38. यीशुऐ दा पकड़वाया जाणा

हर साल, यहूदी लोक फसह दा त्योहार मनांदे थे। ऐ त्योहार इस तांई मनांदे थे क्योंकि केई शताब्दियां पेहले परमेश्वरे उना दे पूर्वजों जो मिस्र दिया गुलामिया ला छुड़ाया था। लगभग तीन सालां बाद यीशुऐ सारयां सामणे प्रचार करणा कने शिक्षा देणा शुरू किता। यीशुऐ अपणे चेलयां जो दसया कि सै उना सोगी यरूशलेम शेहरे च फसह दे त्योहारे जो मनाणा चांदा है, कने ऐ भी कि उसयो ओथु मारी भी देणा।

यीशुऐ दे चेलयां च इक यहूदा नाऐ दा बंदा था। यहूदा प्रेरितां दे पैसयां दिया थेलिया जो रखदा था, पर अक्सर सै उसा थेलिया चे पैसे कडी लेदां था। यीशु कने उदे चेलयां जो यरूशलेम शेहरे च पुजणे बाद यहूदा यहूदी अगुवयां बाल गिया। उनी पैसयां दे बदले च यीशुऐ जो उना दे हथे च पकड़वाणे तांई बोलया। सै जाणदा था कि यहूदी अगुवे मंदे नी थे कि यीशु ही मसीह था। सै जाणदा था कि सै उसयो मारी देणा चांदे थे।

महायाजके दे बोलणे पर यहूदी अगुवयां यीशुऐ जो उना दे हथां च पकड़वाणे तांई यहूदा जो ती चाँदिए दे सिक्के दिते। ऐ तियां ही होया जदिया कि संदेश देणे बालयां बोलया था कि होणा। यहूदा मनी गिया कने ती सिक्के लेई करी चली गिया। सै यीशुऐ जो गिरफ्तार कराणे तांई कुसी मोके दिया तोपा च था।

यरूशलेम शेहरे च, यीशुऐ अपणे चेलयां सोगी फसह दा त्योहार मनाया। फसह दे खाणे दे बेले, यीशुऐ रोटी लेई करी तोड़ी। उनी बोलया, "इसयो ले कने खा। ऐ मेरा शरीर है जड़ा मैं तुहाड़े तांई दिंदा है। इसयो मेरिया यादा च करयां।" इयां यीशुऐ बोलया कि उनी उना तांई मरी जाणा, मतलब की उना तांई उनी अपणे शरीरे जो बलि चढ़ाई देणा।

फिरी यीशुऐ एक दाखरस दा गलास लिया कने बोलया, "इसेयो पी लिया। ऐ नोऐ बायदे दा मेरा खून है जड़ा मैं नियोरना है ताकि परमेश्वर तुहाड़े पापां जो माफ करे। हर बरी इसयो पिंदे बकत मेरी याद च इसयो करा जड़ा मैं हुण करा दा है।"

तालू यीशुऐ अपणे चेलयां ने बोलया, "तुसां चे इकी जणे मिंजो पकड़वाणा।" चेले हेरान होई गे, कने पूछणा लगे कि कुनी ऐसा कम करणा। यीशुऐ बोलया, "मिंजो पकड़वाणे बाला माणु सै है जिसयो मैं ऐ रोटिया दा टुकड़ा दिंदा है।" तालू उनी सै रोटी यहूदा जो दिती।

उसा रोटिया जो लेणे बाद, यहूदा च शैतान बड़ी गिया। यहूदा निकली करी यीशुऐ जो गिरफ्तार करणे तांई यहूदी अगुवयां दी सहायता करणे तांई चली गिया। ऐ राती दा बकत था।

खाणा खाणे बाद, यीशु कने उदे चेले जैतून पहाड़े पर चली गे। यीशुऐ बोलया, "तुसां सारयां अज राती मिंजो छडी देणा। ऐ लिखया है, 'मैं चरवाहे जो मारणा कने सारियां भेडां बिखरी जाणा।'"

पतरसे जवाब दिता, "भले ही बाकी दे सारे तीजो छडी देन, मैं नी छडणा!" तालू यीशुऐ पतरसे जो बोलया, "शैतान तुसां सारयां जो लेणा चांदा है, पर हे पतरस, मैं तेरे तांई प्रार्थना किती कि तू भरोसे ला चुकी नी जाऐ। फिरी भी, आज दी राती, मुर्गे दे बाँग देणे ला पेहले तू तिन बरी मना करणा कि तू मिंजो जाणदा भी नी है।"

पतरसे तालू यीशुऐ ने बोलया, "भले ही मैं मरी भी जां, मैं कदी भी तीजो मना नी करणा!" बाकी दे सारे चेलयां भी ऐई बोलया।

तालू यीशु अपणे चेलयां सोगी गतसमनी नाऐ दिया जगा पर गिया। यीशुऐ अपणे चेलयां जो प्रार्थना करणे तांई बोलया ताकि शैतान उना दी परीक्षा ना करे। तालू यीशु अप्पू भी प्रार्थना करणे तांई चली गिया।

यीशुऐ तीन बरी प्रार्थना किती, "हे मेरे पिता, अगर होई सके तां कृपा करिके ऐ दुखे दा कटोरा पीणे तांई मिंजो मत दे। पर अगर लोकां दे पाप माफ करणे तांई कोई होर रस्ता नी है, तां तेरी ही इच्छा पूरी हो।" यीशु बड़ा व्याकुल था कने उदा पसीना खूने दियां बूँदा सांई था। उसयो शक्ति देणे तांई परमेश्वरे इक स्वर्गदूते जो भेजी दिता।

हर बरी प्रार्थना दे बाद, यीशु अपणे चेलयां बाल आया, पर सै सोई गियो थे। जालू यीशु तीजी बरी बापिस आया कने बोलया, "जागी जा! मेरा पकड़वाणे बाला एथू है।"

यहूदी अगुवयां, सैनिकां, कने इक बड़ी बडी भिड़ा सोगी यहूदा आया। उना तलवारां कने लाठियां लियां थियां। यहूदा यीशुऐ बाल आई करी उसयो बोलया, "हे गुरु, नमस्कार," कने उदी चूमी लेई। उनी ऐसा इस तांई किता ताकि यहूदी अगुवयां जो पता लगी जा कि एई यीशु है। तालू यीशुऐ बोलया, "हे यहूदा, क्या तू इक चूमे ला मिंजो पकड़वा दा है?"

जालू सै सैनिक यीशुऐ जो पकड़ा दे थे, तां पतरसे अपणी तलवार निकाली कने महायाजके दे इकी सेवके दा कन बडी दिता। यीशुऐ बोलया, "तलवारा जो दूर कर! मैं अपणे पिता ला मिंजो बचाणे तांई स्वर्गदूतां दी इक सेना तांई विणती करी सकदा है। पर मिंजो मेरे पिता दी गल्ल मनणी है।" तालू यीशुऐ उस माणुऐ दे कने जो ठीक करी दिता। तालू सारे चेले नठी गे।