39. यीशु पर मुकद्दमा चलदा है

हुण ऐ अधिया राती दा बकत था। सै सैनिक यीशुऐ जो महायाजके दे घरे जो लेई आऐ, क्योंकि सै यीशुऐ ला सवाल करणा चांदा था। पतरस दूरे ला उना दा पीछा करा दा था। जालू सैनिक यीशुऐ जो घरे अंदर लेई गे, तां पतरस बाहर रुकी करी अग्ग तपणा लगा।

घरे दे अंदर, यहूदी अगुवयां यीशुऐ पर मुकद्दमा चलाया। सै उदे खिलाफ झुठियां गल्लां बोलणे तांई मते झूठे गवाहां जो लेई करी आए। हालाँकि, उना दियां गल्लां इकी दुज्जे ला सेहमत नी थियां, इस तांई यहूदी अगुवे ऐ साबित नी करी सके कि यीशु कुसी गल्ला दा दोषी था। यीशुऐ कुछ नी बोलया।

आखरी च, महायाजके सीधे यीशुऐ पासे दिखी करी बोलया, "सांझो दस कि क्या तू ही जिन्दे परमेश्वरे दा पुत्र मसीह है?"

यीशुऐ बोलया, "मैं ही है, कने तुसां मिंजो परमेश्वरे सोगी बैठया होया कने स्वर्गे ला ओंदा भी दिखणा।" महायाजके अपणे कपड़े फाड़ी ले क्योंकि जड़ा यीशुऐ बोलया उसा गल्ला पर बड़ा गुस्सा था। सै होर अगुवयां जो बकया, "सांझो ऐ दसणे तांई कुसी होर गवाह दी जरूरत नी है कि इनी माणुऐ क्या कितया है! तुसां अप्पू ही उसयो ऐ बोलदे सुणया है कि सै परमेश्वरे दा पुत्र है। उदे बारे च तुहाड़ा क्या फेसला है?"

सारे यहूदी अगुवयां महायाजक जो जवाब दिता, "सै मरणे दे काबिल है!" तालू उना यीशुऐ दियां हखी पर पट्टी बनी दिती, उस पर थुक्या, उसयो मारया, कने उदा मजाक उड़ाया।

कने पतरस, जालू सै घरे बाहर इन्तजार करा दा था। तालू इकी दासिया उसयो दिखया। उनी उसयो बोलया, "तू भी यीशुऐ सोगी था!" पतरसे मना करी दिता। बादे च, कुनी होर कुड़िया भी एई गल्ल बोली, कने पतरसे फिरी मना करी दिता। आखीर च, कुछ लोकां बोलया, "असां जाणदे न कि तू यीशुऐ सोगी था क्योंकि तुसां दोनों गलील ला न।"

तालू पतरसे बोलया, "अगर मैं इस माणुऐ जो जाणदा है तां परमेश्वर मिंजो श्राप दे!" तालू ही पतरसे जो इयां बोलणे बाद, इक मुर्गे बाँग दिती। यीशुऐ पीछे मुड़ी करी पतरसे जो दिखया।

पतरस ओथु ला चली गिया कने जोरे-जोरे ने रोया। तालू ही, यीशुऐ जो पकड़ाणे वाले यहूदा दिखया कि यहूदी अगुवयां यीशुऐ जो मौत दी सजा दिती है। यहूदा बड़ा दुखी होई गिया कने उनी जाई करी खुदखुशी करी लेई।

हुण उस देशे दा राज्यपाल पिलातुस था। सै रोम तांई कम्म करदा था। यहूदी अगुवे यीशुऐ जो उदे बाल लेई करी आए। सै चांदे थे कि पिलातुस उसयो मौत दी सजा दे कने उसयो मारी दे। तालू पिलातुसे यीशुऐ ला पूछया, "क्या तू यहूदियां दा राजा है?"

यीशुऐ जवाब दिता, "तू सच ही बोलया है। पर मेरा राज्य एथू धरती दा नी है। अगर होंदा तां मेरे दास मेरे तांई लड़ाई करदे। मैं धरती पर परमेश्वरे दे बारे च सच दसणे तांई आया है। हर इक जणा जड़ा सच ने प्यार करदा है सै मेरी सुणदा है।" पिलातुसे बोलया, "तां सच क्या है?"

यीशुऐ सोगी गल्ल करणे बाद, पिलातुस बाहर लोकां दिया भिड़ा बाल आया कने बोलया, "मिंजो एसी कोई बजा नी पता लगी की जिस तांई इस माणुऐ जो मौत दी सजा हो।" पर यहूदी अगुवयां कने भिड़ा जोरे ने बोलया, "उसयो सूली पर चड़ाई दिया!" पिलातुसे जवाब दिता, "उनी कुछ भी गलत नी कितया है।" पर सै होर भी उचिया आवाज च बोलणा लगे। तालू पिलातुसे तीजी बरी बोलया, "सै दोषी नी है!"

पिलातुस डरी गिया कि कुथी भीड़ दंगे शुरू नी करी दे, इस तांई सै अपणे सैनिकां ने यीशुऐ जो सूली पर चढ़ाणे तांई मनी गिया। रोमी सैनिकां यीशुऐ जो कोड़े लाए, कने उसयो राजे दे कपड़े पहनाए, कने उदे सिरे पर कंडयां ने बणया मुकुट रखया। तालू सै ऐ बोली करी उदा मजाक उड़ाणा लगे, "दिखा, यहूदियां दा राजा!"