46. पौलुस मसीही विश्वासी बणी जांदा

शाऊल नाऐ दा एक माणु था जिनी यीशुऐ पर भरोसा नी कितया था। जालू सै जवान था, तालू उनी स्तिफनुसे जो मारणे बाले लोकां दे कपड़यां दी निगरानी किती थी। बादे च, उनी विश्वासियों जो सताया था। उनी यरूशलेम शेहरे च घरे-घरे जाई करी मर्द कने जनानियां दोनों जो गिरफ्तार करीरी जेला च पाई दितया था। तालू महायाजके शाऊले जो दमिश्क शेहरे च जाणे दी आज्ञा दिती। उनी ओथु दे मसीहियां जो गिरफ्तार करणे कने उना जो वापिस यरूशलेम शेहर लेई करी ओणे तांई शाऊले जो बोलया।

शाऊले दमिश्क शेहर जाणे दी यात्रा शुरू किती। उस शेहरे जो पुजणे ला थोड़ा ही पेहले, उदे चारों पासे अम्बरे ला इक चमकीली लौ चमकी, कने सै थले जमिना पर डेई पिया। शाऊले कुसी जो बोलदे सुणया, "हे शाऊल! हे शाऊल! तू मिंजो कजो सता दा है?" शाऊले पूछया, "हे प्रभु, तू कुण है?" यीशुऐ उसयो जवाब दिता, "मैं यीशु हूँ। तू मुझे सता दा है!"

जालू शाऊल उठया तां उसयो मिल्ला दा नी था। उदे मित्र उसयो दमिश्क शेहरे च लेई करी गे। शाऊले तीन दिना दीकर कुछ भी खादा पिता नी था।

दमिश्क शेहरे च हनन्याह नाऐ दा इक चेला था। परमेश्वरे उसने बोलया, "उस घरे जो जा जिथू शाऊल रुकया है। अपणे हथां जो उस पर रख ताकि उदियां हखी ठीक होई जान।" पर हनन्याह बोलया, "हे प्रभु, मैं सुणया है कि इनी माणुऐ भरोसा करणे बालयां जो बड़ा सताया है।" परमेश्वरे उसयो जवाब दिता, "जा! मैं उसयो यहूदियां च कने होर जातियां दे लोकां च मेरे नाऐ दी घोषणा करणे तांई चुणया है। उनी मेरे ना तांई बड़े दुख सेहणे।"

कने हनन्याह शाऊले बाल गिया, अपणे हथां जो उस पर रखया, कने बोलया, "यीशुऐ जड़ा एथू ओणे दे तेरे रस्ते च तीजो पर प्रकट कितया था, मिंजो तेरे बाल भेजया है ताकि तू दुबारा ला दिखणा लगे, कने पवित्र आत्मा तीजो भरी दे।" तालू ही शाऊले जो मिलणा लगी पिया, कने हनन्याह उसयो बपतिस्मा दिता। तालू शाऊले रोटी खादी कने ठीक होई गिया।

तालू ला ही, शाऊले दमिश्क शेहरे च रेणे बाले यहूदियां च प्रचार करणा शुरू किता। उनी बोलया, "यीशु ही परमेश्वरे दा पुत्र है!" यहूदी लोग हेरान थे, क्योंकि शाऊले तां विश्वासियों जो मारणे दी कोशिश कीतियो थी, पर हुण उनी यीशुऐ पर भरोसा कितया था। शाऊले यहूदियां सोगी वाद-विवाद किता। उनी दसया कि यीशु ही मसीहा था।

बड़े दिना बाद, यहूदियां शाऊले जो मारी देणे दी योजना बणाई। उना उसयो मारणे तांई शेहरे दे फाटके पर लोकां जो भेजया। कि उदी निगरानी करे पर शाऊले उस योजना दे बारे च सुणी लिया, कने उदे मित्रां बची करी निकलने च उदी सहायता किती। इकी राती उना उसयो टोकरिया च बैठाया कने शेहरे दिया दीवारा च उसयो थले उतारी दिता। दमिश्क शेहरे ला बची करी निकलने बाद शाऊले यीशुऐ दे बारे च प्रचार करणा बंद नी किता।

शाऊल प्रेरितों ने मिलणे तांई यरूशलेम शेहरे जो गिया, पर सै उसला डरदे थे। तालू बरनबास नाऐ दा इक विश्वासी शाऊल जो प्रेरितों बाल लेई करी गिया। उनी उना जो दसया कि शाऊले कियां साहसी होई करी दमिश्क शेहरे च प्रचार कितया था। उदे बाद, प्रेरितां शाऊले जो अपनाई लिया।

कुछ विश्वासी जड़े यरूशलेम शेहरे दे सताव ला नठी गियो थे सै दूर अंताकिया शेहरे च चली गियो थे कने यीशुऐ दे बारे च प्रचार करदे थे। अंताकिया शेहरे च रेणे बाले लोक जादा यहूदी नी थे, पर पेहली बरी, उना चे मतयां लोकां यीशुऐ पर भरोसा किता। बरनबास कने शाऊल इना नोए विश्वासियां जो यीशुऐ दे बारे च होर जादा सिखाणे तांई ओथु गे कने कलीसिया जो मजबूत किता। यीशुऐ पर भरोसा करणे बालयां जो पेहली बरी अंताकिया शेहरे च ही "मसीही" बोलया।

इक दिन, अंताकिया शेहरे दे मसीही लोक बरत रखी करी प्रार्थना करा दे थे। पवित्र आत्मा उना ने बोलया, "मेरे तांई बरनबास कने शाऊले जो इस कमे जो करणे तांई लग करी दिया जिसयो करणे तांई मैं उना जो सदया है।" इस तांई अंताकिया दिया कलीसिया बरनबास कने शाऊल तांई प्रार्थना किती कने उना पर अपणे हथां जो रखया। तालू उनाजो होर मतियां जगा पर यीशुऐ दे बारे च शुभ समाचार दा प्रचार करणे तांई भेजी दिता। बरनबास कने शाऊले लग-लग जातियां दे लोकां जो शिक्षा दिती, कने मते लोकां यीशुऐ च भरोसा किता।