44. पतरस कने यूहन्ना इकी भिखारिए जो ठीक करदे न

इक दिन, पतरस कने यूहन्ना मंदिरे च गे। इक लंगड़ा माणु भीख मगणे तांई दरबाजे पर बैठया था था।

पतरसे उस लंगड़े माणुऐ पासे दिखया कने बोलया, "मेरे बाल तीजो देणे तांई पैसे तां है नी न। पर जड़ा मेरे बाल है सै मैं तीजो दिंदा है। यीशु दे ना ने, उठ कने चल-फिर!"

तालू ही, परमेश्वरे उस लंगड़े माणुऐ जो ठीक करी दिता। उनी चलणा कने कूदना, कने परमेश्वरे दी स्तुति करणा शुरू करी दिता। मंदिरे दे अंगणे च हाजिर लोक हेरान थे।

तालू ही लोकां दी इक भीड़ उस माणुऐ जो दिखणे तांई आई जड़ा ठीक होई गिया था। पतरसे उना ने बोलया, "ऐ माणु ठीक है, पर इसा गल्ला पर हेरान मत होंदे। असां इसयो अपणिया शक्तिया ला ठीक नी कितया है, या इस तांई नी कि असां परमेश्वरे दा आदर करदे न। बल्कि, सै यीशु है जिनी इस माणुऐ जो अपणिया शक्तिया ने ठीक कितया है, क्योंकि असां यीशु पर भरोसा करदे न।"

सै तुसां ही न जिना उस रोमी राज्यपाल जो यीशुऐ जो मारणे तांई बोलया था। तुसां उसयो मारी दिता जड़ा सबना जो जिन्दगी दिंदा है। पर परमेश्वरे उसयो मरयां चे जिन्दा किता। तुहांजो नी समझ लगी कि तुसां क्या करा दे थे, पर जालू तुसां उना कमा जो करा दे थे, तां जड़ा परमेश्वरे दे संदेश देणे बालयां बोलया था सै पूरा होया। उना बोलया था कि मसीह जो दुख झेलणे पोणे कने मरी जाणा। परमेश्वरे इसयो होणा दिता। इस तांई हुण, पश्चाताप करा कने परमेश्वरे पासे फिरा, ताकि सै तुहाड़े पापां जो धोई करी साफ करे।

जालू मंदरे दे अगुवयां पतरसे कने यूहन्ना जो सुणया, तां सै बड़े घबराई गे। इस तांई उना उना जो गिरफ्तार करीरी जेला च पाई दिता। पर जड़ा पतरसे बोलया था उस पर मतयां लोकां भरोसा किता। यीशुऐ पर भरोसा करणे बालयां दी गिणती बदी करी लगभग 5,000 होई गेई।

अगले दिने, सै यहूदी अगुवे पतरस कने यूहन्ना जो महायाजक कने होर धार्मिक अगुवयां दे सामणे लेई करी आए। सै उस माणुऐ जो भी लेई करी आए जड़ा लंगड़ा था। उना पतरस कने यूहन्ना ला पूछया, "कुदे अधिकारे ने तुसां उस लंगड़े माणुऐ जो ठीक किता?"

पतरसे जवाब दिता, "ऐ माणु जड़ा तुहाड़े सामणे खड़ोतया है उसयो यीशु मसीह दिया शक्तिया ने ठीक कितया है। तुसां यीशुऐ जो क्रूस पर चढ़ाई दिता, पर परमेश्वरे उसयो फिरी जिन्दा करी दिता! तुसां उसयो अपनाया नी, पर यीशु दे इलावा उद्धार पाणे दा होर कोई दुज्जा रस्ता नी है!"

सै अगुवे हैरान थे कि पतरस कने यूहन्ना बड़े साहसे ने गल्ल किती थी। उना दिखया कि ऐ तां सीधे साधे अनपढ़ माणु थे। पर फिरी उना जो याद आया कि ऐ दोनों यीशुऐ सोगी रियो थे। इस तांई उना दोनों जो बोलया, "असां तुहांजो होर भी जादा सजा देणी अगर तुसां यीशुऐ दे बारे च लोकां जो कोई होर संदेश दिता तां।" एसियां मतियां गल्लां बोलणे बाद, उना पतरस कने यूहन्ना जो जाणा दिता।