्र था उस देशे च इक भयंकर अकाल पिया, कने उदे बाल खाणा खरीदणे तांई पैसे नी थे। तालू उसयो जड़ा कम्म मिलया सै सूअरां जो चुगाणे दा था। सै इतणा दुखी कने भूखा था कि सै सूअरां जो दितयो खाणे जो खाणा चांदा था।

आखरी च उनी छोटे पुत्रे अप्पु ने बोलया, 'मैं क्या करा दा है? मेरे पिता दे सारे नोकरां बाल खाणे तांई मता है, फिरी भी मैं ऐथू भूखा मरा दा है। मैं अपणे पिता बाल वापिस जाणा कने अपणे पिता दा इक नोकर बणने तांई उसने विनती करणी।'

कने उनी छोटे पुत्रे वापिस अपणे पिता दे घरे पासे जाणा शुरू किता। सै हले दूर ही था, उदे पिता उसयो ओंदे दिखया कने उस पर तरस खादा। सै दौड़ी करी अपणे पुत्रे बाल गिया कने उसयो गले ने लाई करी चूमा दिता।

उनी पुत्रे बोलया, 'हे पिता, मैं परमेश्वरे दे कने तेरे खिलाफ पाप कितया है। मैं तेरा पुत्र बोलणे दे लायक भी नी है।'

पर पिता अपणे इक सेवके जो बोलया, 'तोल्ली जाई करी सारयां छेल कपड़े लेई करी ओआ कने मेरे पुत्रे जो पेहना! उदिया उंगली च गूठी कने उदे पैरों च जूते पेहना। फिरी सारयां छेल बकरा बडा कने त्यौहार मना, क्योंकि मेरा पुत्र मरी गिया था, पर हुण सै जिन्दा है! सै ग्बाची गिया था, पर हुण सांझो मिल्ली गिया है!'

इस तांई लोकां त्यौहार मनणा शुरू किता। थोड़े बकते बाद, बडा पुत्र खेतरे ला कम्म करी के घरे जो आया। उनी गाणे बजाणे दी अवाज सुणी कने हेरान होया कि ऐ क्या होआ दा था।

जालू बडे पुत्रे जो पता लग्गा कि सै इस तांई त्यौहार मना दे थे क्योंकि उदा भाई घरे जो आई गिया था, तां सै बड़ा गुस्सा होया कने घरे अंदर नी आया। उदे पिता बाहर आई करी उसयो उना सोगी त्यौहार मनाणे तांई मनाया, पर उनी मना करी दिता।

उनी बडे पुत्रे अपणे पिता जो बोलया, 'इना सारे सालां च मैं तेरे तांई इमानदारिया ने कम्म किता! कदी भी तेरिया गल्ला जो नी टालया, पर तू कदी भी मिंजो इक छोटा बकरा भी नी दिता ताकि मैं अपणे मित्रां सोगी दावत करी सकें। पर तेरे इनी पुत्रे तेरे पैसे जो पापी कम्म करणे च बर्बाद करी दितया है। कने हुण जालू सै आया है तां उदे तांई खुशी मनाणे जो तू सारयां ला खरे बकरे जो बडी दिता!'

पिता उसयो जवाब दिता, 'हे मेरे पुत्र, तू हमेशा मेरे सोगी है, कने जड़ा कुछ मेरा है सै सब तेरा है। पर साड़े तांई ख़ुशी मनाणा सही है क्योंकि तेरा भाई मरी गिया था, पर हुण सै जिन्दा है। सै गबाची गिया था, पर हुण सांझो मिली गिया है!'