49. परमेश्वरे दा नोआ बायदा

इकी स्वर्गदूते इक जवान कुड़िया ने बोलया कि उना परमेश्वरे दे पुत्रे जो जन्म देणा। सै हले कुँआरी थी, पर पवित्र आत्मा उदे बाल आई कने सै गर्भवती होई। उना इक पुत्रे जो जन्म दिता जिदा ना उना यीशु रखया। इस तांई, यीशु परमेश्वर कने माणु दोनों है।

यीशुऐ मते चमत्कार किते जड़े दसदे न कि सै परमेश्वर है। सै पाणिऐ पर चलया कने नेहरिया जो शान्त किता। उनी मते बीमार लोकां जो ठीक किता कने मते लोकां चे बुरियां आत्मा जो कडया। उनी मरयो लोकां जो जिन्दा करी दिता, कने उनी पंज रोटियां कने दो मच्छियां ने 5,000 लोकां जो खाणा खुआया।

यीशु इक महान शिक्षक भी था। जड़ा कुछ भी उनी सिखाया, सै उनी सिद्धता सोगी सिखाया। जड़ा सै लोकां जो करणे तांई बोलदा है सै उना जो करणा चाईदा क्योंकि सै परमेश्वरे दा पुत्र है। उदाहरण तांई, उनी लोकां जो सिखाया कि तुहांजो होर लोकां ने तियां ही प्यार करणे दी जरूरत है जियां तुसां अप्पू जो प्यार करदे न।

उनी ऐ भी सिखाया कि तुहांजो सारियां चीजां ला जादा कने अपणी संपत्ति ला भी जादा परमेश्वरे जो प्यार करणा चाइदा।

यीशु बोलया है कि संसारे च कुसी भी चीजा जो पाणे ला जादा अच्छा है परमेश्वरे दे राज्य च होणा। उदे राज्य च तुहाड़े प्रवेश करणे तांई जरूरी है कि परमेश्वर तुहांजो तुहाड़े पापां ला बचाए।

यीशुऐ बोलया कि कुछ लोकां उसयो ग्रहण करणा। परमेश्वरे उना लोकां जो बचाणा। पर केई लोकां उसयो ग्रहण नी करणा। उनी ऐ भी बोलया कि कुछ लोक खरिया जमीना सांई न, क्योंकि सै यीशुऐ दे बारे च शुभ संदेश जो स्वीकार करी लेंदे न, कने परमेश्वर उना जो बचादां है। पर कुछ लोक रस्ते दिया सकत जमिना सांई न। परमेश्वरे दा वचन बीऐ सांई रस्ते पर पौंदा है, पर ओथु कुछ भी नी उगदा है। ऐ लोक यीशु दे बारे च संदेश जो अस्वीकार करी दिंदे न। सै उदे राज्य च प्रवेश करणे ला मना करी दिंदे न।

यीशुऐ सिखाया कि परमेश्वर पापियों ने बड़ा प्यार करदा है। सै उना जो माफ करणा चांदा है कने उना जो अपणी संतान बणाणा चांदा है।

यीशुऐ ऐ भी दसया कि परमेश्वर पाप ने नफरत करदा है। क्योंकि आदम कने हव्वा पाप कितया, इस तांई उदे सारे वंशजां भी पाप किता। इस संसारे च रेणे बाला हर इक जणा पाप करदा है कने परमेश्वरे ला दूर है। हर इक जणा परमेश्वरे दा दुशमण है।

पर परमेश्वरे इस संसारे च रेणे वाले हर इक जणे ने इतणा प्यार किता; उनी अपणे इकलौते पुत्रे जो देई दिता ताकि परमेश्वर उना जो सजा ना दे जड़े उस पर भरोसा करदे न। बल्कि सै उदे सोगी हमेशा तांई रेन।

तुसां मरणे दे काबिल न, क्योंकि तुसां पाप कितया है। तुहांजो ने परमेश्वरे दा गुस्सा होणा ठीक ही है, पर इदे बदले, परमेश्वर यीशुऐ पर गुस्सा होया। उनी यीशुऐ जो सूली पर चड़ाई करी मौत दी सजा दिती।

यीशुऐ कदी पाप नी किता, पर उनी परमेश्वरे जो उसयो सजा देणा दिती। उनी मरी जाणा स्वीकार करी लिया। इयां करी री, तुहाड़े पापां जो कने इस संसारे च रेणे बाले हर इकी जणे दे पापां जो चुकी करी लेई जाणे तांई इक सिद्ध बलिदान था। यीशुऐ अप्पू जो परमेश्वरे तांई बलिदान करी दिता, इस तांई परमेश्वर कुसी भी पाप जो, एथू दीकर कि बड़े बडे पापां जो भी माफ करदा है।

भले ही अगर तुसां बड़े खरे कम करदे न, तमी परमेश्वरे तुहांजो नी बचाणा। उदा दोस्त बणने तांई ऐसा कुछ भी नी है जड़ा तुसां करी सकदे न। सिर्फ तुहांजो भरोसा करणा है कि यीशु परमेश्वरे दा पुत्र है, कने सै तुहाड़े बदले च सूली पर मरी गिया, कने ऐ भी कि परमेश्वरे उसयो फिरी जिन्दा करी दिता। अगर इस पर भरोसा करा, तां परमेश्वरे तुहाड़े पापां जो माफ करी देणा।

परमेश्वरे हर उस जणे जो बचाणा जड़े यीशुऐ पर भरोसा करदा है कने उसयो अपणा प्रभु मनदा है। पर उनी उना जो नी बचाणा जड़े उस पर भरोसा नी करदे न। ऐ कोई मायने नी रखदा कि तुसां अमीर न या गरीब न, मर्द न या जनानिया, बुडे न या जवान न, या तुसां कुथू रेंदे न। परमेश्वरे तुहांजो ने प्यार करदा है कने चांदा है कि तुम यीशुऐ पर भरोसा करा ताकि सै तुहाड़ा मित्र बणी सके।

यीशु तुहांजो सदा दा है कि उस पर भरोसा करा कने बपतिस्मा लिया। क्या तुसां भरोसा करदे न कि परमेश्वरे दा एकलौता पुत्र, यीशु ही मसीह है? क्या तुसां भरोसा करदे न कि तुसां इक पापी न कने ऐ कि तुसां परमेश्वरे ला सजा दे काबिल न? क्या तुसां भरोसा करदे न कि तुहाड़े पापां जो मिटाणे तांई यीशु सूली पर मरया?

अगर तुसां यीशुऐ पर कने जड़ा उनी तुहाड़े तांई कितया है उस पर भरोसा करदे न, तां तुसां इक मसीही न! शैतान अपणे अंधकार दे राज्य च हुण तुहांजो पर शासन नी करदा है। हुण परमेश्वर अपणे प्रकाश दे राज्य च तुहांजो पर शासन करदा है। उनी तुहांजो पाप करणे ला रोकी दितया है, जिसयो तुसां करदे थे। उनी तुहांजो इक नोई कने सही जिन्दगी दीतियो है।

अगर तुसां इक मसीही न तां जड़ा यीशुऐ कितया है उदिया बजा ने परमेश्वरे तुहाड़े पापां जो माफ करी दितया है। हुण परमेश्वर तुहाड़ा दुशमण नी पर इक पक्का दोस्त है।

अगर तुसां परमेश्वरे दे दोस्त न कने प्रभु यीशु दे सेवक न तां तुसां उना दा गल्लां दा पालन करणा जड़ा यीशु तुहांजो सिखादां है। भले ही तुसां इक मसीही न, शैताने हल्ले भी पाप करणे तांई तुहाड़ी परीक्षा करणी। पर परमेश्वर हमेशा सै करदा है जड़ा सै बोलदा है। सै बोलदा है कि अगर तुसां अपणे पापां जो मनी लिया, तां उनी तुहांजो माफ करी देणा। उनी तुहांजो पाप दे खिलाफ लड़ने दी शक्ति देणी।

परमेश्वर तुहांजो प्रार्थना करणे जो कने उदे वचने जो पढ़ने तांई बोलदा है। सै तुहांजो होर विश्वासियां सोगी मिली करी उदी आराधना करणे तांई भी बोलदा है। तुहांजो होर लोकां जो भी दसणा है कि उनी तुहाड़े तांई क्या कितया है। अगर तुसां इना सारे कम्मा जो करा, तां तुसां उदे इक पक्के मित्र बणी जाणा।