45. स्तिफनुस कने फिलिप्पुस

पेहले मसीही अगुवयां बीच स्तिफनुस नाऐ दा इक माणु था। सारे लोक उदी इज्जत करदे थे। पवित्र आत्मा उसयो बड़ी शक्ति कने बुद्धि दीतियो थी। स्तिफनुसे मते चमत्कार कितयो थे। जालू उनी यीशुऐ पर भरोसा करणे दे बारे च उना जो शिक्षा दिती तां मतयां लोकां उस पर भरोसा किता।

इक दिन, स्तिफनुस यीशु दे बारे च शिक्षा दे दा था, कने कुछ ऐसे यहूदी आए जीना यीशुऐ पर भरोसा नी कितया था कने उदे सोगी सबाल जबाब करणा शुरू करी दिता। सै बड़े गुस्सा होई गे, इस तांई सै धार्मिक अगुवयां बाल गे कने उदे बारे च झूठ बोलया। उना बोलया, "असां स्तिफनुसे जो मूसा कने परमेश्वरे दे बारे च बुरियां गल्लां बोलदे सुणया है!" इस तांई धार्मिक अगुवयां स्तिफनुस जो गिरफ्तार करी लिया कने उसयो महायाजक कने यहूदियां दे होर अगुवयां दे सामणे लेईकरी आए। कने होर भी झूठे गवाह आए कने उना स्तिफनुसे दे बारे च झूठ बोलया।

महायाजके स्तिफनुसे ला पूछया, "क्या ऐ लोक तेरे बारे च सच बोला दे न?" स्तिफनुसे महायाजक जो जवाब देणे तांई मतियां गल्लां बोलणा शुरू कितियां। उनी बोलया अब्राहम दे बकते ला यीशुऐ दे बकते दीकर परमेश्वरे इस्राएल दे लोकां तांई मते अनोखे कम्म किते न। पर लोकां हमेशा परमेश्वरे दे हुकमा जो नकारया है। स्तिफनुसे बोलया, "तुसां लोक परमश्वरे दे खिलाफ जिदी कने बलवा करणे वाले न। तुसां हमेशा पवित्र आत्मा जो नी अपनाया, जियां साड़े पूर्वजां हमेशा पवित्र आत्मा जो नी अपनाया था कने हमेशा उदे संदेश देणे बालयां जो मारी दितया था। पर जड़ा उना कितया था उदी तुलना च तुसां होर भी बुरा कितया है! तुसां मसीह जो मारी दिता!"

जालू उना धार्मिक अगुवयां ऐ सुणया, तां सै इतणा गुस्सा होई गे कि उना अपणे कना जो बंद करी लिया कने जोरे ने चिल्लाए। सै स्तिफनुसे जो घसीटी करी शेहरे ला बाहर लेई गे कने उसयो मारी देणे तांई उसयो पत्थर मारे।

जालू स्तिफनुस मरा दा था, सै पुकारी करी उठया, "हे यीशु, मेरिया आत्मा जो ग्रहण कर!" तालू सै अपणे गोडे भार पेई गिया कने फिरी पुकार करी बोलया, "हे प्रभु, ऐ पाप इना पर मत लांदा।" तालू सै मरी गिया।

उस दिन, यरूशलेम शेहरे च रेणे बाले मतयां लोकां यीशुऐ दे चेलयां जो सताणा शुरू करी दिता, इस तांई यीशुऐ पर भरोसा करणे बाले लोक होर जगां जो नठी गे। पर इदे बावजूद भी, जिथू भी सै गे उना यीशुऐ दे बारे च प्रचार किता।

फिलिप्पुस नाऐ दा यीशुऐ दा इक चेला था। जियां होर मते भरोसा करणे बाले यरूशलेम शेहरे ला नठी गियो थे, तियां ही सै भी यरूशलेम शेहरे ला नठी गिया। सै सामरिया दे इलाके च चली गिया। ओथु उनी लोकां च यीशु दे बारे च प्रचार किता। मतयां लोकां उस पर भरोसा किता कने उना जो उद्धार मिला। इक दिन, फिलिप्पुसे बाल परमेश्वरे दिया तरफा ला इक स्वर्गदूत आया कने उनी बणे च इक रस्ते पर चलणे तांई बोलया। फिलिप्पुस ओथु चली गिया। जालू सै उस रस्ते पर चलया था, तां उनी इक माणुऐ जो अपणे रथे च जांदे दिखया। ऐ माणु कूश देशे दा जरूरी अधिकारी था। पवित्र आत्मा फिलिप्पुसे जो बोलया कि जाई करी उस माणुऐ सोगी-सोगी चल।

इस तांई फिलिप्पुस रथे बाल गिया। उनी सुणया कि सै कूशी परमेश्वरे दे वचने जो पढ़ा दा था। जड़ा यशायाह भविष्यद्वक्ता लिखया था सै उसयो पढ़ा दा था। सै पढ़ा दा था, "सै उसयो मारी देणे बालिया भेडा सांई लेई गिया, कने जियां इक मेमना शान्त होंदा है, उनी भी इक शब्द नी बोलया। उना उदे सोगी बुरा व्यवहार किता कने उदा आदर नी किता। उना उदे प्राण लेई ले।"

फिलिप्पुसे उस कूशी ला पूछया, "जड़ा तू पढ़ा दा है क्या तू उसयो समझदा भी है?" उस कूशीऐ जवाब दिता, "नी। जालू दीकर कोई इसयो मिंजो नी समझाए, तालू दीकर मैं इसयो नी समझी सकदा। कृपा करीरी मेरे बाल आई करी बो। यशायाह ऐ अपणे बारे च लिखा दा था या कुसी होर दे?"

फिलिप्पुस रथे पर चड़ी करी बैई गिया। तालू उनी उस कूशी माणुऐ जो ऐ दसया जड़ा यशायाहे यीशुऐ दे बारे च लिखया था। फिलिप्पुसे परमेश्वरे दे वचने ला होर मते बचना दी भी चर्चा किती। इयां उनी उस माणुऐ जो यीशुऐ दे बारे च शुभ संदेश सुणाया।

फिलिप्पुस कने सै कूशी चलदे-चलदे इक पाणिऐ दे तलाबे बाल पुज्जे। उनी कूशीऐ बोलया, "दिख! एथू पाणी है! क्या मैं बपतिस्मा लेई सकदा है?" कने उनी सारथी जो रथ रोकणे तांई बोलया।

सै पाणिऐ च गे, कने फिलिप्पुसे उस कूशी जो बपतिस्मा दिता। जालू सै पाणिऐ ला बाहर आए, तां पवित्र आत्मा अचानक ही फिलिप्पुसे जो चुकी करी कुसी होरसी जगा पर लेई गेई। ओथु फिलिप्पुस लोकां जो यीशुऐ दे बारे दसदा रिया।

सै कूशी अपणे घरे जो चली गिया। सै खुश था कि सै हुण यीशुऐ जो जाणदा था।