47. फिलिप्पी शेहरे च पौलुस कने सीलास
जालू शाऊले सारे रोमी साम्राज्य च यात्रां कितियां तां उनी अपणे रोमी ना "पौलुस" दा इस्तेमाल करणा शुरू करी दिता। इक दिन, पौलुस कने उदा मित्र सीलास फिलिप्पी शेहरे च यीशुऐ दे बारे च शुभ संदेश सुणाणे तांई गे। सै शेहरे दे बाहर नदिया दे बखे इक जगा पर गे जिथू लोक प्रार्थना करणे तांई गिठा होयो थे। ओथु सै लुदिया नाऐ दी इक जनानिया ला मिले जड़ी इक व्यापारी थी। सै परमेश्वरे ला प्यार करदी थी कने उदी आराधना करदी थी।
परमेश्वरे लुदिया जो यीशुऐ दे बारे च संदेश सुणाया कने उना यीशु मसीह पर भरोसा किता। पौलुस कने सीलासे उसयो कने उदे परिवारे जो बपतिस्मा दिता। उना पौलुस कने सीलासे जो अपणे घरे रुकणे तांई सदा दिता, इस तांई सै ओथु रुकी गे।
पौलुस कने सीलास लोकां ने अक्सर उसा जगा पर मिलदे थे जिथू यहूदी लोक प्रार्थना करदे थे। हर रोज सै जालू ओथु जांदे थे तां इक गुलाम कुड़ी जिसा अंदर बुरी आत्मा थी, सै उना दा पीछा करदी थी। बुरिया आत्मा दे जरिये सै लोकां दा भविष्य दसदी थी, लोकां दा भविष्य दसी करी सै अपणे मालिकां तांई बड़े पैसे कमांदी थी।
उना दे जांदे बकत ऐ गुलाम कुड़ी चिल्लाई करी बोलदी थी कि, "ऐ मर्द परम पिता परमेश्वरे दे सेवक न। ऐ तुहांजो उद्धार पाणे दा रस्ता दसा दे न!" सै रोज ही ऐसा करदी थी जिसा बजा ने पौलुस नाराज़ होई गिया।
आखरी च, इक दिन जालू उना गुलाम कुड़िया चिल्लाणा शुरू किता, तां पौलुस उसा बाल मुड़ी करी आया कने उसा दे अंदरे दिया बुरिया आत्मा जो बोलया, "यीशुऐ दे ना ला इदे चे निकली जा।" तालू ही सै बुरी आत्मा उसा जो छडी करी चली गेई।
उसा गुलाम कुड़िया दे मालिक बड़े गुस्सा होई गे। उना जो पता लगी गिया कि बिना उसा बुरिया आत्मा दे ऐ कुड़ी लोकां दा भविष्य नी दस्सी सकदी थी। इदा मतलब था कि लोकां हुण उदे मालिकां जो पैसा नी देणा।
इस तांई उसा गुलाम कुड़िया दे मालिक पौलुस कने सीलास जो रोमी अधिकारियों बाल लेई गे। उना पौलुस कने सीलासे जो मारया कुटया, कने फिरी उना जो जेलखाने च पाई दिता।
उना पौलुस कने सीलासे जो जेला च एसिया जगा पर रखया जिथू सारयां ला जादा सिपाही थे।सिपाईयां उना दे पैरां जो लकड़िया दे बडे-बडे टुकड़यां च बन्नी दिता। पर पौलुस कने सीलास आधिया राती दीकर, परमेश्वरे दे भजन गा दे थे।
अचानक, इक भयानक भूकम्प होया! जेला दे सारे दरबाजे खुली गे, कने सारे कैदियां दे सुंगल खुली गे जीना ने सै बनयो थे।
तालू दरोगा जो जाग आई गेई। उनी दिखया कि जेला दे सारे दरबाजे खुले न। उनी सोचया कि सारे कैदी बची करी नठी गियो होणे। सै डरी गिया कि उना दे नठी जाणे दिया बजा ला रोमी अधिकारियां उसयो मारी देणा, इस तांई सै अप्पू जो मारी देणे तांई तैयार होई गिया! पर पौलुसे उसयो दिखी करी बोलया, "रुकी जा! कुछ मत करदा। असां सारे एथू ही न।"
उनी दरोगा कमदे-कमदे पौलुस कने सीलासे बाल आई करी पूछया, "उद्धार पाणे तांई मैं क्या करें?" पौलुसे जवाब दिता, "प्रभु यीशु पर भरोसा कर, तां तू कने तेरे घराने दा उद्धार होणा।" तालू सै दरोगा पौलुस कने सीलासे जो अपणे घरे जो लेई आया कने उना दे जखमा च दवाई लाई। पौलुसे उदे घरे दे सारे लोकां जो यीशु दे बारे च शुभ संदेश सुणाया।
दरोगा कने उदे पूरे परिवारे यीशुऐ पर भरोसा किता, इस तांई पौलुस कने सीलासे उना जो बपतिस्मा दिता। उदे बाद दरोगे पौलुस कने सीलास जो खाणा खुआया, कने उना सारयां खुशी मनाई।
अगले दिन शेहरे दे अगुवयां पौलुस कने सीलास जो जेला ला आजाद करी दिता कने फिलिप्पी ला चली जाणे तांई बोलया। पौलुस कने सीलास लुदिया कने कुछ होर मित्रां सोगी मिल्ले उदे बाद ओथु ला चली गे। यीशुऐ दे बारे च शुभ संदेश फैलदा गिया, कने कलीसिया बददी गेई।
पौलुसे कने होर मसीही अगुवयां मतयां शेहरां दी यात्रा किती। उना लोकां जो यीशु दे बारे च शुभ संदेश सुणाया। उना कलीसिया दे विश्वासियां जो उत्साहित करणे कने शिक्षा देणे तांई केई चिठियां भी लिखियां। इना चे केई चिठियां बाइबल दियां कताबां बणी गियां।
प्रेरितां दे कम्म 16:11-40 ला इक बाइबल दी कहाणी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।