13. इस्राएल के साथ मा परमेसुर कै वाचा

इस्राएलिन का लाल समुन्दर के पार लइ जाय के बाद, परमेसुर उनका जंगल के रास्ते से सीनै पहार कि तरफ लइ चलो। या वहय पहार आय, जवनी जगा मा मूसा जलत झाड़ी का दीख तेइस। उयीं लोगन ने वही पहार के तरे आपन तम्बू लगाय दीनेंन।

परमेसुर मूसा अउर इस्राएलिन से कहिस, “यदि तुम निश्चय मोरी आज्ञन का मनिहा, अउर मोरी वाचा का पालन करिहा, तबहिन सब लोगन मा से तुम मोर निज लोग हुइहा अउर तुम मोरी नजर मा याजकन का समाज अउर पवित्र जाति हुइहा।”

तीन दिनन तक लोगन ने खुद का तयार कीनेन ताकि परमेसुर उनके नेरे आय सकय। तब परमेसुर सीनै पहार की चोटी पर से तरे उतरो। जब व आओ तवें भुईडोल भा, बिजली चमकी, धुआं उठा अउर तुरहियन की जोरदार आवाज भई। तब मूसा अपने आप ऊपर पहार मा चढ़ गा।

तब परमेसुर लोगन के साथ इयक वाचा बाँधेस। व कहिस, “मैं तुम्हार परम प्रधान परमेसुर आहूँ। मै ही हूँ जउन तुमका मिस्र देश कि गुलामी से छुड़ाऔ है। कउनो दुसरे देवता कै उपासना न करेया।”

“मूर्तियाँ न बनाया अउर वहिकै उपासना न कीनहेया, कहेसे मै परम प्रधान परमेसुर तुम्हार इयक मात्र परमेसुर आहूँ। अनुचित तरीका से मोरे नाम का उपयोग न किनहेया। विशराम के दिन का पवित्र माने के खातिर याद रखया। दुसरे शब्दन मा छः दिनन मा आपन पूरे काम किनहेया, सातवाँ दिन तुम्हारे खातिर विशराम करै अउर मोही याद करै का दिन है।”

“अपने मताई अउर बाप का आदर कीनहेया। हत्या न कीनहेया। व्यभिचार न कीनहेया। चोरी न कीनहेया। झूठ न बोलेया। अपने पड़ोसी की मेहरिया, वहिके घर, या वहिके कउनो भी सामान का लइलेय कै इच्छा न कीनहेया।”

सवै जन उन नियमन का मानय के खातिर सहमत हुइ गे जउन परमेसुर उनका दीन तै। उयीं सिरफ़ परमेसुर के लोग हुवय के खातिर अउर सिरफ वहिकै ही उपासना करै के खातिर सहमत हुइ गे।

परमेसुर इस्राएलिन से इयक बहुत बड़ा मिलाप वाला तम्बू बनावय का कहिस। व उनका सही-सही बताइस कि या तम्बू का कइसे बनावय का है अउर वहिके भीतर कउन-कउन चीजन का रखै का है। उसने उनका व तम्बू का द्वि कमरन मा बांटय के खातिर इयक बहुत बड़ा पर्दा का बनावय के खातिर कहिस। परमेसुर व पर्दा के पाछे वाले कमरा मा आयी अउर वही मा रही। व कमरा मा केवल महायाजक के जाय कै अनुमति रहै।

उन लोगन को व मिलाय वाले तम्बू के आगें इयक वेदी का बनावय का रहय। जउन कउनो भी परमेसुर की व्यवस्था का उल्लंघन करी व वही वेदी पर इयक जानवर का लइकै आई। तब याजक वही बलि करी अउर वेदी पर परमेसुर के खातिर बलि के रूप मा जलाई। परमेसुर कहिस कि व जानवर का लहू व व्यक्ति के पापन का ढक लयी। या रीति से, अब परमेसुर व पाप का न देखी। व व्यक्ति परमेसुर की नजर मा “शुद्ध” ठहरी। परमेसुर मूसा के भाई हारून का अउर हारून के वंशजन का अपने याजक होय के खातिर चुनिस।

तब परमेसुर ने इन दस आज्ञाओ को पथरा की द्वि पटियन मा लिख कै मूसा का दयी दीनेस। परमेसुर पालन करै के खातिर लोगन का दुसरी बहुत सी व्यवस्थाएं दीनेस। परमेसुर ने वायदा कीनेस कि यदि उयीं लोग इन व्यवस्थन का पालन करत है तो परमेसुर उन लोगन का आशिरवाद दयी अउर उनकै सुरक्षा करी। लेकिन व कहिस कि अगर उयीं इनका पालन न करिहै तबहिन व उनका दंडित करी।

कई दिनन तक, मूसा सीनै पहार की चोटी पर रहो। व परमेसुर से बात कर रहो तय लेकिन लोग वहिके वापस लउटय कै प्रतीक्षा करत-करत थक गे। यहीखातिर उयीं हारून के नेरे सोना लइकै आये अउर वहिसे मूर्ती बनावय के खातिर कहिन ताकी उयीं परमेसुर के बजाय वहिकै उपासना कर सकैं। यही रीत से उयीं भयंकर तरा से परमेसुर के खिलाफ पाप कीनेन।

हारून ने बछवा के आकार मा सोने कै इयक मूरत बनाई। उन लोगन ने व मूरत कै उपासना करब शुरु कर दीनेन अउर वहिके खातिर बलि चढ़ाएन! उनके पाप के कारण से परमेसुर उनसे बहुत क्रोधित भा। परमेसुर ने मूसा से कहिस व उनका नाश कर देव चाहत तै। लेकिन मूसा उनकों नही मारैं का परमेसुर से अनुरोध कीनेस। परमेसुर वहिकी विनती का सुनेस अउर उनका नाश न कीनेस।

आखिरकार मूसा सीनै पहार से तरे उतर आओ। व उयीं द्वि पथरा कि पटियन का लहें रहै जउनिन पर परमेसुर ने दस आज्ञन का लिखो तय। जब मूसा वही मूरत का दिखिस, व इत्ता क्रोधित भा कि व उन पटियन का चकनाचूर कर दीनेस।

मूसा उयीं मूरतिन का जलाय डारेन अउर पीस कै उनका बुरादा बनाय दीनेस, अउर व बुरादे का पानी मा मिलाय कै उन लोगन का व पानी पिलाय दीनेस। उनके पाप के कारन परमेसुर उन लोगन पर इयक विपत्ति भेजिस अउर उनमा से बहुत लोग मरगे।

जिन पटियन का मूसा तोड़ दीन तय उनकी जगा लेय के खातिर मूसा ने उन दस आज्ञन कि पथरा कि नयी पटियां बनाइस। तब व फिर से पहार मा चढ़गा अउर प्रार्थना कीनेस कि परमेसुर उन लोगन का क्षमा करै। परमेसुर ने मूसा कै सुनी अउर उनका क्षमा कर दीनेस। नयी पटियन पर दस आज्ञन को लिए हुए मूसा पहार से तरे उतर आऔं। तब परमेसुर ने सीनै पहार से लइकै वायदा के देश तक इस्राएलिन कै अगुवाई कीनेस।