36. परिवर्तन

इयक दिन, यीशु ने अपने तीन चेला, पतरस, याकूब, अउर यूहन्ना का अपने साथ मा लयी लीनेस। (या यूहन्ना नाम का चेला व आदमी नउहै जउन यीशु का बपतिस्मा दीन तै) उयीं प्रार्थना करै के खातिर इयक ऊंचे पहार मा चले गे।

जब यीशु प्रार्थना कर रहो तै तो वहिका चेहरा सूरज कि तरा उज्ज्वल हुई गा तै। वहिके कपड़ा उजियारे कि तरा सफ़ेद हुई गे ते, जइसा जमीन पर कउनो कर सकै वहिसे भी बड़ कै सफ़ेद।

तब मूसा अउर एलिय्याह परमेसुर का संदेस बतावे वाले प्रकट भए। यी आदमी या पृथ्वी मा या समय से सैकड़न साल पहिले रहो करत ते। उयीं यीशु से वहिके मरै के बारे मा बात कीनन, कहे से व जल्दी ही यरूशलेम मा मर जयी।

जब मूसा अउर एलिय्याह यीशु से बातै कर रहे ते तब पतरस यीशु से कहिस, “हमारे खातिर इहाँ हुवब भला है। हम तीन मंडप बनइवें, इयक तोरे खातिर, इयक मूसा के खातिर, अउर इयक एलिय्याह के खातिर।” लेकिन पतरस न जानत तै कि व काय कहि रहो है।

जब पतरस बात कर रहो तै, तो इयक चमकीला बादर तरे आय कै उनमा छाय गा। फिर उयीं बादर मा से इयक आवाज का सुनेन। व कहिस, “या मोर लरका आय जेहिका मै पियार करत हउँ। मै वहिसे खुश हउँ। वहिकै सुनो।” उयीं तीनो चेला डेराय गे अउर जमीन मा लोट गे।

तब यीशु उनका छुईस अउर कहिस, “डेराओ नहीं। उठ जाओ।” जब उयीं चारो तरफ दिखिन, तो यीशु का छोड़ अपने साथ अउर कउनो का न देखिन।

यीशु अउर उयीं तीनो चेले व पहार से वापिस तरे उतर आए। तब यीशु उनसे कहिस, “अबै जउन इहाँ भा वहिकै चर्चा कउनो से न कीनहेया। मै जल्दी मर जइहउँ अउर फिर से जिवित हुई जइ हऊँ। यही के बाद, तुम लोगन का बताय सकत हऊ।”