40. यीशुऐ जो सूलिया पर चढ़ाया जादां है

यीशुऐ दा मजाक उड़ाणे बाद, सैनिक उसयो सूलिया पर चढ़ाणे तांई लेई गे। उना उस सूली जो भी उसी ला चुकवाया जिस पर उना उसयो मारणा था।

सै सैनिक यीशुऐ जो उसा जगा पर लेई करी आए जिसयो "खोपड़ी" बोलदे न कने उदे हथां कने पैरां जो सूलिया पर किलां ने ठोकी दिता। पर यीशुऐ बोलया, "हे पिता, इना जो माफ कर, क्योंकि ऐ नी जाणदे कि ऐ क्या करा दे न।" उना इक तख्ती बणाई कने उदे सिरे ऊपर टंगी दिती। उस पर लिखया था, "यहूदियां दा राजा।" पिलातुसे उना जो एई लिखणे तांई बोलया था।

तालू सैनिकां यीशुऐ दे कपड़यां जो लेणे तांई चिट्ठियां पाइयां। जालू उना ऐसा किता तां उना उस भविष्यद्वाणिया जो पूरा किता जड़ी बोलदी थी, "उना मेरे कपड़यां जो अप्पू चे बंडी लिया, कने मेरे कपड़यां तांई चिट्ठियां पाईयां।"

ओथु दो डाकू भी थे, जीना जो सैनिकां तालू ही सूलिया पर चढ़ाया था। उना डाकूआं जो यीशुऐ दिया दोनों तरफा रखया था। उना चे इकी डाकूऐ यीशुऐ दा मजाक उड़ाया, पर दुज्जे बोलया, "क्या तू नी डरदा कि परमेश्वरे तीजो सजा देणी? असां तां बड़े बुरे काम्म करणे तांई दोषी न, पर ऐ माणु निर्दोष है।" फिरी उनी यीशुऐ ने बोलया, "जालू तू अपणे राज्य च ओंगा तां कृपया मिंजो याद रखयां।" यीशुऐ जवाब दिता, "आज ही तू मेरे सोगी स्वर्गलोक च होणा।"

यहूदी अगुवयां कने भिड़ा चे होर लोकां यीशुऐ दा मजाक उड़ाया। उना उसयो बोलया, "अगर तू परमेश्वरे दा पुत्र है, तां सूली ला थले उतरी आ कने अप्पू जो बचाई ले! तालू असां तीजो पर भरोसा करणा।"

तालू उस सारे देशे दा अम्बर पूरा काला होई गिया, कने सै दोपेरा दा बकत था। कने तीन घंटे दीकर इयां ही रिया था।

तालू यीशुऐ पुकारी करी बोलया, "पूरा होया! हे पिता, मैं अपणी आत्मा तेरे हथां च दिंदा है।" तालू उनी अपणे सिरे जो झुकाया कने अपणे प्राण छडी दिते। जालू सै मरया तां इक हिलण होया। सै बडा पर्दा जड़ा परमेश्वरे दिया हजुरी ला लोकां जो लग करदा था ऊपरे ला थले दीकर फटी करी दो हिस्सयां च होई गिया।

अपणी मौत दे जरिये, यीशुऐ लोकां तांई परमेश्वरे बाल ओणे दा रस्ता खोली दिता। जालू यीशुऐ दी निगरानी करणे वाले इकी सैनिके जड़ा कुछ होया था ऐ सब दिखया तां उनी बोलया, "पक्का ही ऐ माणु निर्दोष था। ऐ परमेश्वरे दा पुत्र है।"

तालू यूसुफ कने नीकुदेमुस नाऐ दे दो यहूदी अगुवे आए। सै भरोसा करदे थे कि यीशु ही मसीह था। उना पिलातुसे ला यीशुऐ दिया लाशा जो मंगया। उना उदे शरीरे जो कपड़े च लपेटया। तालू सै उसयो इकी कब्रा च लेई गे कने उदे अंदर रखी दिता, सै कब्र सपड़े जो कटी करी बणाईयो थी। तालू उना उस कब्रा दे दरबाजे जो बंद करणे तांई इक बडे पत्थरे जो रखी दिता।