41. परमेश्वर यीशुऐ जो मरयां चे जिन्दा करदा है

यीशुऐ जो सूली पर चढ़ाणे बाद, यहूदी अगुवयां पिलातुसे ने बोलया, "उनी झूठे, यीशुऐ बोलया था कि मैं तीन दिना बाद मरयां चे जिन्दा होई जाणा। इस तांई कुसी जो ऐ दिखणे तांई कब्रा दी निगरानी करणी पोणी कि उदे चेले उदिया लाशा जो चोरी करी नी लेई जान। अगर सै इयां करदे न तां उना बोलणा कि सै मरयां चे जिन्दा होई गिया है।"

पिलातुसे बोलया, "कुछ सैनिकां जो लेई जा, कने जियां तुसां करी सकदे तियां कब्रा दी निगरानी करा।" इस तांई उना उस कब्रा दे दरबाजे दे पत्थरे पर इक मोहर लाई दिती। उना ऐ पक्का करणे तांई ओथु सैनिकां जो भी बैठाई दिता कि कोई भी उदिया लाशा जो चोरी नी सके।

यीशुऐ दे मरणे दे दो दिन बाद सब्ते दा दिन था। कोई भी सब्ते दे दिने कम्म नी करी सकदा था, इस तांई यीशुऐ दा कोई भी साथी कब्रा पर नी आया था। पर सब्ते दे दिने बाद, भ्यागा तड़के, कुछ जनानियां यीशुऐ दिया कब्रा पर जाणे तांई तैयार होईयां। सै उदे शरीरे पर होर भी मसालयां जो लाणा चादियां थियां।

उना जनानिया दे पुज्जणे ला पेहले कब्रा पर इक बड़ा बडा भूकम्प होया। स्वर्गे ला इक स्वर्गदूते आइकरी उस पत्थरे जो हटाई दिता जड़ा कब्रा दे दरबाजे पर था कने उस पर बैई गिया। ऐ स्वर्गदूत लौई सांई चमका दा था। कब्रा पर जड़े सैनिक थे उना उसयो दिखया। सै इतणे डरी गियो थे कि मरयां सांई धरती पर डेई पे।

जालू सै जनानियां कब्रा पर पुज्जियां तां उनी स्वर्गदूते उना ने बोलया, "मत डरा। यीशु ऐथू नी है। सै मरयां चे जी पिया है, जियां उनी बोलया था की उनी जिन्दा होई जाणा! कब्रा च तोपा कने दिखा।" उना जनानिया कब्रा दे अंदर कने जिथू यीशुऐ दा शरीर रखया था ओथु तोपया कने उना जो ओथु उदा शरीर नी मिल्ला था!

तालू उनी स्वर्गदूते उना जनानिया जो बोलया, "जाई करी उदे चेलयां जो दसा, 'यीशु मरयां चे जिन्दा होई गिया है कने उनी तुहाड़े अगे-अगे गलील जो जाणा।'"

सै जनानियां हेरान भी होईयां कने खुश भी होईयां। सै चेलयां जो ऐ शुभ संदेश सुणाणे तांई दौड़ियां।

जालू सै जनानियां चेलयां जो ऐ शुभ संदेश दसणे तांई अपणे रस्ते पर थियां, तां यीशु उना बाल प्रकट होया। सै उदे पैरां पर पेई गियां। तालू यीशुऐ बोलया, "मत डरा। जाई करी मेरे चेलयां जो गलील जाणे जो बोला। उना ओथु मिंजो दिखणा।"