48. यीशु ही सै मसीह है जिस मसीह दा बायदा परमेश्वरे कितया है

जालू परमेश्वरे संसारे जो बणाया तां सारा कुछ खरा था। कने कोई पाप नी था। आदम कने हव्वा इक दुज्जे जो प्यार करदे थे, कने सै परमेश्वरे ने प्यार करदे थे। कोई बीमारी या मौत नी थी। परमेश्वर इयां ही संसारे जो चांहदा था।

शैताने साँपे दे जरिये बागे च हव्वा ने गल किती, क्योंकि सै उसयो धोखा देणा चांदा था। तालू हव्वा कने आदमे परमेश्वरे खिलाफ पाप किता। क्योंकि उना पाप कितया था इस तांई धरती पर रेणे बाले सारे जणे मरदे न।

क्योंकि आदम कने हव्वा पाप कितया था, इस तांई कुछ होर भी बुरा होया। सै परमेश्वरे दे दुशमण बणी गे। जिदिया बजा ने, तालू ला हर इक जणे पाप कितया है। हर इक जणा जन्म ला ही परमेश्वरे दा दुशमण है। परमेश्वर कने लोकां बीच शान्ति नी थी। पर परमेश्वर शान्ति करणा चांहदा था।

परमेश्वरे बायदा किता कि हव्वा दे इकी वंशजे शैताने दे सिरे जो गरेचणा। उनी ऐ भी बोलया कि शैताने उदिया एड़िया जो डसणा। दुज्जे अखरां च, शैताने मसीह जो मारी देणा, पर परमेश्वरे उसयो दुबारा ला जिन्दा करी देणा। इदे बाद, मसीहे शैताने दिया शक्तिया जो हमेशा तांई मुकाई देणा। केई सालां बाद, परमेश्वरे प्रकट किता कि सै मसीह यीशु है।

परमेश्वरे उसा बाड़ा ला अपणे परिवारे जो बचाया। परमेश्वरे नूह जो इक किस्ती बणाणे तांई बोलया कि इयां करी री परमेश्वरे उना लोकां जो बचाया जड़े उस पर भरोसा करदे थे। बाकी सारे दे सारे परमेश्वरे दे हथे मारी देणे दे काबील थे क्योंकि उना पाप कितया था। पर परमेश्वरे उना सारयां जो बचाणे तांई यीशुऐ जो भेजया जड़े उस पर भरोसा करदे न।

मतयां सालां बाद, याजक परमेश्वरे तांई बलिदान चढ़ादें रे। ऐ द्र्शांदा है कि लोकां पाप कितया। पर सै बलिदान उना दे पापां जो माफ नी करी सकयो थे। यीशु सारयां ला बडा महायाजक है। उनी सै किता जड़ा कोई याजक नी करी सकदा था। उनी बलिदान होणे तांई अपणे आप जो देई दिता जड़ा हर कुसी दे पापां जो मिटाई सकदा था। उनी स्वीकार किता कि परमेश्वर उना सारयां दे पापां तांई उसयो सजा दे। इसा बजा ने, यीशु सिद्ध महायाजक था।

परमेश्वरे अब्राहम ने बोलया, "मैं तेरे जरिये संसारे दे सारे कुलां जो आशीष देणी।" यीशु इसी अब्राहम दा वंशज था। परमेश्वर अब्राहम दे जरिये सारे कुलां जो आशीष दिंदा है, क्योंकि जड़े यीशुऐ पर भरोसा करदे न, परमेश्वर उना सारयां जो पापां ला बचादां है। जालू ऐ लोक यीशुऐ पर भरोसा करदे न, तां परमेश्वर उना जो अब्राहम दे वंशज मनदा है।

परमेश्वरे अब्राहम जो बोलया कि सै अपणे पुत्रे जो मेरे तांई बलिदान करी दे। पर फिरी परमेश्वरे इसहाक दे बदले च बलि करणे तांई इक मेमना दिता। असां सारे अपणे पापां तांई मारी देणे दे कबिल थे! पर परमेश्वरे साड़िया जगा पर मरणे तांई यीशुऐ जो बलिदान दे रूपे च देई दिता। इसा बजा ला असां यीशुऐ जो परमेश्वरे दा मेमना बोलदे न।

जालू परमेश्वरे मिस्र देशे पर आखरी विपत्ति भेजी तां उनी हर इक इस्राएली परिवारे ने बोलया कि सै इक मेमने दी बलि देन। उस मेमने च कोई दोष नी होणा चाइदा। तालू अपणे दरवाजे दिया चौखटा दे ऊपर कने अखे बखे उस मेमने दे खूने जो लगानयो। जालू परमेश्वरे उस खूने जो दिखया तां सै उना दे घरां ला अगे बदी गिया कने उना दे पेहलौठे पुत्रे जो नी मारया। जालू ऐ होया तां परमेश्वरे इसयो फसह दा त्यौहार बोलया।

यीशु फसह दे त्योहारे दे इक मेमने सांई है। उनी कदी पाप नी किता, इस तांई उदे च कुछ भी गलत नी था। सै फसह दे त्योहारे दे बकते पर मरया। जालू कोई यीशुऐ पर भरोसा करदा है, तालू यीशुऐ दा खून उस माणुऐ दे पापां दी कीमत चुकांदा है। ऐ ऐसा है जियां कि परमेश्वर उस माणुऐ दे बखे ला अगे बदी गिया, क्योंकि सै उसयो सजा नी दिंदा है।

परमेश्वरे इस्राएली लोकां सोगी इक बायदा किता, क्योंकि सै ऐसे लोक थे जिना जो परमेश्वरे अपणा होणे तांई चुणया था। पर हुण परमेश्वरे इक ऐसा बायदा कितया है जड़ा सारयां तांई है। अगर कुसी भी जाति दा कोई भी जणा इस नोऐ बायदे जो अपनांदा है, तां सै परमेश्वरे दे लोकां च शामिल होई जांदा है। सै ऐसा इस तांई करदा है क्योंकि सै यीशुऐ पर भरोसा करदा है।

मूसा इक ऐसा परमेश्वरे दा संदेश देणे बाला था जिनी परमेश्वरे दे वचने जो बड़े जोर शोरे सोगी प्रचार कितया था। पर यीशु सारे परमेश्वरे दे संदेश देणे बालयां चे सारयां ला बडा है। सै परमेश्वर है, इस तांई जड़ा कुछ भी उनी कितया कने बोलया सै परमेश्वरे दे कम्म कने वचन थे। इसी तांई पवित्र-शास्त्र यीशुऐ जो परमेश्वरे दा वचन बोलदा है।

परमेश्वरे राजा दाऊदे ने बायदा कितया था कि राजा दे रूप च उदा इक वंशज परमेश्वरे दे लोकां पर सदा तांई शासन करणा। यीशु परमेश्वरे दा पुत्र कने मसीह है, इस तांई सै राजा दाऊद दा वंशज है जड़ा सदा तांई राज्य करी सकदा है।

दाऊद तां इस्राएल दा राजा था, पर यीशु सारे जगत दा राजा है! उनी फिरी ओणा कने सदा तांई न्याय कने शान्ति सोगी अपणे राज्य पर शासन करणा।