4. अब्राहम के संघे परमेसुर का वाचा

बाढ़ आवय के बहुत साल बाद, संसार मा बहुत ज्यादा आदमी रहत ते अउर सब आदमी फिर से परमेसुर के अउर आपस मा एक-दुसरे के खिलाफ पाप कीनेन। कहेसे उयीं सब एक ही भाषा बोलो करत ते। यहीखातिर उयीं सब एक साथ इकट्ठा भे अउर इयक नगर का बनावें लाग। जइसा परमेसुर ने आज्ञा दीन तय, वहिके अनुसार उयीं पूरे संसार मा न फइले।

उयीं सब बहुत घमंडी रहै अउर उनका कउन तना का जीवन जेव चाही या बारे मा उयीं परमेसुर के आदेश का बिलकुल पालन नही करो चाहत ते। यहाँ तक उयीं इयक अइसी मीनार बनाउव शुरु कीनेन जउन सरग तक पहुचय। परमेसुर उन सब का देखिस कि अगर उयीं सब इय्क साथ इकट्ठा हुई कै बुरे काम करत रही है तो उयीं बहुत से पाप के काम कर सकी है।

यहीखातिर परमेसुर उनकी भाषा का बहुत सारी दुसरी भाषन मा बदल दीनेस अउर उन लोगन का पूरी दुनिया मा फइलाय दीनेस। जउने नगर का उयीं बनाउब शुरु कीन तेइन वा नगर बाबुल कहलाइस, जेहिका मतलब है “गड़बड़ी।”

कई सौ साल के बाद, परमेसुर ने अब्राम नाम के इयक आदमी से बात करिस। परमेसुर वहिसे कहिस, “आपन देश अउर परिवार का छोड़ कै व देश का चलो जा जउन मै तोहिका देखावत हऊ। मै तोही आशीष दइहव अउर तोहिसे इयक बड़ी जाति वनइहव। मै तोर नाम महान करिहव। जउन तोही आशीष दयी मै वही आशीष दयीहव अउर जउन तोही शराप दयी मै वही शराप दयीहव। तोरे कारण संसार के सबै कुल का आशीष पइ है।”

अतःअब्राम ने परमेसुर कै आज्ञा मानिस। व आपन मेहरिया सारै का साथ लीनेस। अउर अपने पूरे सेवकन अउर आपन पूरा धन-दउलत का भी लीनेस अउर व देश का अर्थात कनान देश का चलो गा जउन परमेसुर वही देखाइस तै।

जवै अब्राम कनान पहुचो तबै परमेसुर वहिसे कहिस, “अपने चारो कनै देख। मै तोही या पूरा देश दइहव अउर तोर वंशज हमेशा के खातिर यहिमा अधिकार राखी।” तब अब्राम व देश मा बस गा।

मलिकिसिदक नाम का इयक आदमी रहै, जउन परम प्रधान परमेसुर का याजक रहै। इयक दिना जबै अब्राम युद्ध करकै लउट रहो तै वा अउर अब्राम मिले। मलिकिसिदक ने अब्राम का आशीष दीनेस अउर कहिस कि परम प्रधान परमेसुर जउन सरग अउर पृथ्वी का मालिक है व तोही आशीष दयी। फिर अब्राम, युद्ध मा जीती सबै चीजन का दशवां अंश मलिकिसिदक का दीनेस।

बहुत साल गुजर गे लेकिन अबै तक अब्राम अउर सारै के कउनो लरका न भा। परमेसुर ने अब्राम से बात करी अउर फिर से वायदा किनेस कि वहिके इयक लरका पइदा हुई अउर जइसिन आसमान मा तरइयाँ है वइसिन ही वहिके बहुत सारे वंशज हुईहै। अब्राम ने परमेसुर के वायदा पर विश्वास कीनेस। परमेसुर घोषणा कीनेस कि अब्राम इयक धर्मी आदमी है, कहेसे व परमेसुर के वायदा पर विश्वास कीनेस।

फिर परमेसुर ने अब्राम से इयक वाचा बाँधिस। सामान्य रूप से इयक वाचा द्वि दलन के बीच मा इयक दुसरे के खातिर कामन का करै का इयक समझउता हुवत है। लेकिन या विषय मा परमेसुर ने अब्राम से व वायदा तब कीन, जब अब्राहम सोए रहो तै। पर फिर भी परमेसुर कै आवाज का सुन सकत तय। परमेसुर बोलिस, “मै तोरे तन से उत्पन्न करकै तोही तोर इयक लरका दइहव। मै तोरे वंशजन का या कनान देश देत हऊ।” लेकिन अबैं तक अब्राम के कउनो लरका नहीं भा।