37. यीशु लाज़र जो जिन्दा करदा है

लाज़र नाऐ दा इक माणु था। उदियां दो बेहणा थियां जीना दे ना मरियम कने मार्था थे। सै सारे यीशुऐ दे खरे मित्र थे। इक दिन, कुनी यीशुऐ जो दसया कि लाज़र बड़ा बीमार है। जालू यीशुऐ ऐ सुणया तां उनी बोलया, "ऐ बीमारी लाज़रे दे मरणे सोगी नी मुकणी है। इदे बजाए, इना गल्लां लोकां जो परमेश्वरे दा आदर करणे तांई प्रेरित करणा।"

यीशु अपणे मित्रां ने प्यार करदा था, पर जिथू सै था ओथु उनी दो दिना दीकर इंतजार किता। उना दो दिना बाद, उनी अपणे चेलयां ने बोलया, "ओआ, मुड़ी करी यहूदिया प्रदेशे जो चलदे।" चेलयां जवाब दिता, "पर हे गुरु, हुण ही कुछ बकत पेहले ओथु दे लोक तीजो मारी देणा चांदे थे!" यीशुऐ बोलया, "साड़ा मित्र लाज़र सोई गिया है, कने मिंजो उसयो जगाणा है।"

यीशुऐ दे चेलयां जवाब दिता, "हे प्रभु, अगर लाज़र सोआ दा है, तां उनी ठीक होई जाणा।" तालू यीशुऐ उना जो साफ-साफ बोली दिता, "लाज़र मरी गिया है। मैं खुश है कि मैं ओथु नी था, ताकि तू मिंजो पर भरोसे करी सके।"

जालू यीशु लाज़र दे ग्रां च पुज्जा तां लाज़रे जो मरयो पेहले ला ही चार दिन होई गिया थे। मार्था यीशुऐ ने मिलणे तांई बाहर आई कने बोलया, "हे प्रभु, अगर तू एथू होंदा तां मेरा भाई नी मरदा। पर मैं भरोसा करदी है कि जड़ा कुछ भी तू परमेश्वरे ला मंगगा उनी तीजो देणा।"

यीशुऐ जवाब दिता, "मरणे बाद जिन्दा होणा कने जिन्दगी मैं है। जड़ा कोई मिंजो पर भरोसा करदा है, अगर सै मरी भी जाए तमी उनी जी पोणा। जड़ा कोई मिंजो पर भरोसा करदा है उनी कदी नी मरणा। क्या तू इस पर भरोसा करदी है?" मार्था जवाब दिता, "हे प्रभु, मैं भरोसा करदी है कि तू परमेश्वरे दा पुत्र मसीह है।"

तालू मरियम आई। उनी यीशुऐ दे पैरां च पेई करी बोलया, "हे प्रभु, अगर तू ऐथू होन्दा तां मेरा भाई नी मरदा।" यीशुऐ उसयो पूछया, "तुसां लाज़रे जो कुथू रखया है?" उना उसयो दसया, "कब्रा च। आ कने दिखी ले।" तालू यीशु रोणा लग्गा।

सै कब्र इक गुफा थी जिसा दे दरवाजे पर इक पत्थर रखया था। जालू यीशु कब्रा पर पुज्जा तां उनी उना ने बोलया, "पत्थरे जो हटाई दिया।" पर मार्था बोलया, "उसयो मरयो चार दिन होई गियो न। हुण तां उदे च बदबु ओआ दी होणी।"

यीशुऐ जवाब दिता, "क्या मैं तीजो नी बोलया था कि अगर तुसां मिंजो पर भरोसा करगे तां परमेश्वरे दिया शक्तिया जो दिखगे?" इस तांई उना पत्थरे जो हटाई दिता।

तालू यीशुऐ ऊपर स्वर्गे पासे दिखी करी बोलया, "हे पिता, मेरी सुणने तांई मैं तेरा धन्यवाद करदा है। मैं जाणदा है कि तू हमेशा मेरी सुणदा है, पर मैं एथू खड़ोत्यो सारे लोकां दिया सहायता करणे तांई बोलया ताकि ऐ भरोसा करन कि तू मिंजो भेजया है।" तालू यीशुऐ अबाज लाई, "हे लाज़र, बाहर निकली आ!"

कने लाज़र बाहर निकली आया! सै हले भी कफने च लिपटया था। यीशुऐ बोलया, "इस कफने ला निकालने च उदी सहायता करा कने उसयो अजाद करा।" इस चमत्कारे दिया बजा ला मते यहूदियां यीशुऐ पर भरोसा किता।

पर यहूदियां दे धार्मिक अगुवे यीशुऐ ने जलना लगे, इस तांई सै गिठा होए कने योजना बणाणा लगे की कियां यीशु कने लाज़रे जो मारी देन।