48. यीशु ही वायदा कीन हुआ मसीही आय

जब परमेसुर ने संसार का बनाइस तो सब कुछ ठीक रहय। कउनो पाप न रहय। आदम अउर हब्बा इयक दुसरे का पियार करत ते, अउर उयीं परमेसुर का भी पियार करत ते। कउनो बेमारी या मउत न रहय। परमेसुर अइसा ही संसार का चाहत तै।

शैतान ने साँप के माध्यम से बगीचा मा हब्बा से बात कीनेस, कहेसे व वहिका धोखा देव चाहत तै। तब हब्बा अउर आदम ने परमेसुर के खिलाफ पाप कीनेन। कहेसे उयीं पाप कीन तय यहीखातिर जमीन मा रहय वाले सबय लोग मरत है।

कहेसे आदम अउर हब्बा ने पाप कीन तय, यहीखातिर कुछ अउर भी बुरा भा। उयीं परमेसुर के दुश्मन बन गे। जेहिके परिणाम-स्वरुप, तब से हर इयक आदमी ने पाप कीन है। हर इयक आदमी जनम से ही परमेसुर का दुश्मन है। परमेसुर अउर लोगन के बीच मा शान्ति न रही। लेकिन परमेसुर शान्ति स्थापित करो चाहत तै।

परमेसुर ने वायदा कीन कि हब्बा का इयक वशंज शैतान के सिर का कुचरी। व या भी कहो है कि शैतान वहिकी एड़ी का डसी। दुसरे शब्दन मा, शैतान मसीह का मार डारी, लेकिन परमेसुर वहिका फिर से जियाय दयी। यहिके बाद, मसीह शैतान कि सामर्थ का हमेशा के खातिर समाप्त कर दयी। कई सालन के बाद, परमेसुर ने परकट कीन कि व मसीह यीशु है।

परमेसुर ने नूह से इयक नाव बनावय के खातिर कहिस ताकि व वही बाढ़ से अपने परिवार का बचाय सकय जेहिका परमेसुर भेजय वाला रहय। इनतना परमेसुर ने उन लोगन का बचाइस जउन वहिमा विश्वास करत ते। इनतना से, सबै परमेसुर के द्वारा मार डारे जाय के योग्य रहय कहेसे सबने पाप कीन तै। लेकिन परमेसुर ने उन सब का बचावें के खातिर यीशु का भेजिस जउन वही पर विश्वास करत ते।

सैकड़न साल तक, याजक परमेसुर के खातिर वलिदान चढ़ावत ते। या दर्शावत है कि लोगन ने पाप कीन तय, अउर उयीं परमेसुर के द्वारा दंडित कीन जाय के योग्य रहय। लेकिन उयीं बलिदान उनके पापन कै क्षमा न कर सकत ते। यीशु सबसे बड़ा महायाजक है। उसने व कीनेस जउन कउनो भी याजक न कर सकत तै। उसने व इयक मात्र बलिदान होय के खातिर खुद का दयी दीनेस जउन हर कउनो के पापन का मिटाय सकत तै। व स्वीकार कीनेस कि परमेसुर सब लोगन के पापन के खातिर वहिका दंडित करै। यही कारण, यीशु सिद्ध महायाजक रहय।

परमेसुर ने अब्राहम से कहिस, “मै तोरे द्वारा संसार के सब कुलन का आशीष दइहऊँ।” यीशु यही अब्राहम का वशंज रहय। परमेसुर अब्राहम कें माध्यम से सब कुलन का आशीष देत है, कहेसे जउन यीशु पर विश्वास करत है। परमेसुर उन सब का पापन से बचावत है। जब यी लोग यीशु पर विश्वास करत है, तो परमेसुर उनका अब्राहम के वंशज मानत है।

परमेसुर ने अब्राहम से कहिस कि व आपन निज लरका, वहिके खातिर बलिदान कर देय। लेकिन फिर परमेसुर ने इसहाक के बदले मा बलि करै के खातिर इयक मेमना दीनेस। हम सब अपने पापन के खातिर मार डरे जाय के योग्य रहय! लेकिन परमेसुर ने हमारी जगा मा मरै के खातिर यीशु का बलिदान के रूप मा दीनेस। यही कारण से हम यीशु का परमेसुर का मेमना कहत है।

जब परमेसुर ने मिस्र पर आखिरी बिपत्ति भेजिस तो व हर इयक इस्राएली परिवार से कहिस कि उयीं इयक मेमना का बलि करै। व मेमना मा कउनो दोष न होओ चाही। तब अपने दरबाजे कि चौखट के ऊपर अउर बगलन मा उनका वही मेमना के खून का लगावय का रहय। जब परमेसुर ने व लहू का देखिस तो व उनके घरन से आगे बढ़ गा अउर उनके पहिलउठन लरकन का न मारेस। जब या भा तो परमेसुर ने यही फसह का त्योहार कहिस।

यीशु फसह के त्योहार के इयक मेमना कि तरा रहय। व कबहूँ पाप न किन तै, यहीखातिर वहमा कउनो भी गलत न रहय। व फसह के त्योहार के समय पर मरो। जब कउनो यीशु पर विश्वास करत है, तब यीशु का खून व आदमी के पापन कै कीमत चुकावत है। या अइसा है जइसा कि परमेसुर व आदमी के नेरे से आगे बढ़ गा, कहेसे व वहिका दण्ड नहीं दियत है।

परमेसुर ने इस्राएली लोगन के साथ इयक वाचा बाँधिस, कहेसे उयीं अइसे लोग रहय जिनका परमेसुर ने आपन होय के खातिर चुनो तै। लेकिन अब परमेसुर ने इयक अइसी वाचा बाँधिस जउन कि सब के खातिर है। अगर कउनो भी जाति का कउनो भी आदमी या नयी वाचा का स्वीकार करत है, तो व परमेसुर के लोगन मा मिल जात है। परमेसुर अइसा यहीखातिर करत है कहेसे व यीशु पर विश्वास करत है।

मूसा इयक अइसा परमेसुर का संदेस बतावें वाला रहय जउन परमेसुर के बचन का बड़ी सामर्थ के साथ परचार करत तै। लेकिन यीशु सब संदेस बतावें वालेन मा सबसे बड़ा रहय। व परमेसुर है, यही खातिर जउन कुछ भी व कीनेस अउर कहिस व परमेसुर के काम अउर बचन रहय। यहीखातिर पवित्र-शास्त्र, यीशु को परमेसुर का बचन कहत है।

परमेसुर ने राजा दाऊद से वायदा कीन तै कि राजा के रूप मा वहिका इयक वशंज परमेसुर के लोगन पर सदा के खातिर शासन करी। यीशु परमेसुर का लरका अउर मसीह है, यहीखातिर व राजा दाऊद का वही वंशज है जउन सदा के खातिर राज कर सकत है।

दाऊद तो इस्राएल का राजा रहय, लेकिन यीशु सारे संसार का राजा है। व फिर से अयी अउर हमेशा के खातिर न्याय अउर शान्ति के साथ अपने राज पर शासन करी।