43. कलीसिया दी शुरुआत

यीशुऐ जो स्वर्ग बापिस जाणे बाद, चेले यरूशलेम शेहरे च ही रुकी गे जियां यीशुऐ उना जो करणे जो बोलया था। ओथु दे यीशुऐ पर भरोसा करणे बाले लोक लगातार सोगी गिठे होई करी प्रार्थना करदे थे।

हर साल, फसह दे त्योहारे दे 50 दिना बाद, यहूदी लोक पिन्तेकुस्त नाऐ दे इक जरूरी दिने जो मनांदे थे। पिन्तेकुस्त सै बकत था जालू यहूदी लोक कणका दी बडाई करदे थे। सारे संसारे ला यहूदी लोक पिन्तेकुस्त दे दिने जो सोगी मनाणे तांई यरूशलेम शेहरे च आयो थे। इस साल, पिन्तेकुस्त मनाणे दा बकत यीशुऐ दे स्वर्ग जो चली जाणे दे लगभग इक हफ्ते बाद आया था।

जिस बकत सारे यीशुऐ पर भरोसा करणे बाले लोक इक जगा गिठे थे, तां जिस घरे च सै थे अचानक ओथु तेज होआ दी आवाज होणा लगी। तालू अगी दियां लपटां सांई मिलणे बाली कोई चीज सारे भरोसा करणे बालयां दे सिरां पर प्रकट होई। सै सारे पवित्र आत्मा ने बरुई गे कने उना होर-होर भाषां च परमेश्वरे दी स्तुति किती। ऐ सै भाषां थियां जीना जो बोलणे तांई उना जो पवित्र आत्मा सहायता किती थी।

जालू यरूशलेम शेहरे च रेणे बाले लोकां उस शोरे जो सुणया, तां सै भीड़ ऐ दिखणे तांई आई कि क्या होआ दा था। उना विश्वासियां जो परमेश्वरे दे कितयो बडे-बडे कमा दी घोषणा करदे सुणया। सै हेरान थे क्योंकि सै उना कमा जो अपणिया ही भाषा च सुणा दे थे।

इना चे कुछ लोकां बोलया कि सै चेले नशे च थे। पर पतरस खड़ोता कने उना ने बोलया, "मेरी गल्ल सुणा! ऐ लोक नशे च नी न! जड़ा तुहांजो मिल्ला दा है सै सेई न जड़ा योएल परमेश्वरे दे संदेश देणे बाले बोलया था कि होणा: परमेश्वरे बोलया, 'आखरी दे दिना च, मैं अपणा आत्मा देणा।'"

हे इस्राएली लोको, यीशु इक ऐसा माणु था जिनी ऐ दसणे तांई कि सै कूण था बड़े अनोखे कम किते थे। उनी परमेश्वरे दिया शक्तिया ने बड़े अद्भुत कमा जो किता था। तुसां ऐ जाणदे न, क्योंकि तुसां इना कमा जो दिखया है। पर तुसां उसयो सूली पर चढ़ाई दिता!

यीशु मरी गिया पर परमेश्वरे उसयो मरयां चे जिन्दा करी दिता। उनी उसा गल्ला जो पूरा करी दिता जिसयो इक परमेश्वरे दे संदेश देणे बाले लिखया था: 'तू अपने पवित्र बंदे जो कब्रा च सड़ना नी देणा।' असां गवाह न कि परमेश्वरे यीशुऐ जो फिरी जिन्दा करी दिता।

परमेश्वर पिता हुण यीशुऐ जो अपणे सजे पासे बैठाई करी उसयो आदर दिता है। कने यीशुऐ साड़े तांई पवित्र आत्मा भेजया जियां कि उनी बायदा कितया था कि उनी भेजणा। पवित्र आत्मा ही उना कमा जो होणा दे दा है जिना जो तुसां दिखा दे कने सुणा दे न।

तुसां यीशुऐ जो सूली पर चढ़ाई दिता। पर पक्का ही जाणी लिया कि परमेश्वरे यीशुऐ जो सारियां चीजां पर प्रभु कने मसीह दोनों बणाया है!

पतरसे जो सुणने बाले लोक उदियां गल्लां ने अंदरे दीकर हिली गियो थे। इस तांई उना पतरस कने चेलयां ला पूछया, "हे भाइयो, सांझो क्या करणा चाइदा?"

पतरसे उना जो जवाब दिता, "तुसां चे हर इक अपणे पापां तांई पश्चाताप क ताकि परमेश्वर तुहाड़े पापां जो माफ करे, कने यीशु मसीह दे ना ला बपतिस्मा लिया। तालू उनी तुहांजो वरदान दे रुपे च पवित्र आत्मा भी देणा।"

पतरसे जड़ा बोलया उस पर लगभग 3,000 लोकां भरोसा किता कने यीशुऐ दे चेले बणी गे। उना बपतिस्मा लिया कने यरूशलेम शेहरे दिया कलीसिया दा हिस्सा बणी गे।

जालू प्रेरितां उना जो शिक्षा दिती तां विश्वासियां लगातार सुणया। सै हमेशा मिलदे थे कने सोगी रोटियां खांदे थे, कने हमेशा इक दुज्जे तांई प्रार्थना करदे थे। उना मिली करी परमेश्वरे दी स्तुति किती कने जड़ा कुछ भी उना बाल था उना इक दुज्जे सोगी साझा किता। शेहरे दा हर इक माणु उना तांई अच्छा विचार रखदा था। हर दिन, जादा ला जादा लोक विश्वासी बणदे गे।