21. परमेश्वर मसीह का प्रतिज्ञा करते

जब परमेश्वर ने संसार को निर्माण करीतीस, हु जानत होतीस कि ओको बाद में कोई दिन मसीह को भेजनो पड़े। ओने आदम अऊर हव्वा से वादा करीस कि हु असो करे। ओने कहिस कि हव्वा से एक पीढ़ी को जनम होये जो साँप के मुण्डी को कुचले। जो साँप ने हव्वा को धोखा देये होतीस हु बेशक शैतान होतीस। परमेश्वर को मतलब होतीस कि मसीह हर तरीका से शैतान को हरा देहे।

परमेश्वर ने अब्राहम से प्रतिज्ञा करे होतीस कि ओके जरिया से संसार की हर एक जातिनाऊन आशीष पाये। परमेश्वर बाद में कोई भी समय पे मसीह को भेजन के जरिया से या प्रतिज्ञा को पूरो करे। हु मसीह संसार के हर एक जाति में से लोगनाऊन को हुनके पाप से छुड़ाये।

परमेश्वर ने मूसा से प्रतिज्ञा करे होतीस कि भविष्य में हु मूसा के सारखो एक दुसरे भविष्यद्वक्ता को भेजे। यो भविष्यद्वक्ता मसीह होये। या तरीका से, परमेश्वर ने दुभारा से प्रतिज्ञा करीस कि हु मसीह को भेजे।

परमेश्वर ने राजा दाऊद से प्रतिज्ञा करे होतीस कि ओको एक पीढ़ी मसीह होये। हु राजा होये अऊर परमेश्वर के लोगनाऊन पे हमेशा के गुना राज्य करे।

परमेश्वर ने यिर्मयाह भविष्यद्वक्ता से बात करीस अऊर कहिस कि एक दिन हु एक नई वाचा बाँधे। वा नई वाचा इस्राएल के संग सीनै पहाड़ पे बाँधी गई, पुरानी वाचा के जसी नी होये। जब लोगनाऊन के संग हु अपनी नई वाचा को बाँधे, तो हु हुनके पे खुद को व्यक्तिगत रूप से दिखाए। हर एक जन ओके से प्यार रखे अऊर ओकी व्यवस्था को पालन करेन की इच्छा करे। परमेश्वर ने कहिस कि या ओकी व्यवस्था को हुनके हृदय पे लिख देन के जसो होये। ही ओके लोग होयेत, अऊर परमेश्वर हुनके पापनाऊन को माफ़ करे। हु मसीह होये जो हुनके संग वा नई वाचा को बाँधे।

परमेश्वर के भविष्यद्वक्तानाऊन ने यो भी कहिस कि मसीह एक भविष्यद्वक्ता हो जाये। एक भविष्यद्वक्ता हु मानुष आय जो परमेश्वर के वचननाऊन को सुनते अऊर लोगनाऊन पे परमेश्वर के संदेश की घोषणा करते। जेको भेजन को परमेश्वर ने प्रतिज्ञा करे होतीस कि हु मसीह एक सिद्ध भविष्यद्वक्ता होये। मतलब हु मसीह परमेश्वर के संदेश को साजरे से से सुने, अऊर हु लोगनाऊन को हुन संदेश को साजरे तरिका से सिखाए।

इस्राएली याजकनाऊन ने लोगनाऊन के गुना परमेश्वर के सामूर बलिदान चढ़ानो चालू रखीन। या बलिदान लोगनाऊन के पाप के गुना हुनको परमेश्वर जरिया दंडित किए जान के जागा पे चढ़ाए होतीन। याजकनाऊन ने लोगनाऊन के गुना प्रार्थना भी करीं। पर हु मसीह सिद्ध महायाजक होये जो परमेश्वर को देन के गुना एक सिद्ध बली के रूप में खुद को चढ़ा देहे। मतलब, हु कभी पाप नी करे, अऊर जब हु खुद को बलीदान होन के गुना देहे, तो संसार का कोई भी दूसरी बली देनो जरुरी नी होये।

लोगनाऊन के झुण्ड पे राजा अऊर मुखीया राज्य करत होतीन, अऊर कभी-कभी ही गलती भी करत होतीन। राजा दाऊद ने सिरिफ इस्राएलीनाऊन पे राज्य करिस, पर राजा दाऊद की पीढ़ी को मसीह पूरे संसार पे राज्य करे, अऊर हु सदा के गुना राज्य करे। एके बजाय, हु हमेशा न्याय के लायक रीति से राज्य करे, अऊर सही निर्णय को लेहे।

परमेश्वर के भविष्यद्वक्तानाऊन ने मसीह के बारे में कई बातनाउन को कहिन। उदाहरण के गुना, मलाकी ने कहिस कि मसीह के आने से पहले एक दुसरो भविष्यद्वक्ता आए। हु भविष्यद्वक्ता बहुत महत्वपूर्ण होये। येके अलावा, यशायाह भविष्यद्वक्ता ने लिखीस कि मसीह एक कुँवारी से जनम लेहे। अऊर मीका भविष्यद्वक्ता ने कहिस कि मसीह बैतलहम शहर में जनम लेहे।

यशायाह भविष्यद्वक्ता ने कहिस कि मसीह गलील के प्रदेश में रहे। जो लोग बहुत दुःखी हत मसीह हुनको शान्ति देहे। हु गुन्हेगारनाऊन को आजाद करे। मसीह बीमारनाऊन को अऊर जो सुन नी सकत होतीन, जो देख नी सकत होतीन, जो बोल नी सकत होतीन, जो चल नी सकत होतीन हुनको भी चंगा करे।

यशायाह भविष्यद्वक्ता ने यो भी कहिस कि लोग मसीह से नफरत करेत अऊर ओको स्वीकार करन से मना करेत। दुसरे भविष्यद्वक्तानाऊन ने कहिन कि मसीह को एक संगी ओके खिलाफ उठे। जकर्याह भविष्यद्वक्ता ने कहिस कि ओको यो संगी ओको धोका देन के गुना के दूसरे लोगनाऊन से चाँदी के तीस सिक्के लेहे। येके अलावा, अऊर कुछ भविष्यद्वक्तानाऊन ने कहिन कि लोग मसीह को मार डालेत, अऊर यो कि ही लोग ओके कपड़ानाऊन के गुना जुआ खेलेत।

भविष्यद्वक्तानाऊन ने यो भी बताइन कि मसीह कसो मरे। यशायाह ने भविष्यद्वाणी करीस कि लोग मसीह पे थूकेत, ओको मजाक उड़ायेत, अऊर ओको पीटेत। ही ओको छेदत अऊर हु बड़ी पीड़ा अऊर दुःख में मर जाए, जबकि ओने कई भी गलत नी करीस होये।

भविष्यद्वक्तानाऊन ने यो भी बताइन कि मसीह पाप नी करे। हु सिद्ध होये। पर हु एकेगुना मरे कि परमेश्वर उसे दुसरे लोगनाऊन के पापनाऊन के कारण दण्ड देहे। ओके मरन से लोग परमेश्वर के संग मिलाप करन में योग्य होयेत। एकेगुना परमेश्वर चाहते कि मसीह मरे।

भविष्यद्वक्तानाऊन ने यो भी बताइन कि परमेश्वर मसीह को मरे में से जिन्दा करे। यो बताते कि यो सप्पाई नई वाचा को बाँधन के गुना परमेश्वर की योजना होती, ताकि हु हुन लोगनाऊन को बचा सके जिनने ओके खिलाफ पाप करे होतीन।

परमेश्वर ने भविष्यद्वक्तानाऊन पे मसीह के बारे में कई सारी बातनाऊन को बताइस, पर मसीह ही भविष्यद्वक्तानाऊन में से कोई के भी जीवनकाल में नी आइतीस। ही भविष्यद्वाणिनाऊन के दिए जान के 400 से जादा साल के बाद में, सही समय पे, परमेश्वर मसीह को यो संसार में भेजे।