50. यीशु वापिस ओंदा है

लगभग 2,000 सालां ला, संसारे दियां सारियां जगां च जादा ला जादा लोक मसीह यीशुऐ दे बारे च शुभ संदेश जो सुणा दे न। कलीसिया उन्नति करा दी है। यीशुऐ वायदा कितया है कि उनी संसारे दे आखरी च वापिस ओणा। पर सै हले दीकर बापिस नी आया है, तमी उनी अपणे बायदे जो पूरा करणा।

असां यीशुऐ दे वापिस ओणे दा इंतजार करदे न, परमेश्वर सांझो ने ऐसे तरीके ने जिंदगी जीणे दी इच्छा करदा है जड़ी पवित्र है कने जड़ी उदी इज्जत करदा है। जालू यीशु धरती पर रे दा था तालू उनी बोलया, " मेरे चेलयां जालू संसारे दियां सारियां जगा दे लोकां जो परमेश्वरे दे राज्य दे बारे च शुभ संदेश दा प्रचार करी बोणा, तालू अंत आई जाणा।"

मतियां जातियां न जीना हली दीकर यीशुऐ दे बारे च नी सुणया है। स्वर्गे जो बापिस चली जाणे ला पेहले, यीशुऐ मसीहियां जो उन लोकां जो शुभ संदेश सुणाणे जो बोलया जिना इसयो कदी नी सुणया है। उनी बोलया, "जा कने सारी जातियां दे लोकां जो चेला बणा!" कने "बडाई करणे तांई खेतर पकी गियो न!"

यीशुऐ ऐ भी बोलया, "कुसी माणुऐ दा सेवक अपणे मालिके ला बडा नी होंदा। इस संसारे दे जरूरी लोकां मिंजो ने नफरत किती, कने मेरिया बजा ने उना तुहांजो भी सताणा कने मारी देणा। इस संसारे च तुहांजो दुख तकलीफ होणी, पर मज़बूत बणा, क्योंकि मैं शैताने जो हराई दितया है जड़ा इस संसारे पर शासन करदा है। अगर तुसां आखरी दीकर मिंजो पर भरोसा करगे, तां परमेश्वरे तुहांजो बचाणा!"

यीशुऐ अपणे चेलयां जो ऐ समझाणे तांई इक कहाणी सुणाई कि जालू संसारे दा अंत होणा है तां लोकां सोगी क्या होणा। उनी बोलया, "कुनी माणुऐ अपणे खेतरे च खरा बी राया। जालू सै सोआ दा था तां उदा दुशमण आया कने कणका दे बियां बीच जंगली बुटयां दे बियां जो भी राई दिता, कने फिरी चली गिया।"

जालू बूटे अंकुरित होए तां सेवकां उस माणुऐ जो बोलया, 'हे मालिक, तू तां अपणे खेतरे च खरा बी राय था। तां फिरी इदे च जंगली बूटे कजो न?' उनी माणुऐ जवाब दिता, 'ऐ मेरा कोई दुशमण है जिनी ऐसा कितया है।'

उना सेवकां अपणे मालिकां जो जवाब दिता, 'क्या सांझो जंगली बूटयां जो उखाड़ी देणा चाइदा?' उनी मालिके बोलया, 'नी। अगर तुसां ऐसा करगे तां तुसां कुछ कणका दे बूटे भी उखाड़ी देणे। बडाईया दे बकते दीकर इन्तजार करा। जालू कणक पक्की जांगी तालू जंगली बूटयां जो गठेरी करी फुकी दिया। पर कणका जो मेरे गोदामे च लेईकरी ओआ।'

चेलयां इसा कहाणिया दे मतलबे जो नी समझया, इस तांई उनी यीशुऐ जो उना जो समझाणे तांई बोलया। यीशुऐ बोलया, "खरा बी राणे बाला माणु मसीह सांई है। खेतर संसारे सांई है। खरा बी परमेश्वरे दे राज्य दे लोकां सांई है।"

जंगली बूटे उस बुरे जन, शैताने दे लोकां सांई न। उस माणुऐ दा दुशमण शैताने सांई है, जिनी जंगली बूटयां जो राई दितया था। बडाई इस संसारे दे अंत है, कने बडाई करणे बाले परमेश्वरे दे स्वर्गदूतां सांई न।

जालू संसारे दा अंत होणा तालू स्वर्गदूतां उना सारे लोकां जो गठेरणा जड़े शैताने दे न। स्वर्गदूतां उना जो इक बड़िया ही गर्म अग्गी च फेंकी देंणा। ओथु लोकां जो भयंकर सताव होणा कने रोणा कने अपणे दंद पीणे। पर जड़े लोक धर्मी न, जीना यीशुऐ पर भरोसा कितया है, उना परमेश्वर पिता दे राज्य च सुरजे सांई चमकणा।

यीशुऐ ऐ भी बोलया कि उनी संसारे दा अंत होणे ला पेहले धरती पर बापिस मुड़ना है। उनी तियां ही वापिस ओणा जियां सै गिया था। मतलब की उदे बाल असली शरीर होणा, कने उनी अम्बरे च बदलां पर सवार होई करी ओणा। जालू यीशु बापिस मुड़दा है, तां हर इकी मसीही जड़ा मरी गियो न उना जिन्दा होई जाणा कने यीशुऐ ने अम्बरे च मिलणा।

तालू जड़े मसीही हले दीकर जिन्दा न उना जो अम्बरे च चुकी लेई जाणा कने उना दुज्जे मसीहियां सोगी शामिल होई जाणा जड़े मरयां चे जिन्दा होणे न। उना सारयां ओथु यीशुऐ सोगी होणा। उदे बाद, यीशुऐ अपणे लोकां सोगी रेणा। जालू सै सोगी रेंदे न, तां उना बाल हमेशा दी शान्ति होणी।

यीशुऐ उस पर भरोसा करणे बाले हर इक जणे जो इक मुकुट देणे दा बायदा कितया है। उना हमेशा तांई परमेश्वरे सोगी हर इक चीजा पर शासन करणा। उना बाल सिद्ध शान्ति होणी।

पर परमेश्व उना सारयां दा न्याय करणा जड़े यीशुऐ पर भरोसा नी करदे न। उनी उना जो नरके च फेंकी देणा। ओथु उना रोणा कने अपणे दंद पीणे, कने उना जो हमेशा सजा मिलदी रेणी। कदी नी बुझणे बालिया अगी उना जो हमेशा फुकदे रेणा, कने कीड़यां उना जो खाणे ला कदी नी रुकणा।

जालू यीशुऐ बापिस ओणा है, तां वह उनी शैताने जो पुरे तरीके ने हराई देणा कने उदे राज्य जो बर्बाद करी देणा। उनी शैताने जो नरके च पाई देणा। ओथु शैताने हमेशा तांई फकुंदे रेणा, उना सबना सोगी जिना परमेश्वरे दिया गल्लां जो मनणे दिया बजाए शैताने दे पीछे चलणे का फेसला किता था।

क्योंकि आदम कने हव्वा परमेश्वरे दे हुकमे जो तोड़या था कने पाप जो इस संसारे च लेई करी आयो थे, परमेश्वरे उना जो श्राप दिता कने उनो जो खत्म करणे दा फेसला किता। पर कुसी दिने परमेश्वरे इक नोए स्वर्ग कने इक नोई धरती बणाणी।

यीशुऐ कने उदे लोकां उसा नोईया धरती पर रेणा, कने उनी सदा तांईसारियां चीजां पर शासन करणा। उनी लोकां दियां ह्खी ला हर इक आँसू जो पूंजी देणा। हुण कुनी दुःखी नी होणा। हुण उना रोणा नी। उना बीमार नी होणा कने मरणा नी। कने ओथु कोई भी बुराई नी होणी। यीशुऐ अपणे राज्य पर न्यायपूर्वक, कने शान्तिया सोगी शासन करणा। उनी हमेशा तांई अपणे लोकां सोगी रेणा।