42. यीशु स्वर्गे जो बापिस चली जांदा है

जिस दिने परमेश्वरे यीशुऐ जो मरयां चे जिन्दा कितया था, उदे दो चेले बखे दे ग्रां च चलयो थे। चलदे-चलदे सै यीशु सोगी जड़ा होया था। उदे बारे च गल्लां करा दे थे, उना जो आस थी कि सै मसीह था, पर तमी उसयो मारी दिता। हुण सै जनानियां बोलदियां न कि सै फिरी जिन्दा होई गिया है। सै नी जाणदे थे कि कुसा गल्ला पर भरोसा करणा है।

यीशुऐ उना बाल आई करी उना सोगी चलना शुरू किता, पर सै उसयो पछेणी नी सके। उनी पूछया कि सै कुस बारे च गल्लां करा दे थे। उना उसयो पिछले दिना च यीशुऐ सोगी होईयां सारियां घटना दे बारे च दसया। उना सोचया कि सै कुसी परदेसिए ने गल्लां करा दे थे जड़ा नी जाणदा था कि यरूशलेम शेहरे च क्या होया था।

तालू यीशुऐ उना जो समझाया कि परमेश्वरे दा वचन मसीह दे बारे च क्या बोलदा है। बड़े पेहले, परमेश्वरे दे संदेश देणे बालयां बोलया था कि बुरे लोकां मसीह जो सताणा कने मारी देणा। पर परमेश्वरे ऐ भी बोलया था कि उनी तिज्जे दिने जी पोणा।

जालू सै उस शेहरे च पुज्जे जिथू सै दोनो जणे रुकणा चांदे थे, तालू दीकर लगभग संज होई गियो थी। उना यीशुऐ जो उना सोगी रेणे तांई बोलया, कने यीशु उना सोगी इकी घरे च गिया। अपणा संजा दा खाणा खाणे तांई सै बैई गे। यीशुऐ इक रोटी लेई करी उदे तांई परमेश्वरे दा धन्यवाद किता, कने फिरी उसयो तोड़या। अचानक उना जो पता लगी गिया कि सै यीशु था। पर तालू ही यीशु उना दिया हखी अगे ला गायब होई गिया।

उना दो जणयां इक दुज्जे ने बोलया, "सै यीशु था! इस तांई जालू उनी सांझो परमेश्वरे दे वचन जो समझाया था तां असां बड़े उत्साहित थे!" तालू ही, सै निकली करी वापिस यरूशलेम शेहरे जो चली गे। जालू सै पुज्जे तां उना चेलयां जो दसया, "यीशु जिन्दा है! असां उसयो दिखया है!"

जालू चेले गल्ल करा दे थे, यीशु अचानक उस कमरे च उना सोगी प्रकट होया। उनी बोलया, "तुहांजो शान्ति मिले!" चेलयां सोचया कि सै कोई भूत था, पर यीशुऐ बोलया, "तुसां कजो डरदे न? तुसां ऐ कजो नी सोचदे न कि मैं सच्ची यीशु है? मेरे हथां कने पैरां जो दिखा। भूतां बाल ऐसा शरीर नी होंदा जदिया मेरे बाल है।" ऐ दसणे तांई कि सै कोई भूत नी था, उनी खाणे तांई कुछ मंगया। उना उसयो मछिया दा इक टुकड़ा दिता, कने उनी उसयो खाई लिया।

यीशुऐ बोलया, "मेरे बारे च परमेश्वरे दा वचन जड़ा कुछ भी बोलदा है सै पक्का होणा। मैं तुहांजो दस्सी दितया था कि इदा होणा जरूरी है।" तालू यीशुऐ उना जो परमेश्वरे दा वचन अच्छे ने समझाया। उनी बोलया, "बड़े पेहले परमेश्वरे दे संदेश देणे बालयां लिखया था कि मिंजो, मसीह जो दुख झेलणा पोणा, मरणा पोणा कने फिरी तिज्जे दिने मरयां चे जिन्दा होई जाणा।"

उना परमेश्वरे दे संदेश देणे बालयां ऐ भी लिखया था कि मेरे चेलयां परमेश्वरे दे वचने जो लोकां सुणाणा। उना हर इक जणे जो पश्चाताप करणे तांई दसणा। अगर सै ऐसा करदे न तां परमेश्वरे उना दे पापां जो माफ करणा। मेरे चेलयां इस शुभ सन्देशे दा प्रचार यरूशलेम शेहरे ला करणा। तालू उना सारियां जगा कने जातियां च जाणा। तुसां सारे मेरिया हर इक गल्ला कने कम्मा दे गवाह न जड़े मैं बोलयो कने कितयो थे, कने उस सारे दे भी जड़ा मेरे सोगी होया।

अगले चाली दिना दीकर, यीशु अपणे चेलयां पर केई बरी प्रकट होया। इक बरी सै इक ही बकते पर 500 ला जादा लोकां पर प्रकट होया! उनी अपणे चेलयां पर केई तरीकयां ने साबित किता कि सै जिन्दा था, कने उनी उना जो परमेश्वरे दे राज्य दे बारे च शिक्षा दिती।

यीशुऐ अपणे चेलयां ने बोलया, "परमेश्वरे मिंजो स्वर्गे कने धरती दे हर इक जणे पर शासन करणे दा हक दितया है। इस तांई हुण मैं तुसां ने बोलदा है: जाइकरी सारी जातियां दे लोकां जो चेला बणा। ऐसा करणे तांई, तुहांजो उना जो पिता, पुत्र, कने पवित्र आत्मा दे नाऐ ने बपतिस्मा देणा है। जड़ा कुछ भी मैं तुहांजो हुकम दितया है उना सारियां गल्लां जो मनणा भी तुहांजो उना जो सिखाणा है। याद रखा, मैं हमेशा तुहाड़े सोगी रेणा।"

यीशुऐ मरयां चे जिन्दा होणे दे चाली दिना बाद, उनी अपणे चेलयां ने बोलया, "जालू दीकर कि मेरा पिता तुहांजो शक्ति नी दिंदा है तालू दीकर यरूशलेम शेहरे च रिया। उनी तुहांजो पर पवित्र आत्मा भेजी करी इयां करणा।" तालू यीशु स्वर्गे च चली गिया, कने इकी बदले उसयो उना दिया नजरा ला लुकाई लिया। स्वर्गे च यीशुऐ सारियां चीजां पर शासन करणे तांई परमेश्वरे दे सजे पासे बैई गिया।